പാലക്കാട്ട് പോരാട്ടം കോൺഗ്രസും ബിജെപിയും തമ്മിൽ: മുല്ലപ്പള്ളി
Wednesday, November 6, 2024 2:33 AM IST
പാലക്കാട്: പാലക്കാട് ഉപതെരഞ്ഞെടുപ്പില്‍ ചര്‍ച്ച ചെയ്യപ്പെടേണ്ടതു രാഷ്‌ട്രീയമാണെന്നു കെപിസിസി മുന്‍ അധ്യക്ഷന്‍ മുല്ലപ്പള്ളി രാമചന്ദ്രന്‍.
ബിജെപിയും കോണ്‍ഗ്രസും തമ്മിലാണു പാലക്കാട്ട് പോരാട്ടമെന്നും മുല്ലപ്പള്ളി മാധ്യമപ്രവർത്തകരോടു പറഞ്ഞു. ബിജെപിയും കോണ്‍ഗ്രസും തമ്മില്‍ ആശയപോരാട്ടമാണ് നടക്കേണ്ടത്.
എൽഡിഎഫ് സ്ഥാനാർഥി രാഷ്‌ട്രീയവും സര്‍ക്കാരിന്‍റെ പ്രവര്‍ത്തനങ്ങളും പറയുന്നില്ല. എല്ലാ മാലിന്യവും സ്വീകരിക്കുന്ന പാര്‍ട്ടിയായി സിപിഎം മാറി. വരുന്നവരെയൊക്കെ കൈകഴുകി സ്വീകരിക്കുന്ന പാര്‍ട്ടിയാകാന്‍ കോണ്‍ഗ്രസിനു പറ്റില്ല. അതാണു സരിന്‍റെ കാര്യത്തില്‍ കോണ്‍ഗ്രസിനു പറ്റിയത്.
സരിനെ കോണ്‍ഗ്രസ് നടത്തിയിരുന്ന ഒരു പോരാട്ടത്തിലും കണ്ടിട്ടില്ല. സരിനെ ഒറ്റപ്പാലത്തു നിര്‍ദേശിച്ചതു കെപിസിസി അല്ല. പാര്‍ട്ടിയെ സ്‌നേഹിക്കുന്നവരല്ല പാര്‍ട്ടി വിട്ടവര്‍. സരിന്‍ പറയേണ്ടതു രാഷ്‌ട്രീയമാണ്, കൈകൊടുത്തില്ലെന്ന പരാതിയല്ല. പാലക്കാട്ടെ കോണ്‍ഗ്രസില്‍ ഗൗരവമായ പ്രശ്‌നങ്ങളില്ലെന്നും മുല്ലപ്പള്ളി അഭിപ്രായപ്പെട്ടു.