മുനമ്പത്തെ അമ്മമാരുടെ ആകുലതകൾ സർക്കാർ കാണണം: സീറോമലബാർ മാതൃവേദി
Thursday, November 7, 2024 1:39 AM IST
കൊച്ചി: മുനമ്പം ഭൂമിപ്രശ്‌നം ഉടൻ പരിഹരിക്കണമെന്ന് സീറോമലബാർ ഗ്ലോബൽ മാതൃവേദി ആവശ്യപ്പെട്ടു. സാമുദായിക സ്പർധയുണ്ടാകുന്ന അവസ്ഥയിലേക്ക് വലിച്ചിഴയ്ക്കാതെ നിയമപരമായും വസ്തുതാപരമായും ഈ വിഷയം പരിഹരിക്കാൻ ഉത്തരവാദിത്വപ്പെട്ട അധികാരികൾ മുൻകൈയെടുക്കണം.
വർഷങ്ങളായി അവിടെ താമസിക്കുന്ന ആളുകൾക്ക് അവർ താമസിക്കുന്ന ഭൂമിസംബന്ധമായ പ്രശ്‌നത്തിനു രമ്യമായ പരിഹാരം കാണണം. സമൂഹത്തിൽ വിദ്വേഷമുണ്ടാക്കുകയെന്ന ലക്ഷ്യത്തോടെ ചില സ്വാർത്ഥ താത്പര്യക്കാർ പ്രവർത്തിക്കുന്നത് മതസൗഹാർദത്തെ മാത്രമല്ല, സമൂഹജീവിതത്തിന്‍റെ സ്വസ്ഥതയെയും തകർക്കും.
ഏതു പരിസ്ഥിതിയിലും ശക്തമായി മതസൗഹാർദം മുറുകെപ്പിടിക്കുന്ന കേരള സമൂഹത്തിന് ഇതൊരു കളങ്കമാണ്. സാധാരണക്കാരന്‍റെ രോദനങ്ങളിൽ കണ്ണടയ്ക്കുന്ന ഭരണനേതൃത്വത്തിലുള്ളവർ നിലപാട് തിരുത്തി മുനമ്പത്തെ അമ്മമാരുടെ ആകുലതകൾക്ക് പരിഹാരം കാണണമെന്നും മാതൃവേദി ആവശ്യപ്പെട്ടു.