ചിറ്റൂർ: തത്തമംഗലം ഗവ. ആയുർവേദ ആശുപത്രിയിൽ ഫിസിയോ തെറാപ്പി യൂണിറ്റ് പ്രവർത്തനം മന്ത്രി കെ. കൃഷ്ണൻകുട്ടി ഉദ്ഘാടനം ചെയ്തു. ചടങ്ങിൽ ചിറ്റൂർ-തത്തമംഗലം നഗരസഭ ചെയർപേഴ്സൻ കെ.എൽ. കവിത അധ്യക്ഷത വഹിച്ചു.
ആയുർവേദ വകുപ്പ് ജില്ലാ മെഡിക്കൽ ഓഫീസർ ഡോ. കെ.വി. രമ, നഗരസഭാ ആരോഗ്യ സ്ഥിരം സമിതി ചെയർപേഴ്സൻ ഓമന കണ്ണൻകുട്ടി, ചീഫ് മെഡിക്കൽ ഓഫീസർ ഡോ. ഗീതാറാണി, ഡോ. ഒ.വി. ദിവ്യ എന്നിവർ പ്രസംഗിച്ചു ചിറ്റൂർ എംഎൽഎയുടെ ആസ്തിവികസന ഫണ്ട് 17 ലക്ഷം ചെലവഴിച്ചാണ് ഫിസിയോ തെറാപ്പി യൂണിറ്റ് ആരംഭിച്ചിരിക്കുന്നത്. ആശുപത്രിയിൽ കാലത്ത് ഒൻപതു മുതൽ രണ്ടുവരെ ഈ സേവനം ലഭ്യമാകും.