എടത്വ: വയനാട്ടിലെ ദുരന്തഭൂമിയില്‍ രക്ഷാപ്രവര്‍ത്തനവുമായി കുട്ടനാട് റെസ്‌ക്യൂ ടീമും. കുട്ടനാട് റെസ്‌ക്യൂ ടീം പ്രവര്‍ത്തകരായ അനൂപ് എടത്വ, ജിജോ സേവ്യര്‍, ശ്യാം സുന്ദര്‍, ജിജോ ജോര്‍ജ് എന്നിവരുടെ നേതൃത്വത്തിലുള്ള സംഘമാണ് പുഞ്ചിരിമട്ടം, മുണ്ടക്കൈ തുടങ്ങിയ സ്ഥലങ്ങളില്‍ രക്ഷാപ്രവര്‍ത്തനം നടത്തുന്നത്. ഒരു പെട്ടിവണ്ടിയിലും കാറിലുമായി ദുരിത ബാധിതര്‍ക്കായി സമാഹരിച്ച സാധനങ്ങളുമായി ബുധനാഴ്ച വൈകുന്നേരം നാലിനാണ് ഇവര്‍ എടത്വായില്‍നിന്ന് വയനാട്ടിലേക്കു പോയത്.
2018 ലെ പ്രളയകാലത്ത് കുട്ടനാട്ടില്‍ എത്തിയ വയനാട്ടില്‍നിന്നുള്ള നിരവധി സന്നദ്ധ പ്രവര്‍ത്തകര്‍ ജനങ്ങള്‍ക്ക് ആവശ്യമായ ഭക്ഷണവും ഉടുവസ്ത്രവും മറ്റ് അവശ്യസാധനങ്ങളുമായി എത്തിയിരുന്നു. ഒരാഴ്ചയോളം നീണ്ടുനിന്ന ശുചീകരണ പ്രവര്‍ത്തനത്തിലും പങ്കെടുത്ത ശേഷമായിരുന്നു അവര്‍ മടങ്ങിയത്. നിരവധി സന്നദ്ധ പ്രവര്‍ത്തകര്‍ അവശ്യസാധനങ്ങള്‍ എത്തിച്ചെങ്കിലും സേവന പ്രവര്‍ത്തനം നടത്തിയവരില്‍ ഏറിയ പങ്കും വയനാട്ടില്‍നിന്ന് ഉള്ളവരായിരുന്നു. അന്നു കുട്ടനാട് റെസ്‌ക്യൂ ടീം പ്രവര്‍ത്തകര്‍ക്കൊപ്പം ചേര്‍ന്നുനിന്നായിരുന്നു അവരുടെ പ്രവര്‍ത്തനം.