ആലപ്പുഴ: വയനാട് ദുരന്തത്തില് കഷ്ടത അനുഭവിക്കുന്നവര്ക്ക് ആറുവയസുകാരിയുടെ കരുതല്. കാരൂര് ന്യൂ എല്പി സ്കൂളിലെ രണ്ടാം ക്ലാസ് വിദ്യാര്ഥി ബി. അനുഗ്രഹയാണ് രണ്ടു വര്ഷമായി കുടുക്കയില് സ്വരുക്കൂട്ടിയ സമ്പാദ്യം മുഖ്യമന്ത്രിയുടെ ദുരിതാശ്വാസനിധിയിലേക്ക് നല്കി മാതൃകയായത്.
സൈക്കിള് വാങ്ങാനായാണ് അനുഗ്രഹ കുടുക്കയില് പണം നിക്ഷേപിച്ചിരുന്നത്. ഈ സമ്പാദ്യമാണ് ദുരിതമനുഭവിക്കുന്നവര്ക്ക് നല്കാനായി കളക്ടറേറ്റിലെത്തി ജില്ലാ കളക്ടര് അലക്സ് വര്ഗീസിന് കൈമാറിയത്. മത്സ്യത്തൊഴിലാളിയായ അച്ഛന് പുറക്കാട് വാലുപറമ്പില് ബിബീഷിനും പുറക്കാട് പഞ്ചായത്ത് പ്രസിഡന്റ് എ.എസ്. സുദര്ശനനും ഒപ്പമാണ് അനുഗ്രഹ കളക്ടറേ റ്റില് എത്തിയത്. ചിപ്പിയാണ് അമ്മ.