കാസര്‍ഗോഡ്: കേരളത്തിലെ സഹകരണ സ്ഥാപനങ്ങളെ കൊള്ളയടിക്കുന്നതിന് സി.പി.എം സംസ്ഥാന തലത്തില്‍ മാസ്റ്റര്‍ പ്ലാന്‍ തയാറാക്കിയിരിക്കയാണെന്ന് കെപിസിസി വര്‍ക്കിംഗ് പ്രസിഡന്‍റ് ടി.എൻ. പ്രതാപന്‍. കേരള കോ- ഓപ്പറേറ്റീവ് എംപ്ലോയിസ് ഫ്രണ്ട് ജില്ലാ കമ്മറ്റിയുടെ നേതൃത്വത്തില്‍ നടന്ന സഹകരണ സംഘം ജോയിന്‍റ് രജിസ്ട്രാര്‍ ഓഫീസ് ധര്‍ണ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
സഹകരണ നിയമ - ചട്ട ഭേദഗതിയിലൂടെ പുതുതായി രൂപീകരിക്കുന്ന സഹകരണസംഘം പുനരുദ്ധാരണ നിധിയിലൂടെ സമാഹരിക്കുന്ന തുക സിപിഎം കൊള്ളയടിച്ച ബാങ്കുകളിലേക്ക് മാറ്റുന്നതിനാണ് ലക്ഷ്യമിടുന്നത്. കേരളത്തിലെ സഹകരണ മേഖലയെ ദുര്‍ബലപ്പെടുത്തുന്നതിനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം കൂട്ടിച്ചേര്‍ത്തു. ജില്ലാ പ്രസിഡന്‍റ് പി.കെ. വിനോദ് കുമാര്‍ അധ്യക്ഷത വഹിച്ചു. പി.കെ. ഫൈസല്‍, കെ. നീലകണ്ഠന്‍, കെ. ശശി എന്നിവര്‍ പ്രസംഗിച്ചു.