തിരുവമ്പാടി: പുല്ലൂരാംപാറ-മേലെ പൊന്നാങ്കയം റോഡിൽ ജൽജീവൻ പദ്ധതിയുടെ ഭാഗമായി പൈപ്പുകളിട്ട ഭാഗത്ത് വലിയ ഗർത്തം രൂപപ്പെട്ടു. വളവും കുത്തനെ ഇറക്കവുമുള്ള റോഡിൽ മഴ പെയ്താൽ വൻ അപകടമാണ് യാത്രക്കാരെ കാത്തിരിക്കുന്നത്. പൊന്നാങ്കയംവാസികൾ സഞ്ചരിക്കുന്ന പ്രധാന റോഡാണിത്.
നിരവധി സ്കൂൾ, കോളജ് വിദ്യാർഥികളും ഈ റോഡിലൂടെയാണ് യാത്ര ചെയ്യുന്നത്. തിരുവമ്പാടി പഞ്ചായത്തിൽ ജൽജീവന്റെ പൈപ്പിടൽമൂലം തകരാറായി കിടക്കുന്ന നിരവധി റോഡുകളുണ്ട്. എംഎൽഎ ഇടപെട്ട് റോഡിന്റെ ശോചനീയാവസ്ഥ പരിഹരിക്കാനാവശ്യമായ നടപടി സ്വീകരിക്കണമെന്ന് തിരുവമ്പാടി കർഷക കോൺഗ്രസ് നിയോജകമണ്ഡലം പ്രസിഡന്റ് ഷിജു ചെമ്പനാനി ആവശ്യപ്പെട്ടു.