പൂക്കോട്ടുംപാടം: കരടിശല്യം കാരണം തേനീച്ച കര്‍ഷകര്‍ ഉള്‍പ്പെടെ ദുരിതത്തില്‍. കഴിഞ്ഞ ദിവസം അമരമ്പലം പഞ്ചായത്തിലെ തേള്‍പ്പാറ പാലക്കാട്ടുപറമ്പില്‍ സിബിയുടെ 45ലധികം തേനീച്ച പെട്ടികളും ചെമ്പരത്തില്‍ ജോബിയുടെ 25ലേറെ പെട്ടികളും കരടി നശിപ്പിച്ചു.
ഖാദി ബോര്‍ഡ് സഹായത്തോടെയാണ് ഇവര്‍ തേനീച്ച കൃഷി ചെയ്യുന്നത്. ഏകദേശം 75000 രൂപയുടെ നഷ്ടമാണ് കര്‍ഷകര്‍ക്ക് നേരിട്ടത്. രണ്ട് മാസം മുമ്പ് ടി.കെ. കോളനി, ആന്‍റണിക്കാട്, കല്‍ച്ചിറ തുടങ്ങിയ ഇടങ്ങളില്‍ കരടിശല്യം രൂക്ഷമായിരുന്നു. ടി.കെ. കോളനിയില്‍ ഒരാളെ കരടി ആക്രമിച്ച് ഗുരുതര പരിക്കേല്‍പ്പിക്കുകയും ചെയ്തിരുന്നു. കരടി വാഹനത്തിന് മുന്നില്‍ ചാടുന്നതിനാല്‍ അതിരാവിലെ ടാപ്പിംഗ് ജോലിക്കും മറ്റും പോകുന്നവര്‍ ഭീതിയിലാണ്. വനം വകുപ്പ് അധികൃതര്‍ ഉള്‍പ്പെടെ അടിയന്തരമായി ഇടപെട്ട് കരടിശല്യം ഒഴിവാക്കണമെന്നാണ് കര്‍ഷകരുടെയും പൊതുജനങ്ങളുടെയും ആവശ്യം.