നെടുങ്കണ്ടം: നഷ്ടപ്പെട്ടെന്നു കരുതിയ ഒരുപവനോളം തൂക്കമുള്ള സ്വര്ണച്ചെയിന് തിരികെ ലഭിച്ച സന്തോഷത്തിലാണ് ഒരു കുടുംബം. തിരക്കേറിയ നെടുങ്കണ്ടം ടൗണിലെ സെന്ട്രല് ജംഗ്ഷനില് കളഞ്ഞുകിട്ടിയ ചെയിന് ഉടമയെ കണ്ടെത്തി തിരികെ നല്കാന് തയാറായത് കവുന്തി സ്വദേശി തോട്ടപ്പുറം ലൗസന് മാത്യു എന്നയാളുടെ നല്ലമനസാണ്.
ഉടുമ്പന്ചോല സ്വദേശി ജിജിയുടെ ഇളയമകളുടെ കൈയില് കിടന്ന ചെയിനാണ് നഷ്ടപ്പെട്ടത്. ടൗണിലെ ഹൈപ്പര് മാര്ക്കറ്റില് എത്തിയതായിരുന്നു കുടുംബം. സാധനങ്ങള് വാങ്ങി തിരികെപ്പോകാന് ഒരുങ്ങിയപ്പോഴാണ് ചെയിന് നഷ്ടപ്പെട്ട വിവരം അറിയുന്നത്. ഇവിടെയും ടൗണിലും തെരഞ്ഞെങ്കിലും കണ്ടെത്താനായില്ല. ഇതിനിടെ ചെയിന് ലഭിച്ച ലൗസന് പ്രാദേശിക കേബിള് ടിവി ചാനലില് ഇത് അറിയിപ്പായി നല്കിയിരുന്നു. ഇതു കണ്ട ജിജി ലൗസനെ വിളിച്ചു. പിന്നീട് ലൗസന് ചെയിന് നെടുങ്കണ്ടത്ത് എത്തിച്ച് ഉടമയ്ക്ക് നല്കി.