നെടുങ്കണ്ടം: നെടുങ്കണ്ടത്തുനിന്നും തിരുവനന്തപുരത്തേക്ക് കെഎസ്ആര്ടിസിയുടെ പുതിയ ബസ് സര്വീസ് ആരംഭിച്ചു. രാത്രി 12.15ന് നെടുങ്കണ്ടത്ത് നിന്നു പുറപ്പെട്ട് മുണ്ടിയെരുമ - തൂക്കുപാലം - കട്ടപ്പന - മുണ്ടക്കയം - പത്തനംതിട്ട വഴി രാവിലെ 8.15 ന് തിരുവനന്തപുരത്ത് എത്തിച്ചേരുന്ന ബസ് തിരികെ ഉച്ചയ്ക്ക് 11.20ന് പുറപ്പെട്ട് രാത്രി 7.15ന് നെടുങ്കണ്ടത്ത് എത്തിച്ചേരും.
ഈ സര്വീസില് റിസര്വേഷൻ ലഭ്യമാണ്. 326 രൂപയാണ് നെടുങ്കണ്ടത്തുനിന്നും തിരുവനന്തപുരത്തേക്കുള്ള ചാര്ജ്. നെടുങ്കണ്ടം പ്രൈവറ്റ് ബസ്റ്റാൻഡില് നടന്ന ചടങ്ങില് സര്വീസിന്റെ ഉദ്ഘാടനം എം.എം മണി എംഎല്എ നിര്വഹിച്ചു. ഗ്രാമപഞ്ചായത്ത് പ്രസിഡന്റ് ലേഖാ ത്യാഗരാജന്, സ്റ്റാന്ഡിംഗ് കമ്മിറ്റി ചെയര്പേഴ്സണ് ബിജിമോള് വിജയന്, കെഎസ്ആര്ടിസി കട്ടപ്പന യൂണിറ്റ് ഓഫീസര് ബഷീര്, നെടുങ്കണ്ടം യൂണിറ്റ് ഓഫീസര് ഈപ്പച്ചന്, സംഘടനാ പ്രതിനിധികള്, ജീവനക്കാര് തുടങ്ങിയവര് ചടങ്ങില് പങ്കെടുത്തു.