കോഴിക്കോട്ട് വീണ്ടും അമീബിക് മസ്തിഷ്ക ജ്വരം: 12 വയസുകാരന്‍റെ നില ഗുരുതരം : Deepika.com Kerala News |

കോഴിക്കോട്: കോഴിക്കോട്ടെ സ്വകാര്യ ആശുപത്രിയിൽ ഏതാനും ദിവസങ്ങളായി അതീവ ഗുരുതരാവസ്ഥയിൽ കഴിയുന്ന 12 വയസുകാരന് അമീബിക് മസ്തിഷ്ക ജ്വരം ബാധിച്ചതായി സ്ഥിരീകരണം.

കുട്ടി നിലവിൽ വെന്‍റിലേറ്ററിലാണ്. മരുന്നിനോടു കാര്യമായി പ്രതികരിക്കുന്നില്ല. ഫറൂഖ് കോളജിനടുത്ത ഇരുമുളിപ്പറന്പ് സ്വദേശിയായ കുട്ടിയാണ് കോഴിക്കോട്ടെ സ്വകാര്യ ആശുപത്രിയിലുള്ളത്.

അമീബിക് മസ്തിഷ്ക ജ്വരമാണെന്ന് ആശുപത്രി അധികൃതർക്കു സംശയമുണ്ടായിരുന്നു. ഇതേ ത്തുടർന്ന് പുതുച്ചേരി ലാബിൽ കൂട്ടിയുടെ സ്രവം പരിശോധന നടത്തിയപ്പോഴാണു രോഗം സ്ഥിരീകരിച്ചത്.

അമീബിക് മസ്തിഷ്ക ജ്വരം ബാധിച്ച് കണ്ണൂർ തോട്ടട സ്വദേശിയായ 13 കാരിയും മലപ്പുറം മുന്നിയൂർ സ്വദേശിയായ അഞ്ചു വയസുകാരിയും അടുത്തിടെ മരിച്ചിരുന്നു. ഇതേത്തുടർന്ന് രോഗം റിപ്പോർട്ട് ചെയ്ത കോഴിക്കോട്, കണ്ണൂർ, മലപ്പുറം ജില്ലകളിൽ ആരോഗ്യ വകുപ്പ് ജാഗ്രതാ നിർദേശം നൽകി. ഫാറൂഖ് കോളജിനടുത്തുള്ള അച്ചനന്പലം കുളത്തിൽ കുളിച്ചതാണ് 12 വയസുകാരനു രോഗബാധ ഉണ്ടാകാനുള്ള കാരണമായി കരുതുന്നത്.

കുളത്തിൽ കുളിച്ച് ആറുദിവസം കഴിഞ്ഞാണ് കുട്ടിക്കു രോഗലക്ഷണം കണ്ടത്. നേഗ്ലെറിയ ഫൗലേറി എന്ന അമീബ വിഭാഗത്തിൽപ്പെട്ട രോഗാണു തലച്ചോറിനെ ബാധിക്കുന്പോൾ ഉണ്ടാകുന്ന രോഗമാണ് അമീബിക് മെനിഞ്ചോ എൻസെഫലൈറ്റിസ് അഥവാ അമീബിക് മസ്തിഷ്കജ്വരം.

കെട്ടിക്കിടക്കുന്ന വെള്ളത്തിൽ ജീവിക്കുന്ന അമീബ മൂക്കിലെ നേർത്ത തൊലിയിലൂടെ മനുഷ്യശരീരത്തിൽ കടക്കുകയും തലച്ചോറിനെ ഗുരുതരമായി ബാധിക്കുന്ന മസ്തിഷ്കജ്വരം ഉണ്ടാക്കുകയുമാണു ചെയ്യുന്നത്.

അമീബിക് മസ്തിഷ്ക ജ്വരം സ്ഥിരീകരിച്ച സാഹചര്യത്തിൽ ജനങ്ങളുടെ ആശങ്കയകറ്റാൻ കഴിഞ്ഞദിവസം പഞ്ചായത്തിന്‍റെ നേതൃത്വത്തിൽ ഫറൂഖിൽ സർവകക്ഷി യോഗം ചേർന്നിരുന്നു.