എയിംസ് കേന്ദ്രത്തിന്‍റെ പരിഗണനയിൽ; വീണാ ജോർജ് സഭയിൽ : Deepika.com Kerala News |

Click here for detailed news of all items

എയിംസ് കേന്ദ്രത്തിന്‍റെ പരിഗണനയിൽ; വീണാ ജോർജ് സഭയിൽ

Saturday, June 29, 2024 12:37 AM IST

തിരുവനന്തപുരം: കേരളത്തിൽ എയിംസ് ആരംഭിക്കുന്നതിനുള്ള സംസ്ഥാന സർക്കാരിന്‍റെ നിർദേശം കേന്ദ്ര ആരോഗ്യവകുപ്പ് അംഗീകരിച്ച് ധനകാര്യമന്ത്രാലയത്തിന്‍റെ പരിഗണനയ്ക്കായി അയച്ചതായി കേരളത്തെ അറിയിച്ചെന്ന് ആരോഗ്യമന്ത്രി വീണാ ജോർജ്.

കോഴിക്കോട് ജില്ലയിലെ കിനാലൂരിൽ എയിംസ് സ്ഥാപിക്കുന്നതിനാണു സംസ്ഥാന സർക്കാർ തീരുമാനിച്ചിരിക്കുന്നത്.

കിനാലൂരിൽ കെഎസ്ഐഡിസിയുടെ കൈവശമുള്ള 151 ഏക്കർ ഭൂമി ആരോഗ്യവകുപ്പിനു കൈമാറാൻ സർക്കാർ നിർദേശിച്ചിട്ടുണ്ട്. ഇതിന്‍റെ നടപടികൾ പൂർത്തിയായി വരികയാണ്.

ആവശ്യമായ ബാക്കി സ്ഥലം ഏറ്റെടുക്കും. 2014 ലാണ് കേരളത്തിന് എയിംസ് അനുവദിക്കുമെന്നു പ്രഖ്യാപിച്ചത്. എന്നാൽ ഇതുവരെയും അനുമതി നൽകിയിട്ടില്ല. കേന്ദ്ര ആരോഗ്യമന്ത്രി കേരളം സന്ദർശിച്ചപ്പോൾ മുഖ്യമന്ത്രിയും താനും അദ്ദേഹവുമായി ഇക്കാര്യത്തിൽ ചർച്ച നടത്തിയിരുന്നു.

ഇനിയൊരു എയിംസ് തുടങ്ങിയാൽ അതു കേരളത്തിലാകും എന്നു പറഞ്ഞെങ്കിലും തീരുമാനമുണ്ടാകുന്നില്ല. ഇതിനു രാഷ്‌ട്രീയതീരുമാനം കൂടി വേണമെന്നു തോന്നുന്നതായി മന്ത്രി പറഞ്ഞു.

കേരളത്തിന് അനുവദിച്ച എയിംസ് കൊരട്ടിയിൽ ആരംഭിക്കണമെന്ന് ആവശ്യപ്പെട്ട് സനീഷ്കുമാർ ജോസഫ് അവതരിപ്പിച്ച അനൗദ്യോഗിക പ്രമേയത്തിനു മറുപടി പറയുകയായിരുന്നു മന്ത്രി.

എയിംസിന് ആവശ്യമായ റോഡ് സൗകര്യമുള്ള 200 ഏക്കർ സർക്കാർ ഭൂമി കൊരട്ടിയിൽ ലഭ്യമാണെന്ന് സനീഷ്കുമാർ ചൂണ്ടിക്കാട്ടി. എന്നാൽ കിനാലൂർ സംബന്ധിച്ചു തീരുമാനമാകുകയും കേന്ദ്ര സർക്കാരിനെ അറിയിക്കുകയും ചെയ്ത സാഹചര്യത്തിൽ ഇനിയൊരു മാറ്റത്തേക്കുറിച്ച് ആലോചിക്കുന്നില്ലെന്നു മന്ത്രി വീണാ ജോർജ് വ്യക്തമാക്കി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.