ചേര്ത്തല: സെന്റ് മൈക്കിൾസ് കോളജിൽ റൂസ 2.0 പദ്ധതിയിൽ ഉൾപ്പെടുത്തി രണ്ടുകോടി രൂപ ചെലവിൽ നിർമാണം പൂർത്തിയാക്കിയ പദ്ധതികളുടെയും അനുബന്ധ നിർമിതികളുടെയും ഉദ്ഘാടനം മന്ത്രി ഡോ.ആർ. ബിന്ദു നിർവഹിച്ചു. കേരളത്തിന്റെ വൈജ്ഞാനികസമൂഹം ലോകത്തിനു മാതൃകയാണെന്നും പുതിയ തലമുറ മാറുന്ന വിദ്യാഭ്യാസമുന്നേറ്റങ്ങൾക്കൊപ്പം ബഹുവേഗം വളരാൻ ശ്രമിക്കണമെന്നും മന്ത്രി ആർ. ബിന്ദു ആഹ്വാനം ചെയ്തു.
മന്ത്രി പി. പ്രസാദ് സമ്മേളനത്തില് അധ്യക്ഷത വഹിച്ചു. കോളജ് പ്രിൻസിപ്പൽ പ്രഫ. ഡോ. സിന്ധു എസ്. നായർ സ്വാഗതം പറഞ്ഞു. മാനേജർ ഡോ. സെലസ്റ്റിൻ പുത്തൻപുരയ്ക്കൽ അനുഗ്രഹ പ്രഭാഷണം നടത്തി. ചേർത്തല തെക്ക് പഞ്ചായത്ത് പ്രസിഡന്റ് സിനിമോൾ സാംസൺ, വൈസ് പ്രസിഡന്റ് നിബു എസ്. പദ്മം, കഞ്ഞിക്കുഴി ബ്ലോക്ക് പഞ്ചായത്തംഗം രജനി ദാസപ്പൻ, പിടിഎ വൈസ് പ്രസിഡന്റ് പി.ഐ. ഹാരിസ്, കോളജ് വൈസ് പ്രിൻസിപ്പൽ ഡോ. ആന്റണി കുര്യക്കോസ് എന്നിവര് പ്രസംഗിച്ചു.