ഉന്നത ഉദ്യോഗസ്ഥരടക്കം രാജ്യത്തെ പ്രധാന പദവികളിൽ പിന്നാക്കവിഭാഗങ്ങൾക്ക് പ്രാതിനിധ്യമില്ലെന്നതു താൻ തുടർച്ചയായി പറഞ്ഞുകൊണ്ടിരിക്കുന്ന കാര്യമാണ്. ഇതിനു പരിഹാരമുണ്ടാക്കേണ്ടതിനു പകരം ലാറ്ററൽ എൻട്രി വഴി പിന്നാക്കക്കാരെ ഉന്നതസ്ഥാനങ്ങളിൽനിന്ന് കൂടുതൽ അകറ്റുകയാണെന്നും രാഹുൽ എക്സിൽ കുറിച്ചു. യുപിഎസ്സി പരീക്ഷയ്ക്കു തയാറെടുക്കുന്ന യുവാക്കളുടെ അവകാശങ്ങൾ തട്ടിയെടുക്കുന്ന സമീപനമാണ് കേന്ദ്രസർക്കാരിന്റേതെന്നും രാഹുൽ പറഞ്ഞു.
കോർപറേറ്റുകളുടെ പ്രതിനിധികൾ പ്രധാന സർക്കാർ പദവികൾ കൈവശംവച്ചാൽ എന്തു സംഭവിക്കുമെന്നതിന്റെ ഉദാഹരണമാണ് സെബി. ആദ്യമായാണ് സെബിയുടെ ചെയർപേഴ്സണായി സ്വകാര്യമേഖലയിൽനിന്ന് ഒരാളെ നിയമിച്ചത്. സ്വകാര്യമേഖലയിൽ നിന്ന് ലാറ്ററൽ എൻട്രി വഴി നിയമനം നടത്തുന്ന കേന്ദ്രസർക്കാരിന്റെ നടപടിയെ ഇന്ത്യ സഖ്യം ശക്തമായി എതിർക്കുമെന്നും രാഹുൽ വ്യക്തമാക്കി.