കെ.സി. വേണുഗോപാൽ പിഎസി ചെയർമാൻ : Deepika.com National News |

ന്യൂഡൽഹി: പാർലമെന്‍റിന്‍റെ പബ്ലിക് അക്കൗണ്ട്സ് കമ്മിറ്റി അധ്യക്ഷനായി എഐസിസി ജനറൽ സെക്രട്ടറിയും ആലപ്പുഴ എംപിയുമായ കെ.സി. വേണുഗോപാലിനെ സ്പീക്കർ ഓം ബിർള നാമനിർദേശം ചെയ്തു.

വേണുഗോപാലിനു പുറമെ കോൺഗ്രസ് അംഗം അമർസിംഗ്, ഡിഎംകെ അംഗം ടി.ആർ. ബാലു, സമാജ്‌വാദി പാർട്ടി അംഗം ധർമേന്ദ്ര യാദവ്, തൃണമൂൽ കോൺഗ്രസ് അംഗം സൗഗത റോയ് എന്നിവരാണ് പ്രതിപക്ഷനിരയിൽനിന്നുള്ള അംഗങ്ങൾ.

ബിജെപി എംപിമാരായ മുൻ കേന്ദ്രമന്ത്രി അനുരാഗ് ഠാക്കൂർ, രവിശങ്കർ പ്രസാദ്, ജഗദംബിക പാൽ, സി.എം. രമേഷ്, തൃവേന്ദ്ര സിംഗ്, തേജസ്വി സൂര്യ എന്നിവരും തെലുങ്കുദേശം പാർട്ടിയിലെ എം.എസ്.റെഡ്ഢി, ജനസേന എംപി വി. ബാലശൗരി എന്നിവരും സമിതിയിലുണ്ട്. ലോക്‌സഭയിലെ ബിജെപി അംഗം അപരാജിതസിംഗ് ആണ് ഏക വനിതാ അംഗം. രാജ്യസഭയിൽനിന്നുള്ള ഏഴുപേരും കമ്മിറ്റിയിൽ അംഗങ്ങളാണ്.

പാർലമെന്‍റിന്‍റെ മൂന്ന് സാമ്പത്തിക സ്റ്റാൻഡിംഗ് കമ്മിറ്റികളിലൊന്നാണ് പബ്ലിക് അക്കൗണ്ട്സ് കമ്മിറ്റി (പിഎസി). പാർലമെന്‍റ് അനുവദിച്ച ഫണ്ട് അംഗീകൃതപരിധിയിൽ സർക്കാർ ചെലവഴിച്ചുവെന്ന് ഉറപ്പാക്കുകയെന്നതാണു ദൗത്യം. സിഎജി ഓഡിറ്റ് റിപ്പോർട്ട് പാർലമെന്‍റിൽ അവതരിപ്പിച്ചതിനുശേഷം സമിതി പരിശോധിക്കും.