ജെജെപി, എഎപി, ഇന്ത്യൻ നാഷണൽ ലോക് ദൾ(ഐഎൻഎൽഡി), ബിഎസ്പി എന്നീ കക്ഷികൾ രംഗത്തുണ്ടെങ്കിലും മുഖ്യ പോരാട്ടം ബിജെപിയും കോൺഗ്രസും തമ്മിലാണ്.
ഐഎൻഎൽഡിയുമായി ബിഎസ്പി സഖ്യമുണ്ടാക്കിയിട്ടുണ്ട്. ലോക്സഭാ തെരഞ്ഞെടുപ്പിൽ കോൺഗ്രസ് സഖ്യത്തിൽ മത്സരിച്ച എഎപി നിയമസഭ തെരഞ്ഞെടുപ്പിൽ ഒറ്റയ്ക്കാണു പോരാടുന്നത്.
ലോക്സഭാ തെരഞ്ഞെടുപ്പിൽ ബിജെപിയും കോൺഗ്രസും അഞ്ചു സീറ്റുകളിൽ വീതം വിജയിച്ചു. പൂജ്യത്തിൽനിന്നാണ് കോൺഗ്രസ് സീറ്റ് അഞ്ചിലേക്കെത്തിയത്. ജാട്ട് മേഖലയിലാണ് കോൺഗ്രസ് മുന്നേറിയത്.
ലോക്സഭാ തെരഞ്ഞെടുപ്പിൽ 46 നിയമസഭാ സീറ്റുകളിൽ കോൺഗ്രസും 44 ഇടത്ത് ബിജെപിയും ലീഡ് നേടിയ ഇത്തവണയും ജാട്ട് വോട്ട് തങ്ങളുടെ പെട്ടിയിലെന്നു കോൺഗ്രസ് ഉറപ്പിക്കുന്നു. ജാട്ട്ഇതര വോട്ടുകളിലാണ് ബിജെപി കണ്ണുവയ്ക്കുന്നത്.
കർഷകപ്രക്ഷോഭവും അഗ്നിപഥ് പദ്ധതിയും തൊഴിലില്ലായ്മയും കോൺഗ്രസ് പ്രചാരണായുധമാക്കുന്നു.
90 അംഗ നിയമസഭയിൽ ബിജെപിക്ക് 41 അംഗങ്ങളുണ്ട്. കോൺഗ്രസ്-29, ജെജെപി-10, സ്വതന്ത്രർ-5, ഐഎൻഎൽഡി-1 ഹരിയാന ലോക്ഹിത് പാർട്ടി-1 എന്നിങ്ങനെയാണു മറ്റു പാർട്ടികളുടെ അംഗബലം. മൂന്നു സീറ്റുകൾ ഒഴിഞ്ഞുകിടക്കുകയാണ്.