ൻ എന്ന നിലയിൽ എനിക്ക് കിട്ടാവുന്ന ഏറ്റവും വലിയ അംഗീകാരമാണിത്’’- ഹരീഷ് പറഞ്ഞു.
തെയ്യത്തെ ആസ്പദമാക്കി ചാവേർ എന്ന സിനിമയിൽ എഴുതിയ ചെന്താമരപ്പൂവിൻ ചന്തം കണക്കുള്ള ചെന്തളിർപൂമേനി.... എന്ന് തുടങ്ങുന്ന പാട്ടാണ് ഹരീഷിനെ അവാർഡിന് അർഹനാക്കിയത്. തന്റെ സുഹൃത്തായ പ്രവീൺ വഴിയാണ് ചാവേർ എന്ന സിനിമയിലെ സംഗീത സംവിധായകൻ ജസ്റ്റിൻ വർഗീസിനെ പരിചയപ്പെടുന്നത്.
മലബാറിലെ തെയ്യം കലാരൂപത്തെ അടിസ്ഥാനമാക്കി ഒരു പാട്ട് വേണമെന്നായിരുന്നു ആവശ്യം. ഈ പാട്ട് സിനിമയ്ക്ക് അത്രയും പ്രധാനപ്പെട്ടതാണെന്നും അതുകൊണ്ടു വരികൾ അടിപൊളിയാകണമെന്നും പറഞ്ഞിരുന്നു.
തെയ്യം എന്നത് നമ്മൾക്ക് ഒരു വികാരമായതുകൊണ്ടുതന്നെ ഏറെ ഇഷ്ടത്തോടെയാണ് വരികൾ രചിച്ചത്. ദിവസങ്ങളെടുത്താണ് പാട്ടിന്റെ രചന പൂർത്തീകരിച്ചത്. ഇതിനു മുന്പ് കനകം കാമിനി കലഹം, തേര്, നടികർ എന്നീ സിനിമകളിൽ പാട്ട് എഴുതിയിട്ടുണ്ട്. ചെറുപ്പം മുതൽ ഒത്തിരി പുസ്തകങ്ങൾ വായിക്കുമായിരുന്നു. അതോടൊപ്പം ചെറിയ രീതിയിൽ കവിതയെഴുത്തും ഉണ്ടായിരുന്നു.
നിലവിൽ സുജിൽ മാങ്ങാടിന്റെ പുതിയ സിനിമയുടെ പാട്ടിന്റെ പണിപ്പുരയിലാണ് ഹരീഷ്. പഴയങ്ങാടി വെങ്ങരയിലെ കോളിയാടൻ വീട്ടിൽ മോഹനൻ- രമണി ദന്പതികളുടെ മകനാണ്.
പരിശ്രമത്തിന്റെ 16 വർഷം, അംഗീകാരത്തിൽ അഭിമാനമെന്ന് ബ്ലെസി
തിരുവല്ല: പോരാട്ടങ്ങളുടെയും പ്രതീക്ഷയുടെയും 16 വർഷമാണ് ‘ആടുജീവിത’ത്തിനു വേണ്ടി സംവിധായകൻ ബ്ലെസി മാറ്റിവച്ചത്. ചലച്ചിത്ര ലോകത്ത് മുന്പും വ്യത്യസ്തതകളിലൂടെ അത്ഭുതങ്ങൾ തീർത്തിട്ടുള്ള സംവിധായകന് ഇതൊരു കാത്തിരിപ്പായിരുന്നില്ല. തന്റെ ആദ്യ ചലച്ചിത്രമായ ‘കാഴ്ച’ മുതൽ തിരുവല്ല സ്വദേശിയായ ബ്ലെസി തീർത്തത് മലയാള ചലച്ചിത്ര ലോകത്ത് അത്ഭുതങ്ങളെയാണ്. നവാഗത സംവിധായകനുള്ള അവാർഡ് ആ ചിത്രത്തിലൂടെ ബ്ലെസി സ്വന്തമാക്കി.
കഴിഞ്ഞ മാര്ച്ച് 28നാണ് ‘ആടുജീവിതം’ തിയറ്ററില് എത്തിയത്. പ്രതീക്ഷിച്ചതിലും അത്ഭുതകരമായ ദൃശ്യവിരുന്നൊരുക്കിയ ചിത്രം പ്രേക്ഷക, നിരൂപക പ്രശംസകള് ഒരുപോലെ നേടി. പൃഥ്വിരാജിന്റെ ട്രാന്സ്ഫോര്മേഷനുകള്ക്ക് വന് കൈയടിയും പ്രശംസയുമാണ് ലഭിച്ചത്. ബോക്സ് ഓഫീസിലടക്കം മികച്ച കളക്ഷന് നേടിയ ആടുജീവിതം 155.95 കോടിയാണ് ആഗോളതലത്തില് നേടിയത്.
54 -ാമത് സംസ്ഥാന ചലച്ചിത്ര അവാര്ഡില് ഒന്പത് പുരസ്കാരങ്ങള് ആടുജീവിതത്തിനു ലഭിച്ചപ്പോൾ സംവിധായകൻ ബ്ലെസിക്ക് അത് അഭിമാന നിമിഷമായി. കഥാകൃത്ത് ബെന്യാമിന്റെ നോവലിനെ ആസ്പദമാക്കി, ഒരു ചലച്ചിത്രം നിർമിക്കുകയെന്ന ലക്ഷ്യത്തിനു സംവിധായകന്റെ കഠിനാധ്വാനത്തിന് ലഭിച്ച അംഗീകാരമാണ് ഈ പുരസ്കാരങ്ങള്. ഏതു സിനിമയ്ക്കു പിന്നിലും വലിയ അധ്വാനമുണ്ടെന്നും ആടുജീവിതത്തിന്റെ കാര്യത്തില് അത് വളരെ വലുതായിരുന്നു എന്നുമാണ് പുരസ്കാര നേട്ടത്തില് പൃഥ്വിരാജ് പ്രതികരിച്ചത്.
അംഗീകാര നിറവില് അവാര്ഡുകള് വാരിക്കൂട്ടിയ ആടുജീവിതത്തിന്റെ ഏറെ വലച്ചതും പ്രതിസന്ധിയായതും കോവിഡ് കാലമായിരുന്നു. ചിത്രീകരണതത്തിന്റെ അവസാന ഭാഗങ്ങള് ശരിക്കും അതിജീവനത്തിന്റെയും പോരാട്ടത്തിന്റെയും അനുഭവങ്ങളായിരുന്നു. 80 ദിനരാത്രം. രാത്രിയുടെ ഏകാന്തതകള് പോലും ചില നിയോഗങ്ങളെ അനുഭവിച്ച് അറിയുകയായിരുന്നു ബ്ലസിയും കൂട്ടരും.
2020 മാര്ച്ച് 16നായിരുന്നു ജോര്ദാനില് ആടുജീവിതതത്തിന്റെ ചിത്രീകരണം ആരംഭിച്ചത്. മരുഭൂമിയില് നിന്നുള്ള നിര്ണായക രംഗങ്ങളാണ് വാദിറാമില് ചിത്രീകരിച്ചത്. 58 പേരുടെ ഇന്ത്യന് സംഘത്തിനൊപ്പം മുപ്പതോളം ജോര്ദാന് സ്വദേശികളും ചിത്രീകരണ സംഘത്തില് ഉണ്ടായിരുന്നു. ചിത്രത്തിന്റെ അറുപത് ശതമാനവും പൂര്ത്തിയായി. അതിനിടെയാണ് കോവിഡ് പ്രോട്ടോക്കോള് വെല്ലുവിളിയായത്. ചിത്രീകരണം ഇടയ്ക്ക് മുടങ്ങി. എന്ത് ചെയ്യണമെന്ന് അറിയാത്ത അവസ്ഥ. ലോകം ഇതേവരെ കാണാത്ത മഹാമാരിയെ മറുനാട്ടില് നേരിടുകയെന്നത് ഏറെ ശ്രമകരമായിരുന്നു. ത്യാഗങ്ങള് സഹിച്ച് സിനിമ 60 ശതമാനം പൂര്ത്തിയായപ്പോഴാണ് കോവിഡ് എത്തിയത്. കഥാ സന്ദര്ഭത്തിന്റെ എല്ലാ വൈരുധ്യങ്ങളും ഇതോടെ അനുഭവിച്ചറിയാന് തുടങ്ങി. ജോര്ദാനിലെ ആദ്യദിനങ്ങളില് ആശങ്കയായിരുന്നെങ്കിലും പിന്നീട് അത് ആനന്ദമായി.
മോഹൻദാസിന്റെ ആത്മസമർപ്പണത്തിന് സംസ്ഥാന അംഗീകാരം
ജിമ്മി ജോർജ് പാലക്കാട്: കേരളജനത നേരിട്ട മഹാദുരന്തമായ 2018ലെ പ്രളയത്തിന്റെ ഭീകരത ഒട്ടുംചോരാതെ അഭ്രപാളിയിലേക്ക് ആവാഹിച്ച കലാവിരുതിനു സംസ്ഥാന സർക്കാർ പുരസ്കാരം. 2023ലെ മികച്ച കലാസംവിധായകനുള്ള അവാർഡ് ‘2018 എവരിവണ് ഈസ് എ ഹീറോ’ എന്ന ചിത്രത്തിലൂടെ മോഹൻദാസ് നേടിയപ്പോൾ അത് ആത്മസമർപ്പണത്തിനും കഠിനപ്രയത്നത്തിനുമുള്ള അംഗീകാരമായി.
തിയറ്ററുകളിൽ വലിയ ചലനം സൃഷ്ടിച്ച ചിത്രം 2024ലെ ഓസ്കർ പുരസ്കാരത്തിനുള്ള പട്ടികയിലേക്ക് ഇന്ത്യയുടെ എൻട്രികളിലൊന്നായി ഇടംപിടിച്ചിരുന്നു. സിനിമ വൻവിജയം കൈവരിച്ചപ്പോൾ ഏറെ ശ്രദ്ധിക്കപ്പെട്ട ഒന്നായിരുന്നു സിനിമയുടെ പശ്ചാത്തലം.
സിനിമയിലെ ഡാമും കടലും ഹെലികോപ്റ്ററുംവരെ സെറ്റിട്ടാണു ചിത്രീകരിച്ചത്. രണ്ടു വർഷം കഠിനാധ്വാനം ചെയ്താണ് ഈ ചിത്രത്തിന്റെ സെറ്റൊരുക്കിയത്. 100 ദിവസം ഷൂട്ട് ചെയ്താണ് ചിത്രം പൂർത്തിയാക്കിയത്.
2018 എന്ന ചിത്രത്തിന്റെ കരുത്തും വിജയത്തിലേക്കു നയിച്ച പ്രധാന ഘടകങ്ങളിലൊന്നും അതിന്റെ സെറ്റായിരുന്നു. കരിയറിൽ ഇതുവരെ നേരിടാത്ത വെല്ലുവിളികളും ത്രില്ലിംഗ് എക്സീപിരിയൻസുമൊക്കെ സമ്മാനിച്ച ചിത്രമെന്ന നിലയിലാണ് മോഹൻദാസ് 2018നെ കാണുന്നത്. ആ അധ്വാനത്തിനുള്ള പ്രതിഫലമായാണ് ഈ പുരസ്കാരത്തെ കാണുന്നതെന്ന് മോഹൻദാസ് പറഞ്ഞു.
പാലക്കാട് മണ്ണാർക്കാട് മുക്കണ്ണം സ്വദേശയായ മോഹൻദാസിന് എല്ലാ പിന്തുണയുമായി ഭാര്യ രജിതയും വിദ്യാർഥികളായ മക്കൾ ഐശ്വര്യ ദാസും അഭിഷേക് ദാസുമുണ്ട്.
സന്തോഷം വാക്കുകൾപ്പുറം: ബീന ആർ. ചന്ദ്രൻ തൃശൂർ: സന്തോഷം വാക്കുകൾക്കപ്പുറമാണെന്നും ഉർവശിക്കൊപ്പം മികച്ച നടിക്കുള്ള പുരസ്കാരം ലഭിച്ചതിന്റെ സന്തോഷം പറഞ്ഞറിയിക്കാനാകാത്തതാണെന്നും ബീന ആർ. ചന്ദ്രൻ. സംസ്ഥാന സിനിമാ അവാർഡിൽ മികച്ച നടിക്കുള്ള പുരസ്കാരം പങ്കിട്ട ബീന മാധ്യമങ്ങളോടു പ്രതികരിക്കുകയായിരുന്നു.
നാടകരംഗത്തിലൂടെ കടന്നുവന്ന ബീന തൃത്താല പരുതൂർ സിഇയുപി സ്കൂളിലെ അധ്യാപികയാണ്.
പട്ടാമ്പി കൊടല്ലൂർ സ്വദേശി ഫാസിൽ റസാഖ് സംവിധാനം ചെയ്ത ‘തടവ്’ എന്ന ചിത്രത്തിലൂടെയാണു ബീന മികച്ച നടിക്കുളള പുരസ്കാരം നേടിയത്.