കരിങ്കൊടി പ്രതിഷേധം അപകീര്‍ത്തികരമോ നിയമവിരുദ്ധമോ അല്ലെന്നു ഹൈക്കോടതി
Friday, November 22, 2024 2:48 AM IST
കൊച്ചി: കരിങ്കൊടി പ്രതിഷേധം അപകീര്‍ത്തികരമോ നിയമവിരുദ്ധമോ അല്ലെന്നു ഹൈക്കോടതി. ഏതു നിറത്തിലുള്ള കൊടി ഉപയോഗിച്ചുള്ള പ്രതിഷേധവും നിയമവിരുദ്ധമല്ല.
കൊടിവീശല്‍ ചിലപ്പോള്‍ പിന്തുണച്ചാകാം, മറ്റുചിലപ്പോള്‍ പ്രതിഷേധിച്ചുമാകാം. സാഹചര്യത്തെയും കാഴ്ചപ്പാടിനെയും ബന്ധപ്പെടുത്തി ഇതില്‍ മാറ്റമുണ്ടാകാമെന്നും ജസ്റ്റീസ് ബെച്ചു കുര്യന്‍ തോമസ് വ്യക്തമാക്കി.
ചിഹ്നങ്ങളോ പ്രകടമായ രൂപങ്ങളോ അപകീര്‍ത്തിപ്പെടുത്തലിന്‍റെ ഭാഗമായി പറയാമെങ്കിലും കരിങ്കൊടിവീശലിനെ അങ്ങനെ കാണാനാകില്ലെന്നും കോടതി പറഞ്ഞു. 2017ല്‍ പറവൂരില്‍ മുഖ്യമന്ത്രിക്കെതിരേ കരിങ്കൊടി വീശിയ മൂന്ന് കോണ്‍ഗ്രസ് പ്രവര്‍ത്തകര്‍ക്കെതിരായ കേസ് റദ്ദാക്കിയാണു കോടതിയുടെ നിരീക്ഷണം.
പറവൂര്‍ പോലീസ് രജിസ്റ്റര്‍ ചെയ്ത കേസില്‍ പറവൂര്‍ ഒന്നാം ക്ലാസ് മജിസ്‌ട്രേറ്റ് കോടതിയിലുള്ള തുടര്‍നടപടികള്‍ റദ്ദാക്കണമെന്നായിരുന്നു ഹര്‍ജിക്കാരായ സിമില്‍, ഫിജോ, സുമേഷ് ദയാനന്ദന്‍ എന്നിവരുടെ ആവശ്യം.
ജനാധിപത്യബോധത്തിന്‍റെ ബാഹ്യപ്രകടനങ്ങള്‍ എന്നനിലയില്‍ ഫലപ്രദമായ ജനാധിപത്യത്തിന് പ്രതിഷേധങ്ങള്‍ അനിവാര്യമാണെന്ന് കോടതി ചൂണ്ടിക്കാട്ടി. സമാധാനപരമായ പ്രതിഷേധങ്ങള്‍ ഭരണനിര്‍വഹണത്തെ ദുര്‍ബലപ്പെടുത്തുകയല്ല; മറിച്ച്, ശക്തിപ്പെടുത്തുകയാണു ചെയ്യുന്നത്.
ഹര്‍ജിക്കാര്‍ക്കെതിരായ കേസില്‍ ഹൈക്കോടതി ഉത്തരവിന്‍റെ ലംഘനം നടത്തിയെന്നതിനു പരാതി നല്‍കാന്‍ ചുമതലപ്പെട്ടയാളല്ല പോലീസ് സബ് ഇന്‍സ്‌പെക്ടര്‍ എന്നതിനാല്‍ ഇത്തരമൊരു പരാതിയില്‍ കുറ്റം ചുമത്തിയ നടപടി നിലനില്‍ക്കില്ലെന്ന് കോടതി ചൂണ്ടിക്കാട്ടി.
പോലീസ് റിപ്പോര്‍ട്ടിന്‍റെ അടിസ്ഥാനത്തില്‍ അപകീര്‍ത്തിക്കേസ് നിലനില്‍ക്കില്ല
അപകീര്‍ത്തി നേരിട്ട വ്യക്തി നല്‍കിയാലല്ലാതെ പോലീസ് റിപ്പോര്‍ട്ടിന്‍റെ അടിസ്ഥാനത്തില്‍ അപകീര്‍ത്തിക്കേസും നിലനില്‍ക്കില്ലെന്നു ഹൈക്കോടതി വ്യക്തമാക്കി. ഇതില്‍ വിചാരണ നടന്നാലും നിയമപരമായ സാധുതയില്ല. മാത്രമല്ല, അപകീര്‍ത്തി എന്തെന്നു വ്യക്തമായി അന്തിമറിപ്പോര്‍ട്ടില്‍ പറഞ്ഞിട്ടുമില്ല.
ആര്‍ക്കെങ്കിലും തടസമുണ്ടാകാനോ പരിക്കേല്‍ക്കാനോ കാരണമായാല്‍ മാത്രമേ പൊതുവഴിയില്‍ തടസമുണ്ടാക്കല്‍, അപായമുണ്ടാക്കാന്‍ ശ്രമം തുടങ്ങിയ കുറ്റങ്ങള്‍ നിലനില്‍ക്കൂ.
പോലീസ് സമരക്കാരെ തടഞ്ഞതിനാല്‍ മുഖ്യമന്ത്രിക്കും വാഹനവ്യൂഹത്തിനും പ്രതിഷേധത്തിന്‍റെ പേരില്‍ തടസമുണ്ടായിട്ടില്ല. വ്യക്തമായ ഉദ്ദേശ്യത്തോടെ പൊതുസേവകന്‍റെ കര്‍ത്തവ്യത്തെ തടസപ്പെടുത്തിയാല്‍ മാത്രമേ ഈ കുറ്റകൃത്യവും നിലനില്‍ക്കൂ.
കരിങ്കൊടി കാണിക്കാനുള്ള ശ്രമത്തെ തടയാന്‍ ശ്രമിച്ചപ്പോള്‍ സ്വാഭാവികമായി പോലീസിനെ തള്ളിമാറ്റുക മാത്രമാണ് ഉണ്ടായിട്ടുള്ളത്. കര്‍ത്തവ്യനിര്‍വഹണം തടസപ്പെടുകയോ ആര്‍ക്കെങ്കിലും പരിക്കേല്‍ക്കുകയോ ചെയ്തിട്ടില്ലെന്നും കോടതി ചൂണ്ടിക്കാട്ടി.