മകനു കരൾ നൽകി റീന; കൈകോർത്ത് സുമനസുകളും
Thursday, November 21, 2024 1:52 AM IST
കൊച്ചി: പ്ലസ്ടു വിദ്യാർഥിയായ മകൻ അലൻ രോഗം മാറി സാധാരണ ജീവിതത്തിലേക്കു മടങ്ങിയെത്തണമെന്ന പ്രാർഥന അമ്മ റീന മുടക്കിയിട്ടില്ല. അതുകൊണ്ടുതന്നെയാകണം, അവനുവേണ്ടി തന്‍റെ കരൾ പകുത്തുനൽകാൻ ആ അമ്മ അധികമൊന്നും ആലോചിച്ചില്ല. അമ്മയുടെ കരളിൽ അലന് രണ്ടാം ജന്മം.
മഞ്ഞപ്പിത്തം മൂർഛിച്ച് അബോധാവസ്ഥയിലായ മകൻ അലനുമായി മുണ്ടക്കയം ചിറ്റടി സ്വദേശി ഷൈൻ ആഴ്ചകൾക്കു മുന്പാണ് ആലുവ രാജഗിരി ആശുപത്രിയിൽ എത്തിയത്. വിദഗ്ധ പരിശോധനയിൽ കരളിന്‍റെ പ്രവർത്തനം നിലച്ച മട്ടിലാണെന്നും കരൾ മാറ്റിവയ്ക്കുകയല്ലാതെ ജീവൻ നിലനിർത്താൻ മറ്റു മാർഗമില്ലെന്നും ഡോക്ടർമാർ നിർദേശിച്ചു.
ട്രാൻസ്പ്ലാന്‍റ് സർജൻ ഡോ. ബിജു ചന്ദ്രൻ, കരൾ ചികിത്സാ വിദഗ്ധരായ ഡോ. ജോൺ മേനാച്ചേരി, ഡോ. സിറിയക് എബി ഫിലിപ്സ് എന്നിവരുടെ നേതൃത്വത്തിലായിരുന്നു പരിശോധന. എന്തു ചെയ്യണമെന്നറിയാതെ നിന്ന സമയത്താണ് അമ്മ റീനയുടെ കരൾ അലന് അനുയോജ്യമാണെന്ന ആശ്വാസവാർത്തയെത്തിയത്. പിറ്റേന്ന് ഞായറാഴ്ച ആയിരുന്നിട്ടും അടിയന്തരമായി കരൾ മാറ്റിവയ്ക്കുന്നതിനു വേണ്ട തുടർക്രമീകരണങ്ങൾ വേഗത്തിൽ ആരംഭിച്ചു.
ട്രാൻസ്പ്ലാന്‍റ് കോ-ഓർഡിനേറ്റിംഗ് വിഭാഗം നടപടികൾ ഏകോപിപ്പിച്ചു. രാജഗിരി അവയവമാറ്റ കമ്മിറ്റി ചേർന്ന് ദാതാവിനും സ്വീകർത്താവിനും ശസ്ത്രക്രിയ അനുമതി നൽകി. പിന്നാലെ എല്ലാ നിയമനടപടികളും പൂർത്തിയാക്കി 24 മണിക്കൂറിനുളളിൽ ശസ്ത്രക്രിയ ആരംഭിച്ചു
ഡോ. ബിജു ചന്ദ്രന്‍റെ നേതൃത്വത്തിലായിരുന്നു ശസ്ത്രക്രിയ. ഡോ. ജോസഫ് ജോർജ്, ഡോ. ഗസ്നഫർ ഹുസൈൻ, ക്രിട്ടിക്കൽ കെയർ സ്പെഷലിസ്റ്റ് ഡോ. മീനാക്ഷി വിജയകുമാർ, അനസ്തേഷ്യ വിഭാഗത്തിലെ ഡോ. സി.വി. വിനീത്, ഡോ. വി. അമൽദേവ്, ഡോ. റോബിൻ എന്നിവർ ശസ്ത്രക്രിയയിൽ പങ്കാളികളായി. ആശുപത്രി അവധി ദിനമായിട്ടും ഓപ്പറേഷൻ തിയറ്ററിലെ നഴ്സുമാരും ടെക്നീഷൻമാരും ഡ്യൂട്ടിക്കെത്തി.
മുണ്ടക്കയം ചിറ്റടി ഗ്രാമവും വെളിച്ചിയാനി ഇടവകയും അലൻ പഠിക്കുന്ന എടക്കുന്നം സർക്കാർ സ്കൂളും റീന ജോലി ചെയ്യുന്ന മലനാട് ഡെവലപ്മെന്‍റ് സൊസൈറ്റിയുമാണ് സാമ്പത്തിക പിന്തുണയുമായി കൂടെ നിന്നത്.
ആശുപത്രി വിട്ട അലനും അമ്മ റീനയും സാധാരണ ജീവിതത്തിലേക്ക് മടങ്ങുകയാണ്. ചികിത്സയുടെ ഭാഗമായി തടസപ്പെട്ട പഠനം പൂർവാധികം ആത്മവിശ്വാസത്തോടെ പൂർത്തിയാക്കാനുള്ള ശ്രമത്തിലാണ് അലൻ.