മാർ ജോര്‍ജ് കൂവക്കാട്ടിന്‍റെ മെത്രാഭിഷേകം 24ന്
Thursday, November 21, 2024 1:52 AM IST
കോട്ടയം: കര്‍ദിനാള്‍ പദവിയിലേക്ക് നിയോഗിക്കപ്പെട്ട മാർ ജോര്‍ജ് ജേക്കബ് കൂവക്കാട്ടിന്‍റെ മെത്രാഭിഷേകം 24ന് ഉച്ചകഴിഞ്ഞ് രണ്ടിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയില്‍ നടക്കും. ബിഷപ്പുമാരും വൈദികരും പ്രദക്ഷിണമായി കൊച്ചുപള്ളിയില്‍ നിന്ന് മെത്രാപ്പോലീത്തന്‍പള്ളിയില്‍ എത്തിച്ചേരുമ്പോള്‍ ആര്‍ച്ച്ബിഷപ് മാര്‍ തോമസ് തറയില്‍ സ്വാഗതമാശംസിക്കും.
തിരുക്കര്‍മങ്ങളില്‍ സീറോമലബാര്‍സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ മുഖ്യ കാര്‍മികനായിരിക്കും. ആര്‍ച്ച്ബിഷപ് മാര്‍ തോമസ് തറയില്‍, വത്തിക്കാന്‍ സെക്രട്ടേറിയറ്റ് ഓഫ് ദ സ്റ്റേറ്റ് പ്രതിനിധി ആര്‍ച്ച്ബിഷപ് ഡോ. എഡ്ഗര്‍ പേഞ്ഞ പാര്‍റ എന്നിവര്‍ സഹകാര്‍മികരായിരിക്കും.
ആര്‍ച്ച്ബിഷപ് മാര്‍ ജോര്‍ജ് കൂവക്കാട്ടിന്‍റെ കാര്‍മികത്വത്തില്‍ അര്‍പ്പിക്കപ്പെടുന്ന വിശുദ്ധ കുര്‍ബാനമധ്യേ മലങ്കര കത്തോലിക്കാ സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്ക ബാവ വചനസന്ദേശം നല്‍കും. അപ്പസ്‌തോലിക് നുണ്ഷ്യോ ആര്‍ച്ച്ബിഷപ് ലെയോപോള്‍ദോ ജിറെല്ലി സന്ദേശം നല്‍കും.
കര്‍ദിനാള്‍ മാര്‍ ജോര്‍ജ് ആലഞ്ചേരി, ആര്‍ച്ച്ബിഷപ് ഡോ. എഡ്ഗര്‍ പേഞ്ഞ പാര്‍റ, ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ തോമസ് പാടിയത്ത്, ചെത്തിപ്പുഴ തിരുഹൃദയപള്ളി വികാരിയും മാര്‍ ജോര്‍ജ് കൂവക്കാട്ടിന്‍റെ മാതൃസഹോദരനുമായ ഫാ. തോമസ് കല്ലുകളം സിഎംഐ എന്നിവര്‍ ആശംസകളര്‍പ്പിക്കും.
ഇന്ത്യയിലും വിദേശത്തുനിന്നുമുള്ള കര്‍ദിനാൾമാർ, മെത്രാന്‍മാര്‍, രാഷ്‌ട്രീയനേതാക്കള്‍, വിവിധ ഇടവകകളില്‍നിന്നുള്ള വൈദികര്‍, സന്യസ്തര്‍, അല്മായര്‍ എന്നിവരടക്കം നാലായിരത്തിലധികം പ്രതിനിധികളും പങ്കെടുക്കും. ഒരുക്കങ്ങള്‍ക്കായി മുഖ്യ വികാരി ജനറാള്‍ മോണ്‍. ആന്‍റണി ഏത്തക്കാട് ജനറല്‍ കണ്‍വീനറായും ഫാ. തോമസ് കറുകക്കളം, ഫാ. സെബാസ്റ്റ്യന്‍ ചാമക്കാല എന്നിവര്‍ കണ്‍വീന‌ർമാരായും കമ്മിറ്റികള്‍ പ്രവര്‍ത്തിക്കുന്നു.
പത്രസമ്മേളനത്തില്‍ വികാരി ജനറാള്‍ മോണ്‍. ആന്‍റണി ഏത്തയ്ക്കാട്ട്, മെത്രാപ്പോലീത്തന്‍ പള്ളി വികാരി ഫാ. ജോസ് കൊച്ചുപറമ്പില്‍, പിആര്‍ഒ ജോജി ചിറയില്‍, ജാഗ്രതാ സമിതി ഡയറക്‌ടര്‍ ഫാ. ജെയിംസ് കൊക്കാവയലില്‍, ഫാ. ലിബിന്‍ തുണ്ടുകളത്തില്‍, ജോമി ജോസഫ് കാവാലംപുതുപ്പറമ്പില്‍ എന്നിവര്‍ പങ്കെടുത്തു.
ചങ്ങനാശേരിയില്‍ സ്വീകരണം
കര്‍ദിനാളായി സ്ഥാനമേല്‍ക്കുന്ന മാര്‍ ജോര്‍ജ് കൂവക്കാട്ടിന് മാതൃരൂപതയായ ചങ്ങനാശേരി അതിരൂപതയുടെ സ്വീകരണം ഡിസംബര്‍ 21 ന് ഉച്ചകഴിഞ്ഞ് മൂന്നിന് എസ്ബി കോളജിലെ മാര്‍ കാവുകാട്ട് ഹാളില്‍ നടക്കും. കേന്ദ്രമന്ത്രിമാര്‍, സംസ്ഥാന മന്ത്രിമാര്‍, കര്‍ദിനാള്‍മാര്‍, ബിഷപ്പുമാര്‍, ജനപ്രതിനിധികള്‍ എന്നിവര്‍ പങ്കെടുക്കും.
കര്‍ദിനാള്‍ സ്ഥാനാരോഹണം വത്തിക്കാനില്‍
മാർ ജോര്‍ജ് കൂവക്കാട്ടിന്‍റെ കര്‍ദിനാളായുള്ള സ്ഥാനാരോഹണം ഡിസംബര്‍ ഏഴിന് ഇന്ത്യന്‍ സമയം രാത്രി ഒമ്പതിന് വത്തിക്കാനിലെ സെന്‍റ് പീറ്റേഴ്‌സ് ബസിലിക്കയില്‍ നടക്കും. ഫ്രാന്‍സിസ് മാര്‍പാപ്പ മാര്‍ ജോര്‍ജ് കൂവക്കാട്ടിനെയും വിവിധ രാജ്യങ്ങളില്‍ നിന്നുള്ള ഇരുപതു പേരെയും കര്‍ദിനാൾമാരായി നിയമിക്കും.
മാര്‍പാപ്പയുടെ കാര്‍മികത്വത്തിലാണ് തിരുക്കര്‍മങ്ങള്‍. തുടര്‍ന്ന് നവ കര്‍ദിനാള്‍മാര്‍ ഫ്രാന്‍സിസ് മാര്‍പാപ്പയെ വത്തിക്കാന്‍ കൊട്ടാരത്തില്‍ സന്ദര്‍ശിച്ച് ആശീര്‍വാദം വാങ്ങും.
ഡിസംബര്‍ എട്ടിന് ഇന്ത്യന്‍ സമയം ഉച്ചയ്ക്ക് ഒന്നിന് നവകര്‍ദിനാള്‍മാര്‍ ഫ്രാന്‍സിസ് മാര്‍പാപ്പയോടൊത്ത് സെന്‍റ് പീറ്റേഴ്‌സ് ബസിലിക്കയില്‍ വിശുദ്ധ കുര്‍ബാന അര്‍പ്പിക്കും.