ഹേമ കമ്മിറ്റി: പുരോഗതി റിപ്പോര്‍ട്ട് സമര്‍പ്പിച്ചു
Friday, November 22, 2024 2:48 AM IST
കൊച്ചി: ഹേമ കമ്മിറ്റി റിപ്പോര്‍ട്ടിനെത്തുടര്‍ന്ന് രജിസ്റ്റര്‍ ചെയ്ത കേസിലെ അന്വേഷണപുരോഗതി അടങ്ങുന്ന സമഗ്ര റിപ്പോർട്ട് ഹൈക്കോടതിയില്‍ സമര്‍പ്പിച്ചു.
അന്വേഷണത്തിന് നേതൃത്വം നല്‍കുന്ന എഐജി പൂങ്കുഴലിയടക്കം ഇന്നലെ കോടതിയില്‍ ഹാജരായിരുന്നു. സിനിമയില്‍ വനിതകളുടെ പെരുമാറ്റച്ചട്ടം കൊണ്ടുവരണമെന്നാവശ്യപ്പെട്ട് വിമന്‍ ഇന്‍ സിനിമ കളക്ടീവ് സമര്‍പ്പിച്ച ഉപഹര്‍ജി ഹൈക്കോടതി ഫയലില്‍ സ്വീകരിച്ചു. സര്‍ക്കാരിന്‍റെ വിശദീകരണം തേടി.
സിനിമയിലെ എല്ലാ തൊഴിലാളികള്‍ക്കും കരാര്‍ ബാധകമാക്കണം, കരാര്‍ലംഘനം റിപ്പോര്‍ട്ട് ചെയ്യാന്‍ സംവിധാനമൊരുക്കണം തുടങ്ങിയ നിര്‍ദേശങ്ങള്‍ ഹര്‍ജിയിലുണ്ട്. സര്‍ക്കാര്‍ നിയമനിര്‍മാണം നടത്തുന്നതുവരെ ഇടക്കാല ഉത്തരവിലൂടെ പെരുമാറ്റച്ചട്ടം ബാധകമാക്കണമെന്നും ഹര്‍ജിയില്‍ ആവശ്യപ്പെട്ടു.
ഹര്‍ജികള്‍ പരിഗണിക്കുന്ന ജസ്റ്റീസുമാരായ എ.കെ. ജയശങ്കരന്‍ നമ്പ്യാര്‍, സി.എസ്. സുധ എന്നിവരുള്‍പ്പെട്ട പ്രത്യേക ബെഞ്ച് എതിര്‍കക്ഷികളില്‍നിന്നു വിശദീകരണം തേടി.