ജിന്‍സന്‍ ആന്‍റോ ചാള്‍സിനു കോട്ടയം പൗരാവലി സ്വീകരണം നൽകി
1509076
Tuesday, January 28, 2025 11:47 PM IST
കോട്ടയം: ജിന്‍സന്‍ ആന്‍റോ ചാള്‍സിന്‍റെ ഓസ്‌ട്രേലിയയിലെ മന്ത്രിപദവി മലയാളിക്ക് അഭിമാനമെന്ന് ഗോവ ഗവര്‍ണര്‍ പി.എസ്. ശ്രീധരന്‍പിള്ള. ഓസ്‌ട്രേലിയയിലെ നോര്ത്തേണ് ടെറിട്ടറിയിലെ മന്ത്രി ജിന്‍സണ്‍ ആന്‍റോ ചാള്‍സിനു കോട്ടയം പൗരാവലി നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു ഗവര്‍ണര്‍ ശ്രീധരന്‍പിള്ള.
ലോകത്തിന്‍റെ ഏതു കോണിലുമുള്ള മലയാളികള്‍ അവരുടെ കഠിനാധ്വാനത്തിലാണ് വിജയങ്ങള്‍ കൈവരിക്കുന്നത്. നഴ്‌സിംഗ് ജോലിക്കായി ഓസ്‌ട്രേലിയയില്‍ എത്തിയ ജിന്‍സണ്‍ സ്വന്തം കഠിനാധ്വാനത്തിലാണ് ഉന്നത പദവിയിലെത്തിയിരിക്കുന്നത്. ഏതു ജോലിയും ഏറ്റെടുത്താല്‍ മലയാളി അതു പൂര്‍ണ ഉത്തരവാദിത്വത്തോടെ വിജയകരമായി നിര്‍വഹിക്കുമെന്നും ഗവര്‍ണര്‍ പറഞ്ഞു.
തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. മാണി സി. കാപ്പന്‍ എംഎല്‍എ, ജോബ് മൈക്കിള്‍ എംഎല്‍എ, കെ. സുരേഷ് കുറുപ്പ്, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, സിഎംഐ കോട്ടയം സെന്‍റ് ജോസഫ്സ് പ്രൊവിന്സ് പ്രൊവിന്ഷ്യാള് റവ.ഡോ. ഏബ്രഹാം വെട്ടിയാങ്കല്‍ സിഎംഐ, കോട്ടയം നഗരസഭാ ചെയര്‍പേഴ്സണ്‍ ബിന്‍സി സെബാസ്റ്റ്യന്‍, ഓക്സിജന്‍ ഗ്രൂപ്പ് സിഇഒ ഷിജോ കെ. തോമസ്, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ സിഎംഐ, പ്രോഗ്രാം കോ ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിച്ചു.
കോട്ടയം പൗരാവലിയുടെ മംഗളപത്രം ഗവര്‍ണര്‍ പി.എസ്. ശ്രീധരന്‍പിള്ള ജിന്‍സണ്‍ ആന്‍റോ ചാള്‍സിനു സമ്മാനിച്ചു. കോട്ടയം സിറ്റിസണ്‍ ഫോറം, ദര്‍ശന സാംസ്‌കാരിക കേന്ദ്രം, ബിസിഎം കോളജ്, സീക്ക് അക്കാദമി, ഓക്സിജന്‍ ഗ്രൂപ്പ് എന്നിവയുടെ സംയുക്താഭിമുഖ്യത്തിലായിരുന്നു പൗര സ്വീകരണം.