നെൽക്കർഷകർ ആശങ്കയിൽ
1509074
Tuesday, January 28, 2025 11:47 PM IST
കോട്ടയം: അപ്പര്‍കുട്ടനാടന്‍ മേഖലയിലെ പാടശേഖരങ്ങളിലുള്ള തോടുകളിലെ വെള്ളത്തില്‍ ഓരുവെള്ളത്തിന്‍റെ അംശമുള്ളതു നെൽകൃഷിയെ പ്രതികൂലമായി ബാധിക്കുന്നു. കുമരകം കെവികെ യില്‍ നടത്തിയ പരിശോധനയിലാണ് ഓരുവെള്ളത്തിന്‍റെ അംശമുള്ളതായി കണ്ടെത്തിയിരിക്കുന്നത്.
വൈക്കം വെച്ചൂര്‍ മേഖലയിലുള്ള കല്ലുചിറ - വിലങ്ങുചിറ തോട്, മറ്റം തോട് എന്നിവിടങ്ങളിലെ ജലമാണ് കെവികെയില്‍ പരിശോധന നടത്തിയത്. കല്ലുചിറ - വിലങ്ങുചിറ തോട്ടിലെ വെള്ളത്തില്‍ ഉപ്പിന്‍റെ അളവ് (ഇസി) 3.30ds/m ആണ്. മറ്റം തോട്ടിലേത് 3.30 ds/m ആണ്. സാധാരണയായി ഉപ്പിന്‍റെ അളവ് രണ്ടിനു മുകളില്‍ പോകാന്‍ പാടില്ല. ഇത്തരത്തില്‍ ഉപ്പിന്‍റെ അളവ് കൂടുതലായാല്‍ നെൽകൃഷി നശിച്ചുപോകാനുള്ള സാധ്യത കൂടുതലാണ്.
തണ്ണീര്‍മുക്കം ബണ്ടിന്‍റെ ഷട്ടറുകള്‍ അടച്ചിട്ടും തോട്ടിലെ വെള്ളത്തില്‍ ഓരിന്‍റെ അംശമുള്ളതു ഷട്ടറിന്‍റെ അടിയില്‍ കല്ലുകള്‍ ഉണ്ടായിട്ടാണെന്നാണ് കര്‍ഷകരുടെ സംശയം.
വേലിയേറ്റവും വേലിയിറക്കവും ഇപ്പോഴും നടക്കുന്നതിനാല്‍ ഷട്ടര്‍ ഉയര്‍ത്തിയാല്‍ മാത്രമേ ഉപ്പുവെള്ളം തോടുകളിലേക്കു കയറുകയുള്ളൂ. ഇതാണ് ഷട്ടറിന്‍റെ അടിയില്‍ കല്ലുകള്‍ ഉണ്ടെന്നു സംശയിക്കാന്‌ കാരണം. ഈ രീതിയില്‍ മുന്നോട്ടുപോയാല്‍ പാടശേഖരങ്ങളില്‍ വെള്ളം ഇനി കയറ്റാന്‍ സാധിക്കാത്ത സ്ഥിതിയാണ്. ഇനിയുള്ള ദിവസങ്ങളില്‍ നടത്തുന്ന പരിശോധനയിലും തോട്ടിലെ വെള്ളത്തില്‍ പിഎച്ചിന്‍റെ അളവ് കുറഞ്ഞും ഇസിയുടെ അളവ് കൂടിയും വന്നാൽ വ്യാപകമായി കൃഷി നശിച്ചുപോകുന്നതിനു കാരണമായേക്കും.
തണ്ണീര്‍മുക്കം ബണ്ടിന്‍റെ ലീക്കേജ് ഉടനടി പരിഹരിക്കുക, ഓരുമുട്ട് ഇടുന്നതിനുള്ള മുട്ടുകള്‍ സ്ഥിരപ്പെടുത്തുക തുടങ്ങിയ കാര്യങ്ങള്‍ അധികൃതര്‍ ഇടപെട്ട് നടപ്പിലാക്കി അപ്പര്‍ കുട്ടനാടന്‍ മേഖലയിലെ നെല്‍കൃഷിയെയും കര്‍ഷകരെയും രക്ഷപ്പെടുത്തണമെന്ന് ആവശ്യം ശക്തമായിരിക്കുകയാണ്.