ജനങ്ങളുടെ ജീവനേക്കാൾ സർക്കാരിനു പ്രധാനം വന്യജീവി സംരക്ഷണം: തിരുവഞ്ചൂര്‍ രാധാകൃഷ്ണന്‍
1509071
Tuesday, January 28, 2025 11:47 PM IST
കോട്ടയം: ജനങ്ങളുടെ ജീവനും സ്വത്തും സംരക്ഷിക്കുന്നതിനേക്കാള്‍ വന്യജീവികളെ സംരക്ഷിക്കുന്നതിനാണ് ഇടതുസര്‍ക്കാര്‍ പ്രാധാന്യം നല്‍കുന്നതെന്ന് മുന്‍ വനംമന്ത്രി തിരുവഞ്ചൂര്‍ രാധാകൃഷ്ണന്‍ എംഎല്‍എ. വന്യജീവികളുടെ ആക്രമണംമൂലം മരണമുണ്ടായാല്‍ നഷ്ടപരിഹാരം നല്‍കുന്നതാണ് ആകെയുള്ള നടപടിയെന്ന നിലയിലേക്ക് സര്‍ക്കാര്‍ പോകുന്നത് ശരിയല്ല.
വനഭൂമിയുടെ അടുത്ത് താമസിക്കുന്നവര്‍ക്കു മാത്രമല്ല ദൂരെയുള്ളവര്‍ക്കും ഭീതിയില്ലാതെ ഉറങ്ങാന്‍ പറ്റാത്ത സാഹചര്യമാണുള്ളത്. വന്യമൃഗങ്ങൾക്കു കാട്ടിനുള്ളില്‍ത്തന്നെ ഭക്ഷണവും വെള്ളവും ലഭ്യമാക്കാന്‍ സര്‍ക്കാര്‍ നടപടി എടുക്കണം. ജനങ്ങള്‍ക്ക് സംരക്ഷണം നല്‍കുന്ന രീതിയില്‍ പുതിയ വനനിയമം കൊണ്ടുവരണം.
വന്യജീവി ആക്രമണത്തില്‍ മരിക്കുന്നവരുടെ ആശ്രിതർക്കു നല്‍കുന്ന നഷ്ടപരിഹാരത്തുക വര്‍ധിപ്പിക്കാന്‍ സര്‍ക്കാര്‍ തയാറാകണം.
കൃഷിനാശത്തിനും മതിയായ നഷ്ടപരിഹാരം നൽകണം. സംസ്ഥാന സര്‍ക്കാര്‍ കൊണ്ടുവന്ന വനനിയമ ഭേദഗതി കര്‍ഷകര്‍ക്ക് ദ്രോഹകരമായിട്ടുള്ളതിനാലാണു പ്രതിഷേധംമൂലം പിന്‍വലിക്കേണ്ടിവന്നത്. വന്യജീവികളെ നേരിടുന്നതിന് സംസ്ഥാനത്തിനുള്ള പരിമിതി മറികടക്കാന്‍ കൂട്ടായ നടപടി എടുക്കാന്‍ സര്‍ക്കാര്‍ തയാറാകണം. തമിഴ്‌നാട്, കര്‍ണാടക സര്‍ക്കാരുകളുമായി ചേർന്നുള്ള നടപടികള്‍ക്കു സര്‍ക്കാര്‍ തയാറാകണമെന്നും അദ്ദേഹം ആവശ്യപ്പെട്ടു. പത്രസമ്മേളനത്തില്‍ യുഡിഎഫ് ജില്ലാ കണ്‍വീനര്‍ ഫിൽസണ്‍ മാത്യൂസും പങ്കെടുത്തു.