വടവാതൂര്‍ സെമിനാരിയില്‍ അന്തര്‍ദേശീയ സുറിയാനി ദൈവശാസ്ത്ര സിമ്പോസിയം
1508780
Monday, January 27, 2025 11:59 PM IST
കോട്ടയം: വടവാതൂര്‍ സെന്‍റ് തോമസ് അപ്പസ്തോലിക് സെമിനാരിയും പൊന്തിഫിക്കല്‍ ഓറിയന്‍റല്‍ ഇന്‍സ്റ്റിറ്റ്യൂട്ടും സംയുക്തമായി 30, 31 ഫെബ്രുവരി ഒന്ന് തീയതികളില്‍ വടവാതൂര്‍ സെമിനാരിയില്‍ അന്തര്‍ദേശീയ സുറിയാനി ദൈവശാസ്ത്ര സിമ്പോസിയം നടത്തും.
സുറിയാനി പൈതൃകത്തിന്‍റെ നാനാവിധ മേഖലകളെയും സവിശേഷതകളെയും വിശദമായി അപഗ്രഥിച്ചു പഠിക്കുകയെന്ന ലക്ഷ്യത്തോടെ സംഘടിപ്പിക്കുന്ന സിമ്പോസിയത്തില്‍ അന്താരാഷ്‌ട്ര പ്രശസ്തരായ സുറിയാനി പണ്ഡിതര്‍ പ്രബന്ധങ്ങള്‍ അവതരിപ്പിക്കും. ബൈബിള്‍ പണ്ഡിതരും വിവിധ ദൈവശാസ്ത്ര വിഷയങ്ങളില്‍ പ്രാഗത്ഭ്യമുള്ളവരുമായ നിരവധിപ്പേര്‍ സുറിയാനി പൈതൃകത്തിന്‍റെ വെളിച്ചത്തില്‍ അവരുടെ കണ്ടെത്തലുകള്‍ അവതരിപ്പിക്കുന്നു എന്നതാണ് സിമ്പോസിയത്തിന്‍റെ മുഖ്യസവിശേഷത.
30നു രാവിലെ 10ന് സീറോ മലബാര്‍ സഭാ മേജര്‍ ആര്‍ച്ച്ബിഷപും പൊന്തിഫിക്കല്‍ ഓറിയന്‍റല്‍ ഇന്‍സ്റ്റിറ്റ്യൂട്ടിന്‍റെ ചാന്‍സലറുമായ മാര്‍ റാഫേല്‍ തട്ടില്‍ സിമ്പോസിയം ഉദ്ഘാടനം ചെയ്യും. സെമിനാരി കമ്മീഷന്‍ ചെയര്‍മാന്‍ ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും.
ഫെബ്രുവരി ഒന്നിന് എംജി യൂണിവേഴ്‌സിറ്റി വൈസ് ചാന്‍സലര്‍ സി.ടി. അരവിന്ദകുമാര്‍ സമാപന സന്ദേശം നല്‍കും. കേരളത്തിലെ വിവിധ ദൈവശാസ്ത്ര കേന്ദ്രങ്ങളില്‍നിന്നും ഇതര സ്ഥാപനങ്ങളില്‍നിന്നും പ്രതിനിധികള്‍ സിമ്പോസിയത്തില്‍ പങ്കുചേരും.
വിദേശ പ്രതിനിധികളും സിമ്പോസിയത്തില്‍ പങ്കെടുക്കും. സുറിയാനി പൈതൃകത്തോട് ബന്ധപ്പെട്ട കലാപരിപാടികളും അവതരിപ്പിക്കപ്പെടും. സിമ്പോസിയത്തില്‍ പങ്കുചേരാന്‍ ആഗ്രഹിക്കുന്നവര്‍ പൗരസ്ത്യ വിദ്യാപീഠത്തിന്‍റെ വെബ്‌സൈറ്റിലൂടെ പേരുകള്‍ രജിസ്റ്റര്‍ ചെയ്യണമെന്ന് സെമിനാരി റെക്ടര്‍ റവ.ഡോ. സ്‌കറിയ കന്യാകോണിലും പൊന്തിഫിക്കല്‍ ഓറിയന്‍റല്‍ ഇന്‍സ്റ്റിറ്റ്യൂട്ട് പ്രസിഡന്‍റ് റവ.ഡോ. പോളി മണിയാട്ടും അറിയിച്ചു.