അടുത്ത അധ്യയനവര്‍ഷത്തേക്കുള്ള പാഠപുസ്തകങ്ങള്‍ എത്തിത്തുടങ്ങി
1508779
Monday, January 27, 2025 11:59 PM IST
കോട്ടയം: മധ്യവേനല്‍ അവധിക്കു സ്‌കൂളുകള്‍ അടയ്ക്കും മുന്‍പേ അടുത്ത അധ്യയന വര്‍ഷത്തേക്കുള്ള പാഠപുസ്തകങ്ങള്‍ ജില്ലയില്‍ എത്തിത്തുടങ്ങി. ജില്ലയിലെ ബുക്ക് ഹബ്ബായി പ്രവര്‍ത്തിക്കുന്ന പുതുപ്പള്ളി സെന്‍റ് ജോര്‍ജ് സ്‌കൂളിലാണ് പാഠ പുസ്തകങ്ങള്‍ എത്തിയിരിക്കുന്നത്. ആദ്യഘട്ടത്തില്‍ വിവിധ വിഷയങ്ങളുടെ 76,493 പുസ്തകങ്ങളാണ് എത്തിയിരിക്കുന്നത്.
ജില്ലയില്‍ ഒന്നു മുതല്‍ 10-ാം ക്ലാസുവരെയുള്ള വിദ്യാര്‍ഥികള്‍ക്കായി 15 ലക്ഷത്തില്‍പ്പരം പുസ്തകങ്ങളാണ് വിതരണം ചെയ്യേണ്ടത്. ഇതിന്‍റെ ആദ്യഘട്ടമെന്ന നിലയിലാണ് പുസ്തകങ്ങള്‍ എത്തിച്ചിരിക്കുന്നത്.
തുടര്‍ന്നു വിവിധ ഘട്ടങ്ങളിലായി അടുത്ത അധ്യയന വര്‍ഷം ആരംഭിക്കുമ്പോഴേക്കും മുഴുവന്‍ പുസ്തകങ്ങളും എത്തിക്കാനാണ് അധികൃതര്‍ ലക്ഷ്യമിടുന്നത്. ജില്ലയിലെ 13 ഉപജില്ലകളുടെ കീഴിലുള്ള 250 സ്‌കൂള്‍ സൊസൈറ്റികള്‍ മുഖേനയാണ് പുസ്തകങ്ങള്‍ നല്കുന്നത്.
കേരള ബുക്സ് ആന്‍ഡ് പബ്ലിക്കേഷന്‍ സൊസൈറ്റിയില്‍ (കെബിപിഎസ്) നിന്നാണ് ജില്ലയിലെ ബുക് ഹബ്ബിലേക്ക് സ്വകാര്യ ഏജന്‍സി പുസ്തകങ്ങള്‍ എത്തിക്കുന്നത്. ഇതു കുടുംബശ്രീ ഏറ്റെടുത്ത് വേര്‍തിരിച്ച് എണ്ണം തിട്ടപ്പെടുത്തിയാണ് സ്‌കൂള്‍ സൊസൈറ്റിക്ക് കൈമാറുന്നത്. കുടുംബശ്രീയുടെ ഹബ്ബില്‍ എത്തിയിരിക്കുന്ന പുസ്തകങ്ങള്‍ സോഫ്റ്റ്‌വേര്‍ സംവിധാനത്തിലൂടെ സോര്‍ട്ട് ചെയ്യും.
ഓരോ സൊസൈറ്റിയും അവരുടെ ഇന്‍റന്‍റ് നമ്പര്‍ സോഫ്റ്റ്‌വേറില്‍ നല്‍കിയിട്ടുണ്ട്. ഈ ഇന്‍റന്‍റ് എടുത്ത് കുടുംബശ്രീ അംഗങ്ങള്‍ സോര്‍ട്ട് ചെയ്തും സ്ട്രാപ്പ് ചെയ്തും ബൈന്‍ഡ് ചെയ്തുമാണ് പുസ്തകങ്ങള്‍ സൊസൈറ്റിയിലേക്കു കൈമാറുന്നത്.
ഒരു സൂപ്പര്‍വൈസറുടെ നേതൃത്വത്തില്‍ 10 കുടുംബശ്രീ അംഗങ്ങളാണ് പുസതകങ്ങള്‍ തരംതിരിക്കുന്നത്.