ഈശോയുടെ വചനമനുസരിച്ചാണ് നാം ജീവിക്കേണ്ടത്‌: മാര്‍ ജോസഫ് കല്ലറങ്ങാട്ട്
1508762
Monday, January 27, 2025 10:51 PM IST
പാലാ: ഈശോയുടെ വചനം അനുസരിച്ച് ജീവിക്കുകയും ജീവിക്കുവാന്‍ ഇളംതലമുറയെ പരിശീലിപ്പിക്കുകയുമാണ് ഓരോ വിശ്വാസപരിശീലകന്‍റെയും കടമയെന്ന് മാര്‍ ജോസഫ് കല്ലറങ്ങാട്ട്. പാലാ രൂപത 2024-25 വിശ്വാസപരിശീലന വാര്‍ഷികയോഗം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്.
വിശ്വാസപരിശീലനകേന്ദ്രത്തില്‍ സേവനത്തിന്‍റെ 50 വര്‍ഷങ്ങള്‍ പൂര്‍ത്തിയാക്കുന്ന സിസ്റ്റര്‍ റെജീന ജോണ്‍ തെള്ളിയില്‍ എസ്എച്ചിനെയും 2024-25 വര്‍ഷത്തിലെ മികച്ച വിശ്വാസ പരിശീലകനായി തെരഞ്ഞെടുക്കപ്പെട്ട ഉരുളികുന്നം ഇടവകാംഗമായ സാബു ജോസഫ് മണിക്കൊമ്പേലിനെയും അനുമോദിച്ചു. ബെസ്റ്റ് സണ്‍ഡേസ്‌കൂള്‍ അവാര്‍ഡുകള്‍ നേടിയ സ്‌കൂളുകളെയും കലാമത്സരത്തില്‍ മികവ് പുലര്‍ത്തിയ അധ്യാപകരെയും കുട്ടികളെയും ട്രോഫികളും സര്‍ട്ടിഫിക്കറ്റുകളും കാഷ് അവാര്‍ഡുകളും നല്‍കി അനുമോദിച്ചു.
രൂപത വിശ്വാസപരിശീലനകേന്ദ്രം ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, സിഎംഎല്‍ സംസ്ഥാന ജനറല്‍ ഓര്‍ഗനൈസര്‍ തോമസ് അടപ്പുകല്ലുങ്കല്‍, സിസ്റ്റര്‍ ആന്‍സ് പൈകട എഫ്സിസി, സിസ്റ്റര്‍ റോസിലിന്‍ എസ്എച്ച്, ബ്രദര്‍ ബ്ലസന്‍ തുരുത്തേല്‍, ആല്‍ബിന്‍ ജോസ് ചൂണ്ടിയാനിപ്പുറത്ത്, ജോസഫ് മൈലാടൂര്‍ എന്നിവര്‍ നേതൃത്വം നല്‍കി.