തെങ്ങണയില്‍ അപകടപരന്പര
1480386
Tuesday, November 19, 2024 8:07 AM IST
ചങ്ങനാശേരി: വാഴൂര്‍ റോഡില്‍ തെങ്ങണ ജംഗ്ഷനില്‍ ടിപ്പര്‍ ലോറി നിയന്ത്രണംവിട്ട് ട്രാവലറിലും കാറിലും ഇടിച്ചശേഷം മൊബൈല് സാധനസാമഗ്രികള്‍ വില്‍ക്കുന്ന കടയിലേക്ക് ഇടിച്ചുകയറി.
ഇതിനിടയില്‍പ്പെട്ട ഇതര സംസ്ഥാന തൊഴിലാളികളായ മൂന്നുപേര്‍ക്കു പരിക്കേറ്റു. ഇന്നലെ രാവിലെ ഏഴിന് ട്രാഫിക് സിഗ്നല്‍ ഇല്ലാതിരുന്ന സമയത്താണ് അപകടം. ചങ്ങനാശേരി ഭാഗത്തുനിന്നു കറുകച്ചാല്‍ ഭാഗത്തേക്ക് വരികയായിരുന്ന ടിപ്പര്‍ ലോറി കോട്ടയം ഭാഗത്തുനിന്നെത്തിയ ട്രാവലറിന്‍റെ മുന്‍ വശത്ത് ഇടിച്ചശേഷം റോഡരികില്‍ പാര്‍ക്ക് ചെയ്തിരുന്ന കാറിലും ഇടിച്ചു. ടിപ്പര്‍ ഇടിച്ചുകയറിയ കടയുടെ മുന്പിൽ ജോലിക്ക് പോകാന്‍ വാഹനം കാത്തിരുന്ന ഇതരസംസ്ഥാന തൊഴിലാളികള്‍ക്കാണ് പരിക്കേറ്റത്.
അപകടത്തില്‍ ഇതരസംസ്ഥാന തൊഴിലാളികളായ യാസുദ്ദീന്‍, ഫഹദ് എന്നിവര്‍ക്കു ഗുരുതരമായും ട്രാവലറില്‍ യാത്ര ചെയ്ത രണ്ടുപേര്‍ക്കുമാണ് പരിക്കേറ്റത്.
തെങ്ങണ ജംഗ്ഷനില്‍ പ്രവര്‍ത്തിക്കുന്ന മൊബൈല്‍ഹട്ട് സ്ഥാപനത്തിലേക്കാണ് ടിപ്പര്‍ ഇടിച്ചുകയറിയത്. കടയ്ക്കും ഉടമ മാന്നില പുളിക്കശേരി ജയിംസിന്‍റെ കാറിനും നാശം സംഭവിച്ചിട്ടുണ്ട്. ഓടിക്കൂടിയ നാട്ടുകാര്‍ ചേര്‍ന്ന് പരിക്കേറ്റ ഇതര സംസ്ഥാന തൊഴിലാളികളെ ചങ്ങനാശേരിയിലെ ജനറല്‍ ആശുപത്രിയിലും തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. തൃക്കൊടിത്താനം പോലീസ് എത്തി മേല്‍നടപടികള്‍ സ്വീകരിച്ചു. അപകടത്തില്‍പ്പെട്ട വാഹനങ്ങള്‍ പത്തോടെ നീക്കം ചെയ്തു.
ഉച്ചയ്ക്ക് രണ്ട് അപകടങ്ങള്‍
ഉച്ചയ്ക്ക് 1.20ന് ചങ്ങനാശേരി ഭാഗത്തുനിന്നു വരികയായിരുന്ന സ്വകാര്യബസ് ഇതേദിശയില്‍ കറുകച്ചാല്‍ ഭാഗത്തേക്ക് പോകുകയായിരുന്ന കോണ്‍ക്രീറ്റ് മിക്‌സിംഗ് ലോറിയുടെ പിന്നിലിടിച്ച് ബസിന്‍റെ മുമ്പിലെ ചില്ല് തകര്‍ന്നു.
വാഴൂര്‍ റോഡില്‍ കറുകച്ചാല്‍ ഭാഗത്തുനിന്ന് ചങ്ങനാശേരി ഭാഗത്തേക്ക് പോവുകയായിരുന്ന ബൈക്കിനു പിന്നില്‍ കാര്‍ ഇടിച്ച് മറ്റൊരു അപകടവും ഉണ്ടായി. ഈ അപകടങ്ങളില്‍ ആര്‍ക്കും പരിക്കില്ല.