ശാപമോക്ഷം കാത്ത് നടയ്ക്കപ്പാടം-കൊഴുപ്പക്കളം റോഡ്്
1480144
Monday, November 18, 2024 7:54 AM IST
ചങ്ങനാശേരി: വാഴൂര്‍ റോഡില്‍ നടയ്ക്കപ്പാടം പെട്രോള് പമ്പിനു സമീപത്തുനിന്നും കൊഴുപ്പക്കളം ഭാഗത്തേക്കുള്ള റോഡില്‍ ടാറിംഗ് പൊളിഞ്ഞുപോയിട്ട് വര്‍ഷങ്ങള്‍ പിന്നിടുകയാണ്. ഇപ്പോള്‍ വാഹനസഞ്ചാരവും കാല്‍നടപ്പും പോലും ദുരിതാവസ്ഥയിവാണ്.
ജലവിതരണ പൈപ്പുകള്‍ സ്ഥാപിക്കുന്നതിനായി കുഴിയെടുത്തതോടെയാണ് റോഡ് പൂര്‍ണമായും തകര്‍ന്നത്. അങ്കണവാടിയും ആരോഗ്യകേന്ദ്രവും ഈ റോഡില്‍ പ്രവര്‍ത്തിക്കുന്നുണ്ട്. നാനൂറോളം മീറ്റര്‍ ദൂരമാണ് റോഡ് നിശേഷം തകര്‍ന്നുകിടക്കുന്നത്.
ജോബ് മൈക്കിള്‍ എംഎല്‍എയുടെ ഫണ്ടില്‍നിന്നനുവദിച്ച 20ലക്ഷം രൂപ വിനിയോഗിച്ച് റോഡ് കോണ്‍ക്രീറ്റ് ചെയ്യുന്നതിനുള്ള ടെന്‍ഡര്‍ നടപടികള്‍ പൂര്‍ത്തിയായതായും അടുത്തമാസം ആദ്യത്തോടെ റോഡ് നിര്‍മാണം പൂര്‍ത്തിയാക്കാനാകുമെന്നും വാര്‍ഡ് മെംബർ ജി. അശോക് പറഞ്ഞു. നിര്‍മാണ നടപടികള്‍ വേഗത്തിലാക്കണമെന്നാണ് നാട്ടുകാരുടെ ആവശ്യം.