ബാബാ രാംദേവിന് അറസ്റ്റ് വാറന്‍റ് പുറപ്പെടുവിച്ച് പാലക്കാട് കോടതി
Monday, January 20, 2025 5:13 AM IST
പാലക്കാട്: യോഗാചാര്യൻ ബാബാ രാംദേവിനെതിരേ അറസ്റ്റ് വാറന്‍റ് പുറപ്പെടുവിച്ച് പാലക്കാട് കോടതി. ഫലസിദ്ധി വാഗ്ദാനംചെയ്ത് ഔഷധപരസ്യനിയമം ലംഘിച്ച കേസിൽ പാലക്കാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി-2 ആണ് രാംദേവിനെതിരേ വാറന്‍റ് പുറപ്പെടുവിച്ചത്. സംസ്ഥാന ഡ്രഗ്സ് കൺട്രോൾ വിഭാഗം രജിസ്റ്റർ ചെയ്ത കേസിലാണു നടപടി.
കഴിഞ്ഞ 16ന് പാലക്കാട്ടെ കോടതിയിൽ ഹാജരാകാൻ രാംദേവിനു സമൻസ് അയച്ചിരുന്നു. എന്നാൽ അന്ന് കോടതിയിൽ വരാതിരുന്നതിനെത്തുടർന്നാണ് ഫെബ്രുവരി ഒന്നിനു നേരിട്ട് ഹാജരായി ജാമ്യമെടുക്കാൻ കോടതി വാറന്‍റ് പുറപ്പെടുവിച്ചത്. ഇതോടെ ഫെബ്രുവരി രണ്ടിനു ബാബാ രാംദേവ് നേരിട്ട് പാലക്കാട്ടെ കോടതിയിൽ എത്തി ജാമ്യമെടുക്കേണ്ടിവരും. രാംദേവിന്‍റെ അനുയായി ആചാര്യ ബാലകൃഷ്ണയും കേസിൽ പ്രതിയാണ്.
കണ്ണൂർ സ്വദേശിയായ ഒരു ഡോക്ടർ സംസ്ഥാന ഡ്രഗ്സ് കൺട്രോൾ വിഭാഗത്തിന് നൽകിയ പരാതികളിന്മേലാണു നടപടി. രാംദേവിന്‍റെ പതഞ്ജലി കന്പനി പുറത്തിറക്കുന്ന ചില ആയുർവേദ ഉത്പന്നങ്ങൾ അമിത രക്തസമ്മർദം, പ്രമേഹം എന്നിങ്ങനെയുള്ള ആരോഗ്യപ്രശ്നങ്ങളെ സുഖപ്പെടുത്തുമെന്നു പരസ്യങ്ങളിൽ വാഗ്ദാനംചെയ്തിരുന്നു. എന്നാൽ ഇത്തരത്തിൽ പല പ്രത്യേക രോഗങ്ങൾ സുഖപ്പെടുത്തുമെന്ന തരത്തിൽ പരസ്യങ്ങൾ കൊടുക്കുന്നത് 1954ലെ ഡ്രഗ്സ് ആൻഡ് മാജിക് റെമ‍ഡീസ് (ഒബ്ജെക്ഷണബിൾ അഡ്വർടൈസ്മെന്‍റ്) നിയമപ്രകാരം കുറ്റകരമാണെന്ന് കാണിച്ചാണ് പരാതി.