കര്‍ഷകര്‍ ഉത്പന്നങ്ങള്‍ നല്‍കാന്‍ മടിച്ചതോടെ പൊതുമാര്‍ക്കറ്റില്‍നിന്നെടുക്കുന്ന സാധനങ്ങളാണ് ഹോര്‍ട്ടികോര്‍പ്പ് സ്റ്റാളുകളിലെത്തിക്കുന്നത്. ഇതോടെ സബ്‌സിഡികളൊന്നും നല്‍കാന്‍ പറ്റാത്ത അവസ്ഥയിലുമായി. മൊത്തവ്യാപാരികളുടെ കുടിശിക കൊടുത്തുതീര്‍ക്കാത്തതിനാല്‍ ഇവര്‍ നല്‍കുന്ന ഗുണനിലവാരം കുറഞ്ഞ പച്ചക്കറികളോട് ജനങ്ങള്‍ മുഖംതിരിച്ചതോടെ ഹോര്‍ട്ടികോര്‍പ്പിന്‍റെ പ്രവര്‍ത്തനവും അനിശ്ചിതത്വത്തിലായി.
ഹോര്‍ട്ടികോര്‍പ്പിന് കേന്ദ്രസര്‍ക്കാര്‍ നല്‍കിവന്നിരുന്ന സബ്‌സിഡി വര്‍ഷങ്ങളായി മുടങ്ങിക്കിടക്കുന്നതും പ്രതിസന്ധിയുടെ ആക്കം കൂട്ടി. ഹോര്‍ട്ടികോര്‍പ്പില്‍ ഉത്പന്നങ്ങള്‍ നല്‍കുന്ന കര്‍ഷകരുടെ ലിസ്റ്റ്, വിറ്റുവരവ് കണക്കുകള്‍, ഉപയോഗ ശൂന്യമായി പോകുന്ന കാര്‍ഷിക ഉത്പന്നങ്ങളുടെ കണക്ക് എന്നിവ യഥാസമയങ്ങളില്‍ സമര്‍പ്പിക്കാത്തതാണ് സബ്‌സിഡി മുടങ്ങാന്‍ കാരണമെന്നും അറിയുന്നു.
സ്റ്റാളുകള്‍ പൂട്ടിയതോടെ ജീവനക്കാര്‍ക്ക് ജോലിയില്ലാതായെങ്കിലും ഹോര്‍ട്ടികോര്‍പ്പിന്‍റെ പ്രവര്‍ത്തനങ്ങള്‍ക്കായി ഡെപ്യൂട്ടേഷനില്‍ നിയമിതരായവര്‍ക്ക് ഇപ്പോള്‍ പണിയെടുക്കാതെതന്നെ ശന്പളം കിട്ടുന്നുവെന്നതാണ് ഇതിന്‍റെ ബാക്കിപത്രം.