ഹേമ കമ്മിറ്റി റിപ്പോർട്ടിൻമേൽ നടപടി സ്വീകരിക്കാത്ത സംസ്ഥാന സർക്കാരിനെ ഹൈക്കോടതി നേരത്തേ നിശിതമായി വിമർശിച്ചിരുന്നു. നാലു വർഷം റിപ്പോർട്ട് കൈയിൽ വച്ചിട്ട് നടപടി സ്വീകരിക്കാത്ത സർക്കാർ രാജ്യത്തെ നിയമങ്ങൾ പാലിക്കാൻ ബാധ്യസ്ഥമാണെന്ന് കോടതി വിമർശിച്ചിരുന്നു.
കൂടാതെ ഹേമ കമ്മിറ്റി റിപ്പോർട്ടിന്റെ പൂർണ രൂപം അന്വേഷണസംഘത്തിന് കൈമാറണമെന്ന് കോടതി നിർദേശിച്ചിരുന്നു. അതേ സമയം ഹേമക്കമ്മിറ്റി റിപ്പോർട്ടിന്റെ അടിസ്ഥാനത്തിൽ ലൈംഗിക ചൂഷണത്തെക്കുറിച്ചുള്ള ആരോപണത്തിൽ അന്വേഷണം നടത്താനുള്ള പോലീസ് സംഘത്തിനെ തീരുമാനിച്ചുകൊണ്ടുള്ള സർക്കാർ ഉത്തരവ് ഇനിയും പുറത്തിറക്കിയിട്ടില്ല.
നിലവിൽ അന്വേഷണം നടത്തുന്നത് പുതുതായി ഉയർന്നു വന്ന പല ചലച്ചിത്ര പ്രവർത്തകരുടെ വെളിപ്പെടുത്തലുകളുടെ അടിസ്ഥാനത്തിലാണ് 23 കേസുകൾ വെളിപ്പെടുത്തലുകളുടെയും മൊഴിയുടെയും അടിസ്ഥാനത്തിൽ രജിസ്റ്റർ ചെയ്തത്.
ചലച്ചിത്ര സംവിധായകൻ രഞ്ജിത്ത്, മുകേഷ്, സിദ്ധിഖ്, ജയസൂര്യ, ഇടവേള ബാബു, ബാബുരാജ് ഉൾപ്പെടെയുള്ളവർക്കെതിരേയാണ് വെളിപ്പെടുത്തലുകളുടെ പശ്ചാത്തലത്തിൽ കേസുകൾ രജിസ്റ്റർ ചെയ്തിരിക്കുന്നത്.