റെയിൽവേയിൽ പുതുതായി ജോലിക്കു കയറുന്നവർക്ക് പരിശീലന കാലയളവിൽ പ്രാദേശിക ഭാഷാപഠനംകൂടി നൽകണമെന്ന് നേരത്തേ നിർദേശം ഉണ്ടായിരുന്നെങ്കിലും അത് പ്രാവർത്തികമാക്കാൻ പല കാരണങ്ങളാൽ സാധിക്കുകയുണ്ടായില്ല. അതിന്മേലുള്ള പുനർചിന്തനം എന്ന നിലയിലാണ് പുതിയ നിർദേശം വന്നിട്ടുള്ളത്.
മാത്രമല്ല, ഉത്തരേന്ത്യൻ സംസ്ഥാനങ്ങളിൽനിന്നു ദക്ഷിണ റെയിൽവേയിൽ വന്ന് ജോലി ചെയ്യുന്ന ജീവനക്കാരിൽ ചിലർക്ക് ഇംഗ്ലീഷ് സംസാരിക്കാൻ കഴിയാത്ത അവസ്ഥയുണ്ട്. അവർക്കു സ്പോക്കൺ ഇംഗ്ലീഷിൽ പരിശീലനവും നൽകും.
ചില സോണുകളിൽ ടിക്കറ്റുകൾ ബുക്ക് ചെയ്യാൻ എത്തുന്നവർ ഫോമുകൾ പൂരിപ്പിച്ച് നൽകുന്നത് പ്രാദേശിക ഭാഷകളിലാണ്. എന്നാൽ കൗണ്ടറുകളിൽ ഇരിക്കുന്ന ജീവനക്കാർക്ക് ഇത് ഇംഗ്ലീഷിൽ പരിഭാഷപ്പെടുത്തിയാലേ കംപ്യൂട്ടർ മുഖാന്തിരം ടിക്കറ്റുകൾ ബുക്ക് ചെയ്യാൻ സാധിക്കുകയുള്ളൂ.
ഇത് പല കൗണ്ടറുകളിലും ടിക്കറ്റുകൾ ബുക്ക് ചെയ്യുന്നതിന് കൂടുതൽ സമയം എടുക്കുന്നു എന്ന് മാത്രമല്ല പലതരം ബുദ്ധിമുട്ടുകളും ഉണ്ടാകുന്നുമുണ്ട്. പുതിയ നിർദേശം നടപ്പായാൽ ഇതിനും ഒരു പരിധിവരെ പരിഹാരമാകുമെന്നാണ് അധികൃതരുടെ പ്രതീക്ഷ.