അയൽക്കൂട്ട വനിതകൾക്കായി ഓരോ വാർഡിലും ‘എന്നിടം’ ഒരുങ്ങുന്നു : Deepika.com Kerala News |

തിരുവനന്തപുരം: കുടുംബശ്രീ പ്രവർത്തനങ്ങൾ ഇരുപത്തിയാറ് വർഷം പൂർത്തിയാക്കുമ്പോൾ കുടുംബശ്രീ അംഗങ്ങളുടെ കലാ സാംസ്‌കാരിക സാമൂഹ്യ പ്രവർത്തനങ്ങൾക്കായി സംസ്ഥാനത്തെ ഓരോ എഡിഎസിലും ‘എന്നിടം’ സജ്ജമാകുന്നു.

വാർഡ് തലത്തിലുള്ള എഡിഎസ് സംവിധാനത്തെ ശക്തിപ്പെടുത്തുന്നതോടൊപ്പം വനിതകളുടെ സർഗാത്മക കഴിവുകൾ വികസിപ്പിക്കാനുള്ള സാംസ്‌കാരിക കേന്ദ്രമായും മാനസികോല്ലാസത്തിനുള്ള വേദിയായും ‘എന്നിടം’ മാറും. അതത് എഡിഎസ് ഭാരവാഹികൾക്കാണ് ഇതിന്‍റെ പ്രവർത്തനചുമതല.

കുടുംബശ്രീ വാർഷികദിനമായ 17ന് ഉച്ചകഴിഞ്ഞ് 3.30ന് തിരുവനന്തപുരം ജില്ലയിൽ ആര്യങ്കോട് പഞ്ചായത്തിലെ കരിക്കോട്ടുകുഴി എഡിഎസിൽ ‘എന്നിട’ത്തിന്‍റെ സംസ്ഥാനതല ഉദ്ഘാടനം എക്‌സിക്യൂട്ടീവ് ഡയറക്ടർ ജാഫർമാലിക് നിർവഹിക്കും. പുതുതായി പ്രവർത്തനം ആരംഭിക്കുന്ന എഡിഎസ് ഓഫീസിന്‍റെ ഉദ്ഘാടനവും അദ്ദേഹം നിർവഹിക്കും.

ജില്ലാ മിഷൻ കോ-ഓർഡിനേറ്റർ ജി. രമേഷ് അധ്യക്ഷത വഹിക്കും. കുടുംബശ്രീ സ്റ്റേറ്റ് പ്രോഗ്രാം മാനേജർ സി.സി .നിഷാദ് ‘എന്നിടം’ ആശയാവതരണം നടത്തും. പരിപാടിയോടനുബന്ധിച്ച് രാവിലെ മുതൽ കലാ പരിപാടികൾ, ഭക്ഷ്യമേള, ഉത്‌പന്ന പ്രദർശനം എന്നിവയും സംഘടിപ്പിക്കുന്നുണ്ട്.

എല്ലാ വർഷവും കുടുംബശ്രീ വാർഷികദിനമായ 17നും അനുബന്ധ ആഴ്ചയിലും എഡിഎസ്തലത്തിൽ അയൽക്കൂട്ട, ഓക്‌സിലറി, ബാലസഭകളിലെ അംഗങ്ങൾ, ബഡ്‌സ് ബിആർസി അംഗങ്ങൾ, വയോജനങ്ങൾ തുടങ്ങി എല്ലാവരെയും പങ്കെടുപ്പിച്ചു വിവിധ കലാ- സാംസ്‌കാരിക പരിപാടികൾ സംഘടിപ്പിക്കും.

കൂടാതെ സാമൂഹ്യമേഖലയിലും വിനോദ- വിജ്ഞാന- കലാ- കായിക മേഖലകളിലെ വിവിധ പ്രവർത്തനങ്ങൾക്കും ‘എന്നിടം’ വേദിയാകും. എല്ലാ മാസവും ഒരു ദിവസം വിവിധ പരിപാടികൾ സംഘടിപ്പിക്കുന്നതിനാണ് നിർദേശം.

സംസ്ഥാനതല ഉദ്ഘാടന പരിപാടിയിൽ കുടുംബശ്രീ ഡയറക്ടർ കെ.എസ്. ബിന്ദു, വിവിധ ഗ്രാമപഞ്ചായത്ത് പ്രതിനിധികൾ, സിഡിഎസ് പ്രവർത്തകർ, കുടുംബശ്രീ സംസ്ഥാന ജില്ലാ മിഷൻ ഓഫീസിലെ ഉദ്യോഗസ്ഥർ എന്നിവർ പങ്കെടുക്കും.