ചേലക്കരയില്‍ 1.99 കോടിയുടെ ടൂറിസം പദ്ധതി നടപ്പാക്കും
1509122
Wednesday, January 29, 2025 2:05 AM IST
ചേലക്കര: നിയോജകമണ്ഡലത്തില്‍ 1.99 കോടി രൂപയുടെ ടൂറിസം സര്‍ക്യൂട്ട് പദ്ധതി സമയബന്ധിതമായി പൂര്‍ത്തീകരിക്കുമെന്ന് യു.ആര്‍. പ്രദീപ് എംഎല്‍എ അറിയിച്ചു.
ടൂറിസംവകുപ്പിന്‍റെ പ്രോജക്ട് ആയ ചേലക്കര ടൂറിസം സര്‍ക്യൂട്ട് പദ്ധതിയില്‍ ഉള്‍പ്പെടുത്തിയിട്ടുള്ള കാളിയാറോഡ് ജാറം, പഴയന്നൂര്‍ ഭഗവതി ക്ഷേത്രം, തിരുവല്വാമല ക്ഷേത്രം, വാഴാലിക്കാവ് ഭഗവതിക്ഷേത്രം, വരവൂര്‍ തളി ക്ഷേത്രം, ദേശമംഗലം ഊറോളി ബണ്ട്റോഡ് എന്നിവിടങ്ങളിലെ വിവിധ പ്രവൃത്തികള്‍ സമയബന്ധിതമായി ചെയ്തുതീര്‍ക്കുമെന്ന് എംഎല്‍എ വിളിച്ചുചേര്‍ത്ത ടൂറിസം വകുപ്പ് ഉദ്യോഗസ്ഥര്, നിര്‍വഹണ ഏജന്‍സിയായ കിഡ്ക്(കേരള ഇറിഗേഷന്‍ ഇന്‍ഫ്രാസ്ട്രക്ചര്‍ ഡെവലപ്മെന്‍റ് കോര്‍പ്പറേഷന്‍), എന്‍ജിനീയര്‍മാര്‍, ദേവസ്വം ഉദ്യോഗസ്ഥര്, ജനപ്രതിനിധികള്‍ എന്നിവരുടെ യോഗത്തില്‍ തീരുമാനമെടുത്തു. കുടിവെള്ളസംവിധാനം, ട്രീബേസ്, സൈന്‍ ബോര്‍ഡുകള്‍, ഡ്രെയ്നേജ്, വേസ്റ്റ് ബിന്‍, സ്ട്രീറ്റ് ലൈറ്റ്, ശുചിമുറികള്‍ തുടങ്ങിയവയാണ് എല്ലായിടത്തും ഒരുക്കുന്നത്. ഈ പ്രവൃത്തി മാര്‍ച്ചിനു മുമ്പ് ചെയ്തുതീര്‍ക്കുമെന്ന് ഉദ്യോഗസ്ഥര് യോഗത്തില്‍ ഉറപ്പുനല്‍കി.
യോഗത്തില്‍ പാഞ്ഞാള്‍ ഗ്രാമപഞ്ചായത്ത് പ്രസിഡന്‍റ് വി. തങ്കമ്മ, സ്റ്റാന്‍ഡംഗ് കമ്മിറ്റി ചെയര്‍മാന്‍ എ.കെ. ഉണ്ണികൃഷ്ണന്‍, പഴയന്നൂര്‍ ക്ഷേത്രം ഉപദേശകസമിതി പ്രസിഡന്‍റ് ജയന്‍, ടൂറിസം ഡെപ്യൂട്ടി ഡയറക്ടര്‍ പ്രേംവാസ്, ഡെപ്യൂട്ടി ജനറല്‍ മാനേജര്‍ ജമാലുദ്ധീന്‍, കിഡ്ക് എന്‍ജിനീയര്‍മാരായ ശരത്ത്, രാഹുല്‍, കൊച്ചിന്‍ ദേവസ്വം ബോര്‍ഡ് അസി. എക്സിക്യൂട്ടീവ് എന്‍ജിനീയര്‍ നിധീഷ്, തിരുവില്വാമല ദേവസ്വം മാനേജര്‍ വിജയകുമാര്‍, തിരുവില്വാമല ദേവസ്വം അസി. കമ്മീഷണര്‍ കെ.കെ. കല, വിനോദ്, ആര്‍ക്കിടെക്ചര്‍മാരായ ശാലിനി, സി.പി. സുനില്‍ എന്നിവര്‍ യോഗത്തില്‍ പങ്കെടുത്തു.