ട്രാൻസ്ഫോർമർ പൊട്ടിത്തെറിച്ച് ജീവനക്കാരന് പൊള്ളലേറ്റു

പറവൂർ: ജോലിക്കിടെ ട്രാൻസ്ഫോർമർ പൊട്ടിത്തെറിച്ച് കെഎസ്ഇബി കരാർ ജീവനക്കാരനായ കൂനമ്മാവ് സ്വദേശി അക്ഷയ്ക്ക് (27) ഗുരുതരമായി പൊള്ളലേറ്റു. ഇന്നലെ രാവിലെ 11.30ന് മന്നം സബ് സ്റ്റേഷനിലായിരുന്നു സംഭവം.

തകരാറിലായ ട്രാൻസ്ഫോർമറിന്‍റെ അറ്റകുറ്റപ്പണികൾ ഉദ്യോഗസ്ഥർക്കൊപ്പം ചെയ്യുകയായിരുന്നു അക്ഷയ്. തകരാർ പരിഹരിച്ച ശേഷം ഉദ്യോഗസ്ഥർ മടങ്ങി. ഉടൻ ഈ ട്രാൻസ്ഫോർമറിന് അനുബന്ധമായുള്ള സിടി ട്രാൻസ്ഫോർമറുകളിലൊന്ന് പൊട്ടിത്തെറിക്കുകയായിരുന്നു. ഇതിനുള്ളിലെ തിളച്ച ഓയിലും പൊട്ടിത്തെറിയുടെ ഭാഗമായുണ്ടായ തീനാളങ്ങളും അക്ഷയുടെ ശരീരത്തിലേക്ക് തെറിച്ചു വീണു. ഉടൻ അക്ഷയെ പറവൂരിലെ സ്വകാര്യ ആശുപത്രിയിലും പിന്നീട് എറണാകുളം മെഡിക്കൽ സെന്‍ററിലും പ്രവേശിപ്പിച്ചു. 40 ശതമാനത്തിലേറെ പൊള്ളലേറ്റിട്ടുണ്ട്.