തൃക്കരിപ്പൂർ: സംസ്ഥാന ഫുട്ബോൾ അസോസിയേഷന്‍റെ നേതൃത്വത്തിൽ നടക്കാവ് രാജീവ് ഗാന്ധി സിന്തറ്റിക്ക് സ്റ്റേഡിയത്തിൽ സംഘടിപ്പിച്ച സബ് ജൂണിയർ ഫുട്ബോൾ ചാമ്പ്യൻഷിപ്പിൽ കാസർഗോഡ് ജേതാക്കളായി. ടൈബ്രേക്കറിൽ മലപ്പുറത്തെ 4-3 നാണ് തോല്പിച്ചത്. ഫൈനലിലെ മികച്ച താരമായി മലപ്പുറത്തിന്‍റെ അമ്രാസിനെ തിരഞ്ഞെടുത്തു.
ലൂസേഴ്സ് ഫൈനലിൽ പാലക്കാട് തൃശൂരിനെ എതിരില്ലാത്ത നാല് ഗോളിന് പരാജയപ്പെടുത്തി.
മികച്ച ഗോൾകീപ്പറായി കാസർഗോഡിന്‍റെ ടി.കെ.ബി.മുഹമ്മദ് ഷാൻ, ഫോർവേർഡായി മലപ്പുറത്തിന്‍റെ എം.കെ.ശ്രീനന്ദൻ, പ്രതിരോധ താരമായി കാസർഗോഡിന്‍റെ കെ.സായന്ത്, മിഡ്ഫീൽഡറായി പാലക്കാടിന്‍റെ ഷാരോൺ എന്നിവരെ തെരഞ്ഞെടുത്തു.
മുൻ ദേശീയതാരം എം.സുരേഷ്, ജില്ലാ പഞ്ചായത്ത് മുൻ പ്രസിഡന്‍റ് എ.ജി.സി.ബഷീർ, സംസ്ഥാന സ്പോർട്സ് കൗൺസിൽ അംഗം ടി.വി.ബാലൻ, അഷ്റഫ് ഉപ്പള, കെ.പി.സി.മുഹമ്മദ് കുഞ്ഞി എന്നിവർ സമ്മാനങ്ങൾ വിതരണം ചെയ്തു. ജില്ലാ ഫുട്ഹോൾ അസോസിയേഷൻ പ്രസിഡന്‍റ് കെ.വീരമണി അധ്യക്ഷത വഹിച്ചു. ടി.കെ.എം.മുഹമ്മദ് റഫീഖ്, രാജൻ എടാട്ടുമ്മൽ, സിദ്ദീഖ് ചക്കര, കബീർ കമ്പാർ, എം.ബാലമുരളി, ലത്തീഫ് പെരിയ, വി.പി.പി. ഷുഹൈബ്, കെ.കെ.സൈനുദീൻ, കെ.വി. ഗോപാലൻ, ടി.വി.ഗോപാല കൃഷ്ണൻ, സി.ഷാഹുൽ ഹമീദ്, എം.ഷെരീഫ്, സി.വി. ഷാജി എന്നിവർ പ്രസംഗിച്ചു