‘അമ്മ’യില്‍ പുതിയ കമ്മിറ്റി ഉടൻ: സുരേഷ് ഗോപി
Saturday, November 2, 2024 1:14 AM IST
കൊച്ചി: താരസംഘടനയായ ‘അമ്മ’ യില്‍ പുതിയ കമ്മിറ്റിയുണ്ടാകുമെന്ന് നടനും കേന്ദ്രമന്ത്രിയുമായ സുരേഷ് ഗോപി. കേരളപ്പിറവി ദിനാഘോഷത്തിന്‍റെ ഭാഗമായി എറണാകുളത്തെ ‘അമ്മ’ ആസ്ഥാനത്തു നടന്ന കുടുംബസംഗമത്തില്‍ പ്രസംഗിക്കുകയായിരുന്നു അദ്ദേഹം.
‘അമ്മ’ ശക്തമായി തിരിച്ചുവരും. പുതിയ കമ്മിറ്റി ഉടന്‍ ഉണ്ടാകും. ഇതുസംബന്ധിച്ച് മോഹന്‍ലാലുമായി ചര്‍ച്ച നടത്തി. പുതിയ കമ്മിറ്റിക്കുവേണ്ടിയുള്ള ചര്‍ച്ചകള്‍ക്ക് താന്‍ തുടക്കം കുറിച്ചു. എല്ലാവരെയും തിരിച്ചുകൊണ്ടുവരുമെന്നും സുരേഷ് ഗോപി മാധ്യമങ്ങളോട് പറഞ്ഞു.
അതേസമയം, സംഘടന ഇപ്പോഴും സജീവമാണെന്നും ദൈനംദിന പ്രവര്‍ത്തനങ്ങള്‍ ഭംഗിയായി നടക്കുന്നുണ്ടെന്നും നടന്‍ വിനു മോഹന്‍ പ്രതികരിച്ചു. നടന്നതു യോഗമല്ലെന്നും അംഗങ്ങളുടെ ഒത്തുചേരല്‍ മാത്രമാണെന്നും അദ്ദേഹം പറഞ്ഞു. രാജിവച്ച അതേ കമ്മിറ്റി തന്നെ തിരിച്ചുവരണമെന്ന് ധര്‍മജന്‍ ബോള്‍ഗാട്ടി പറഞ്ഞു.
ഹേമ കമ്മിറ്റി റിപ്പോര്‍ട്ട് വിവാദങ്ങള്‍ക്കുശേഷം ആദ്യമായാണു ‘അമ്മ’ യുടെ പൊതുപരിപാടി നടക്കുന്നത്. ജയന്‍ ചേര്‍ത്തല, ബാബു രാജ്, ടിനി ടോം, അനൂപ് മേനോന്‍, ഹരിശ്രീ അശോകന്‍, സുരേഷ് കൃഷ്ണ, ഷാജു ശ്രീധര്‍, ബീന ആന്‍റണി, കലാഭവന്‍ പ്രജോദ് തുടങ്ങിയവരും ഒത്തുചേരലില്‍ പങ്കെടുത്തു.