സർവോദയ വിദ്യാലയത്തിൽ ബഹിരാകാശദിനം ആഘോഷിച്ചു

തിരുവനന്തപുരം: അനന്തപുരം ഫൗണ്ടേഷൻ, ഉന്നത് ഭാരത് അഭിയാൻ, സർവോദയ സെൻട്രൽ വിദ്യാലയം എന്നിവരുടെ സംയുക്താഭിമുഖ്യത്തിൽ നാലാഞ്ചിറ സർവോദയ സെൻട്രൽ വിദ്യാലയത്തിൽ ലോക ബഹിരാവകാശദിനം സംഘടിപ്പിച്ചു ഡിജിറ്റൽ യൂണിവേഴ്സിറ്റി വൈസ് ചാൻസലർ ഡോ. സിസ തോമസ്, സർവോദയ സ്കൂൾ പ്രിൻസിപ്പൽ ഫാ. കരിക്കൽ ചാക്കോ വിൻസന്‍റ്,

ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യൂക്കേഷൻ ആൻഡ് റിസർച്ചിലെ പ്രഫ. രാജൻ, ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് ടെക്നോളജിയിലെ പ്രഫ. ജോസഫ് കുരുവിള, അനന്തപുരം ഫൗണ്ടേഷൻ ട്രസ്റ്റിനെ പ്രതിനിധീകരിച്ച് ആനന്ദ് എസ്‌. നായർ എന്നിവർ ചേർന്നു പരിപാടി ഉദ്ഘാടനം ചെയ്തു.

പ്രഫ. ജോസഫ് കുരുവിള ദേശീയ ബഹിരാകാശ ദിന സന്ദേശം നൽകി. വിഎസ്എസ്‌സിയിലെ മുതിർന്ന ശാസ്ത്രജ്ഞൻ അരുൺ മുഖ്യപ്രഭാഷണം നടത്തി. ഇതിനുപുറമെ, വിദ്യാർഥികൾക്കായി ശാസ്ത്ര പ്രദർശനവും ക്വിസ്, പ്രസംഗ മത്സരങ്ങളും സംഘടിപ്പിച്ചു.

ADVERTISEMENT

പ്രതിഷേധ സായാഹ്നം സംഘടിപ്പിച്ചു

നെയ്യാറ്റിന്‍കര :വിവിധ ആവശ്യങ്ങൾ ഉന്നയിച്ച് കെപിഎസ്ടിഎ നെയ്യാറ്റിൻകര വിദ്യാഭ്യാസ ജില്ല കമ്മിറ്റിയുടെ നേതൃത്വത്തിൽ നെയ്യാറ്റിന്‍കര ഡിഇ ഓഫീസിനു മുന്നില്‍ സംഘടിപ്പിച്ച പ്രതിഷേധ സായാഹ്നം ഡിസിസി ജനറൽ സെക്രട്ടറി ജെ.ജോസ് ഫ്രാങ്ക്ളിൻ ഉദ്ഘാടനം ചെയ്തു. വിദ്യാഭ്യാസ ജില്ലാ പ്രസിഡന്‍റ് എസ്.എസ് വിമൽ അധ്യക്ഷനായിരുന്നു. സംസ്ഥാന നിർവാഹക സമിതി അംഗം നെയ്യാറ്റിൻകര പ്രിൻസ് മുഖ്യപ്രഭാഷണം നടത്തി. സി.ആർ ആത്മകുമാർ, അനിൽ രാജ്, എല്‍. സോംരാജ്, എസ്. മഞ്ജു, സി. ഫ്രഡിബായ് എന്നിവര്‍ പ്രസംഗിച്ചു.

മൈക്രോഫിനാൻസ് യൂണിറ്റുകൾക്ക് വായ്പ വിതരണം

നെടുമങ്ങാട് : എസ്എൻഡിപി യോഗം നെടുമങ്ങാട് യൂണിയനിൽപ്പെട്ട വിവിധ ശാഖകളിലെ മൈക്രോഫിനാൻസ് യൂണിറ്റുകൾക്ക് ഫെഡറൽ ബാങ്കിന്‍റെ സഹകരണത്തോടെ ഒന്നരക്കോടി രൂപ വായ്പ വിതരണം നടത്തി. ഫെഡറൽബാങ്ക് മാനേജർ അൻസു തങ്കം ജോസഫ്, യൂണിയൻ പ്രസിഡന്‍റ് എ.മോഹൻദാസ് എന്നിവർ സംസാരിച്ചു.യൂണിയൻ ഭാരവാഹികളായ ശിവരാജൻ,സുരേഷ് കുമാർ, ഷിബു വഞ്ചുവം, പഴകുറ്റി രാജേഷ്, രമേശ് പഴകുറ്റി, രതീഷ് കുമാർ പ്ലാത്തറ,രഞ്ജിത്ത് നെട്ട, ലതകുമാരി, മൈക്രോ ഫിനാൻസ് യൂണിറ്റ് അംഗങ്ങൾ തുടങ്ങിയവർ പങ്കെടുത്തു. മൈക്രോ ഫിനാൻസ് വായ്പ ആവശ്യമുള്ള സംഘങ്ങൾ മൈക്രോ ഓഡിറ്റ് നടത്തി ശാഖാ സെക്രട്ടറി മുഖേനെ യൂണിയനിൽ അപേക്ഷ നൽകേണ്ടതാണെന്ന് യൂണിയൻ പ്രസിഡന്‍റ് അറിയിച്ചു.ഒരു സംഘത്തിന് പരമാവധി 20 ലക്ഷം രൂപ വരെ അനുവദിക്കും.

തോട്ടിൽ വീണയാളെ ഫയർഫോഴ്സ് രക്ഷപ്പെടുത്തി

മെഡിക്കല്‍കോളജ്: ‍ ആമയിഴഞ്ചാന്‍ തോട്ടില്‍ വീണയാളെ തിരുവനന്തപുരം ഫയര്‍‌സ്റ്റേഷനില്‍ നിന്നു ഉദ്യോഗസ്ഥരെത്തി രക്ഷപ്പെടുത്തി. കിഴക്കേക്കോട്ട സ്വദേശി നാസര്‍ (54) ആണ് തോട്ടില്‍ വീണത്. വെള്ളിയാഴ്ച രാത്രി 11നാണ് സംഭവം. ഫോര്‍ട്ട് സ്റ്റേഷന്‍ പരിധിയില്‍ സെന്‍ട്രല്‍ തീയേറ്ററിന് സമീപം തോട് ഒഴുകുന്ന ഭാഗത്താണ് ഇയാള്‍ തോട്ടിലേക്കു വീണത്. നാസറിനൊപ്പം ഒരാള്‍കൂടി ഉണ്ടായിരുന്നു. ഒപ്പമുണ്ടായിരുന്നയാള്‍ക്ക് നാസറിനെ സഹായിക്കാൻ‍ കഴിഞ്ഞില്ല. പോലീസും ഫയര്‍ഫോഴ്‌സും സ്ഥലത്തെത്തി. ഫയര്‍ ആൻഡ് റസ്‌ക്യു ഓഫീസര്‍ ജസ്റ്റിനാണ് ഏണി ചാണി തോട്ടിലിറങ്ങി കഴുത്തിനു മുകളില്‍ മാത്രം പുറത്തുകാണാവുന്ന നിലയില്‍ വെള്ളത്തില്‍ കിടന്ന നാസറിനെ രക്ഷപ്പെടുത്തിയത്. വെള്ളത്തില്‍ നിന്നു നാസറിനെ ഉയര്‍ത്തിയശേഷം കൂട ഉപയോഗിച്ച് അതിനുള്ളിലാക്കി വലിച്ച് കരയിലേക്ക് കയറ്റുകയായിരുന്നു. അര്‍ധബോധാവസ്ഥയിലായിരുന്ന നാസറിനെ പോലീസ് തിരുവനന്തപുരം മെഡിക്കല്‍കോളജ് ആശുപത്രിയിലേക്ക് മാറ്റി പ്രാഥമിക ചികിത്സ നല്‍കി.

വിസ തട്ടിപ്പ്: തൃശൂർ സ്വദേശി പിടിയിൽ

കഴക്കൂട്ടം : വിസിറ്റിംഗ് വിസ നൽകാമെന്ന് വാഗ്ദാനം നൽകി യുവതിയിൽ നിന്ന് 6 ലക്ഷം രൂപ തട്ടിയെടുത്ത തൃശൂർ സ്വദേശി ജിൻസ്.എസ്.സജിയെ കഴക്കൂട്ടം പോലീസ് അറസ്റ്റ് ചെയ്തു. കഴക്കൂട്ടം മേനംകുളം സ്വദേശിനിയായ യുവതിയാണ് തട്ടിപ്പിനിരയായത്. ദുബായ് ആസ്ഥാനമായി പ്രവർത്തിക്കുന്ന യോലോ ട്രിപ്പ് എന്ന സ്ഥാപനത്തിന്‍റെ ഉടമയായ ജിൻസ് പലതവണയായി ഇറ്റലിയിലേക്ക് വിസിറ്റിംഗ് വിസ ശരിയാക്കി നൽകാമെന്ന് പറഞ്ഞാണ് യുവതിയിൽ നിന്ന് 6 ലക്ഷം രൂപ തട്ടിയെടുത്തത്. ജൂലൈ 12ന് ആദ്യം അമ്പതിനായിരം രൂപയും അതേ മാസം തന്നെ 250,000 രൂപയും നൽകി. തുടർന്ന് വിസിറ്റിംഗ് വിസയുടെ വ്യാജ കോപ്പി അയച്ചു നൽകി വിശ്വസിപ്പിച്ച ഇയാൾ പിന്നീട് യുവതിയിൽ നിന്ന് മൂന്നുലക്ഷം രൂപ കൂടി തട്ടിയെടുക്കുകയായിരുന്നു.

കേരളത്തിൽ 100 കോടി നിക്ഷേപിക്കാൻ കൺട്രി ക്ലബ് ഹോസ്പിറ്റാലിറ്റി ആൻഡ് ഹോളിഡേസ് ലിമിറ്റഡ്

തിരുവനന്തപുരം: കൺട്രി ക്ലബ് ഹോസ്പിറ്റാലിറ്റി ആൻഡ് ഹോളിഡേസ് ലിമിറ്റഡ് അടുത്ത നാല് മുതൽ അഞ്ച് വർഷത്തിനുള്ളിൽ കേരളത്തിൽ 100 കോടി രൂപയുടെ നിക്ഷേപ പദ്ധതി പ്രഖ്യാപിച്ചു. ആലപ്പുഴ, മുന്നാർ, വയനാട്, വാഗമൺ, കുമരകം എന്നിവ ഉൾപ്പെടുന്ന പ്രധാന വിനോദസഞ്ചാര കേന്ദ്രങ്ങളിൽ വികസന പ്രവർത്തനങ്ങൾ നടപ്പിലാക്കും. അതേസമയം വിപുലീകരണത്തിന്റെ ഭാഗമായി കമ്പനി അംഗങ്ങൾക്ക് പ്രത്യേക ആനുകൂല്യങ്ങൾ നൽകുന്ന വിഐപി ഗോൾഡ് കാർഡ് പുറത്തിറക്കി. പുതിയ അംഗങ്ങൾക്ക് ഒരു സ്വർണനാണയവും ഗാംഗ്ടോക്കിൽ മൂന്ന് സൗജന്യ രാത്രികളും ലഭിക്കും.നിലവിലുള്ള അംഗങ്ങൾക്ക് പുതിയ അംഗങ്ങളെ പരിചയപ്പെടുത്തുമ്പോൾ ഒരു സ്വർണനാണയം ലഭിക്കുന്നതാണ്.

നെടുമങ്ങാട് ടൗണിൽ പോലീസിന്‍റെ മിന്നൽ പരിശോധന

നെടുമങ്ങാട് : ഓണത്തോടനുബന്ധിച്ചു നെടുമങ്ങാട് ടൗണിൽ പോലീസിന്‍റെ മിന്നൽ പരിശോധന. എഎസ്പി അച്യുത് അശോകിന്‍റെ നിർദേശാനുസരണം നെടുമങ്ങാട് സബ് ഡിവിഷന് കീഴിലുള്ള എട്ട് സ്റ്റേഷനിലെ നൂറോളം പോലീസ് ഉദ്യോഗസ്ഥർ ചേർന്നാണ് പരിശോധന നടത്തിയത്. കച്ചവട സ്ഥാപനങ്ങൾ, മാർക്കറ്റ്, ഹോട്ടലുകൾ തുടങ്ങിയവ പരിശോധിച്ചു. മാർക്കറ്റിൽ കെ9 ഡോഗ് സംഘവും പരിശോധന നടത്തി. ഇന്നലെ ഉച്ചയ്ക്ക് മൂന്നിന് ആരംഭിച്ച പരിശോധന രാത്രി ഏഴ് വരെ നീണ്ടു.

വിഴിഞ്ഞം തുറമുഖ മേഖലയിൽ തെരുവ്നായ ആക്രമണം : പതിനഞ്ചോളം കോഴികളെ കടിച്ചു കൊന്നു

വിഴിഞ്ഞം: വിഴിഞ്ഞം അന്താരാഷ്ട്ര തുറമുഖ മേഖലയിൽ പട്ടാപ്പകൽ തെരുവ്നായ ആക്രമണം. വളർത്തു മൃഗങ്ങളെയും കോഴികളെയും വളർത്തുനായയേയും കടിച്ചു. ഒരു വീട്ടിൽ മാത്രം പതിനഞ്ചോളം കോഴികളെ കടിച്ചു കൊന്നു. ഇന്നലെ ഉച്ചക്ക് പന്ത്രണ്ടോടെ ഹാർബറിന് സമീപം പനവി ളക്കോടിലാണ് നായയുടെ ആക്രമണമുണ്ടായത്. പനവിളക്കോട് സ്വദേശി രതീഷിന്‍റെ കോഴികളെ വകവരുത്തിയ നായ നാല് ആടുകളെയും കടിച്ച് മാരകമായി പരിക്കേൽപ്പിച്ചു. നെല്ലിക്കുന്ന് സ്വദേശി സോമന്‍റെ അടിനെ കടിച്ച ശേഷം കടയ്ക്കുളം സ്വദേശി രവിയുടെ വീട്ടിൽ കയറി കെട്ടിയിട്ടിരുന്ന വളർത്തുനായയെയും കടിച്ചു. മറ്റ് നിരവധി വീടുകളിൽ വളർത്തിയിരുന്ന കോഴികളെ നായ ആക്രമിച്ചതായി നാട്ടുകാർ പറയുന്നു. പേപ്പട്ടിയെന്ന സംശയത്തിൽ ആക്രമണം ഭയന്ന് ജനങ്ങൾക്ക് പുറത്തിറങ്ങാൻ പോലും കഴിയാത്ത അവസ്ഥയായി. നിരവധി തെരുവ് നായ്ക്കളും അക്രമത്തിനിരയായി . തുറമുഖത്തിനായി സർക്കാർ ഏറ്റെടുത്ത ഏക്കർ കണക്കിന് ഭൂമി തെരുവ് നായ്ക്കളുടെ ആവാസകേന്ദ്രമെന്നാണ് നാട്ടുകാർ പറയുന്നത്. നാട്ടുകാർ പ്രതിഷേധിക്കുമ്പോൾ പരിഹാരം കാണാമെന്ന് ഉറപ്പു നൽകി മടങ്ങുന്നവർ പിന്നെ തിരിഞ്ഞ് നോക്കാറില്ലെന്ന് നാട്ടുകാർ പറയുന്നു. വിവരമറിഞ്ഞ് വിഴിഞ്ഞം പോലീസും സ്ഥലത്ത് എത്തി.

പള്ളിത്തുറ വേളാങ്കണ്ണി ആരോഗ്യമാതാവിന്‍റെ തിരുനാളിന് 30 നു കൊടിയേറും

പള്ളിത്തുറ: തെക്കൻ കേരളത്തിലെ പ്രധാന മരിയൻ തീർഥാടന കേന്ദ്രമായ വിശുദ്ധ മേരി മഗ്ദലീന പള്ളിയിൽ പള്ളിത്തുറ വേളാങ്കണ്ണി ആരോഗ്യമാതാവിന്‍റെ തിരുനാളിന് 30 നു കൊടിയേറും. സെപ്റ്റംബർ എട്ടിനാണ് തിരുനാൾ സമാപിക്കുന്നത്. തിരുനാളിന് ആരംഭം കുറിക്കുന്ന 30 നു രാവിലെ 6.30 ന് പ്രഭാത ദിവ്യബലി, 11ന് ദിവ്യകാരുണ്യ ആരാധന. വൈകുന്നേരം ആറിന് ഇടവക വികാരി ഫാ. ബിനു ജോസഫ് അലക്സ് കൊടിയേറ്റ് കർമം നിർവഹിക്കും. തുടർന്ന് സമൂഹദിവ്യബലി. തുടർന്നു തിരുനാൾ ദിനങ്ങളിൽ രാവിലെ 6.15 ന് പ്രഭാത ദിവ്യബലി, വൈകുന്നേരം അഞ്ചിന് ജപമാല, ലിറ്റനി, നൊവേന, സമൂഹദിവ്യബലി എന്നിവ നടക്കും. സെപ്റ്റംബർ ഏഴിന് രാവിലെ 6.15 ന് പ്രഭാത ദിവ്യബലി, പത്തിന് സമൂഹ ദിവ്യബലി. വൈകുന്നേരം അഞ്ചിന് ജപമാല, ലിറ്റനി, നൊവേന. തുടർന്ന് തിരുവനന്തപുരം ലത്തീൻ അതിരൂപത വികാരി ജനറാൾ മോണ്‍. യൂജിൻ എച്ച്. പെരേരയുടെ മുഖ്യകാർമികത്വത്തിൽ ആഘോഷമായ സന്ധ്യാവന്ദന പ്രാർഥന. ഫാ. എ.ആർ. ജോണ്‍ വചനപ്രഘോഷണം നടത്തും. തുടർന്ന് തിരുഅങ്കി ചാർത്തലും ഭക്തിസാന്ദ്രമായ തിരുസ്വരൂപ പ്രദക്ഷിണവും നടക്കും. പ്രധാന തിരുനാൾ ദിനമായ സെപ്റ്റംബർ എട്ടിന് രാവിലെ 6.15 ന് പ്രഭാത ദിവ്യബലി. പത്തിന് സമൂഹദിവ്യബലി. തുടർന്ന സ്നേഹവിരുന്ന്. വൈകുന്നേരം അഞ്ചിന് ജപമാല, ലിറ്റനി, നൊവേന. ആറിന് ആർച്ച്ബിഷപ് ഡോ. തോമസ് ജെ. നെറ്റോയുടെ മുഖ്യകാർമികത്വത്തിൽ ആഘോഷമായ പൊന്തിഫിക്കൽ ദിവ്യബലി. സെപ്റ്റംബർ ഒന്പതിന് രാവിലെ 6.15 ന് പ്രഭാത ദിവ്യബലി. വൈകുന്നേരം അഞ്ചിന് ജപമാല, ലിറ്റനി, നൊവേന. ദിവ്യബലിക്കു ശേഷം ആഘോഷമായ കൊടിയിറക്കോടു കൂടി ഈ വർഷത്തെ തിരുനാൾ സമാപിക്കും.

കോവളം ബീച്ചിലെ നിരീക്ഷണ കാമറകൾ കണ്ണടച്ചു; അനക്കമില്ലാതെ അധികൃതര്‌

വിഴിഞ്ഞം: ടൂറിസം വകുപ്പ് കോവളം ബീച്ചിന്‍റെയും പരിസര പ്രദേശങ്ങളിലെയും സുരക്ഷക്കായിസ്ഥാപിച്ച നിരീക്ഷണ കാമറകൾ കണ്ണടച്ചു. പരിഹാരം കാണണമെന്ന കോവളം പോലിസിന്‍റെ ആവശ്യവും പരിഗണിക്കാതെ അധികൃതർ. കോവളത്ത് വിദേശ വനിതയുടെ കൊലപാതകത്തിന് ശേഷം ഉയർന്ന വ്യാപക പരാതിയെ തുടർന്നാണ് നിരീക്ഷണ കാമറകൾ സ്ഥാപിക്കാൻ തീരുമാനിച്ചത്. കോവളം ജംഗ്ഷൻ, ആഴാകുളം, ലൈറ്റ്ഹൗസ് എന്നിവിടങ്ങൾ കേന്ദ്രീകരിച്ച് അറുപതോളം നിരീക്ഷണ കാമറകൾ സ്ഥാപിച്ചു. ഇതിന്‍റെ മോണിറ്റർ കോവളം പോലീസ് സ്റ്റേഷനിൽ സ്ഥാപിച്ചു. കാമറകൾക്ക് തകരാർ ഉണ്ടാകുന്പോൾ തുടക്കത്തിൽ അറ്റകുറ്റപ്പണികൾക്കായി ബന്ധപ്പെട്ട ഏജൻസിയിൽ നിന്ന് ജീവനക്കാർ എത്തിയിരുന്നു. ഇപ്പോൾ അതും ഇല്ലാതായി. ആറ് മാസമായി എല്ലാ കാമറകളും പൂർണമായി പ്രവർത്തനരഹിതമായതായി അധികൃതർ പറയുന്നു. ഇതോടൊപ്പം സഞ്ചാരികൾക്ക് അപായ സൂചന നൽകിയിരുന്ന അലാറവും നിശബ്ദമായിട്ട് മാസങ്ങൾ പലതു കഴിഞ്ഞു. രണ്ട് കിലോമീറ്ററിലധികം ദൂരത്തിൽ വിശാലമായിക്കിടക്കുന്ന മൂന്ന് ബീച്ച് കൾ ചേർന്നതാണ് കോവളം തീരം. അപകടം നടക്കുന്ന സ്ഥലത്ത് ലൈഫ് ഗാർഡുമാർക്ക് ഓടിയെത്താനും കടൽക്ഷോഭത്തെക്കുറിച്ച് മുന്നറിയിപ്പ് നൽകാനും കടലിൽ ഇറങ്ങുന്നതിൽ നിന്ന് സഞ്ചാരികളെ വിലക്കാനുമൊക്കെ ഉപയോഗിച്ചിരുന്ന അലാറമാണ് മാസങ്ങളായി നിശബ്ദമായിരിക്കുന്നത്. ഇതിനെതിരെ പരാതികൾ നിരവധി ഉയർന്നെങ്കിലും അധികൃതർക്ക് അനക്കമില്ല.

മാറനല്ലൂരിൽ ഒരാഴ്ചയ്ക്കിടെ പത്തോളം സ്ഥലങ്ങളിൽ മോഷണശ്രമം

മാറനല്ലൂർ: മാറനല്ലൂരിൽ ഒരാഴ്ചയ്ക്കിടെ വ്യാപാരസ്ഥാപനങ്ങളുൾപ്പെടെ പത്തോളം സ്ഥലങ്ങളിൽ മോഷണശ്രമം. മാറനല്ലൂരിൽ മോഷണക്കേസുകൾ വർധിക്കുന്നതും അതേസമയം പ്രതികളെ പിടികൂടാൻ വൈകുന്നതും നാട്ടുകാരിൽ ഭീതി ഉയർത്തുന്നു. കഴിഞ്ഞ ദിവസം രാത്രി ആളില്ലാത്ത മൂന്ന് വീടുകൾ കുത്തിത്തുറന്നതാണ് ഏറ്റവും ഒടുവിലത്തേത്. മൂന്നിടത്തും വിലപിടിപ്പുള്ള സാധനങ്ങൾ നഷ്ടപ്പെടാത്തതു കാരണം ആരുംതന്നെ പരാതിപ്പെട്ടിട്ടില്ല. കഴിഞ്ഞ14നാണ് മാറനല്ലൂർ പഞ്ചായത്ത് ഓഫീസിനു സമീപത്തെ ബേക്കറിയിലും, പുന്നാവൂരിൽ പ്രവർത്തിക്കുന്ന മാവേലിസ്റ്റോറിലും വെളിയംകോട് പ്രവർത്തിക്കുന്ന രണ്ട് കടകളിലും ചെന്നിയോട്ടെ ആളില്ലാത്ത വീട്ടിലും മോഷണം നടന്നത്. ഇതിൽ മാവേലിസ്റ്റോറിൽനിന്ന് 18000 രൂപയും ചെന്നിയോട്ടെ ചന്ദ്രന്‍റെ വീട്ടിൽനിന്ന് മൂന്നുപവൻ തൂക്കം വരുന്ന മാലയും നഷ്ടപ്പെട്ടു. സ്‌കൂട്ടറിൽ ഹെൽമെറ്റ് ധരിച്ചെത്തിയ രണ്ടുപേരാണ് ഇവിടങ്ങളിൽ മോഷണം നടത്തിയതെന്ന് പോലീസ് കണ്ടെത്തിയിരുന്നു. ഇവർ ഉപയോഗിച്ചിരുന്ന സ്‌കൂട്ടർ കടയ്ക്കാവൂരിൽനിന്നു മോഷ്ടിച്ചതാണെന്ന് പോലീസ് പറയുന്നു. കഴിഞ്ഞ ദിവസം ഈ വാഹനം റെയിൽവേ സ്റ്റേഷനു സമീപം ഉപേക്ഷിക്കപ്പെട്ടനിലയിൽ കണ്ടെത്തി. പ്രതികളെ പോലീസ് തെരയുന്നതിനിടെയാണ് രാത്രി കൂവളശേരിയിലെ ആളില്ലാത്ത മൂന്ന് വീടുകളിൽ മോഷണം നടന്നത്. കൂവളശേരി മാധവത്തിൽ റിട്ട. എസ്പി എൻ. ജയകുമാറിന്‍റെ വീടിന്‍റെ പുറകുവശത്തുള്ള വാതിൽ കുത്തിപ്പൊളിച്ചെങ്കിലും അകത്തു കടക്കാനായിട്ടില്ല. ഇതിനു സമീപത്തായി പ്രേമചന്ദ്രന്‍റെ ഉടമസ്ഥതയിലുള്ള ഡോ. ജിതിൻ രാജ് വാടകയ്ക്കു താമസിക്കുന്ന വീടിന്റെ പുറകുവശത്തെ വാതിൽ കുത്തിപ്പൊളിച്ച് അകത്തുകയറി പൂട്ടിയിരുന്ന അലമാരയും മേശയും ഉൾപ്പെടെ പരിശോധിച്ചു. മുറിയിൽ മേശപ്പുറത്ത് സൂക്ഷിച്ചിരുന്ന 10000 രൂപ വിലപിടിപ്പുള്ള വാച്ചും ചാക്കിൽകെട്ടി സൂക്ഷിച്ചിരുന്ന പാത്രങ്ങളും നഷ്ടപ്പെട്ടിട്ടുണ്ട്. ഈ വീടിനു സമീപത്തായി റിട്ട. അധ്യാപകനായ ജോസിന്‍റെ വീട്ടിൽ മുകളിലത്തെ നിലയിലൂടെ അകത്ത് പ്രവേശിച്ച മോഷ്ടാക്കൾ സാധനങ്ങളെല്ലാം വലിച്ചുവാരിയിട്ടെങ്കിലും ഒന്നും നഷ്ടപ്പെട്ടില്ല. ഇവർ വ്യാഴാഴ്ച രാത്രി ഒൻപതിനാണ് വീട് പൂട്ടി പുറത്തേക്കു പോയത്. രാത്രി 12 ന് തിരിച്ചെത്തിയ ഇവർ വീടിന്‍റെ മുൻവശത്തെ വാതിൽ തുറക്കാൻ കഴിയാതെവന്നതിനെത്തുടർന്ന് പുറകുവശത്തുപോയി നോക്കിയപ്പോഴാണ് വാതിൽ തുറന്നുകിടക്കുന്നതും മോഷണശ്രമം നടന്നതായും കണ്ടെത്തിയത്. അതിനിടെ മാറനല്ലൂർ പോലീസ് സ്റ്റേഷനിലെ അംഗബലത്തിന്‍റെ കുറവ് പോലീസിനു പലപ്പോഴും വെല്ലുവിളിയാകുന്നു. പഞ്ചായത്തിലെ പ്രശ്‌നബാധിത പ്രദേശങ്ങളിൽ മിക്കപ്പോഴും റോന്ത് ചുറ്റൽ പതിവാക്കിയതുകാരണം ചിലയിടങ്ങളിൽ രാത്രികാലത്ത് പോലീസിന് എത്തിച്ചേരാൻ കഴിയുന്നില്ല. ഗ്രേഡ് എസ്ഐമാർ രണ്ടുപേർ വിരമിച്ചെങ്കിലും പുതുതായി ആരെയും അനുവദിച്ചിട്ടില്ല. വനിതാ സീനിയർ സിവിൽ പോലീസ് ഓഫീസർമാരായ രണ്ടുപേരും സിപിഒമാരായി 12 പേരും മാത്രമാണ് സ്റ്റേഷനിലുള്ളത്.

പോലീസ് ഉദ്യോഗസ്ഥനെ കുത്തിപ്പരിക്കേല്‍പ്പിച്ചയാളെ പിടികൂടി

മെഡിക്കല്‍കോളജ്: വാഹനപാര്‍ക്കിംഗുമായി ബന്ധപ്പെട്ട തർക്കത്തെ തുടർന്ന് പോലീസ് ഉദ്യോഗസ്ഥനെ കുത്തിപ്പരിക്കേല്‍പ്പിച്ചയാളെ പിടികൂടി. കല്ലമ്പള്ളി ചേന്തി റസിഡൻസ് അസോസിയേഷന്‍ ഹൗസ് നമ്പര്‍ 100 എഫ് ഐശ്വര്യ ഭവനില്‍ സജീവ് (45) ആണ് പിടിയിലായത്. വെള്ളിയാഴ്ച രാത്രി 10 നാണ് വലിയതുറ സ്റ്റേഷനിലെ സിവില്‍പോലീസ് ഓഫീസറായ ഉള്ളൂര്‍ പമ്പ്ഹൗസിന് പിറകുവശം വയലരികം മുറിയില്‍ മനുവിനെ (38) പ്രതി കുത്തിപ്പരിക്കേല്‍പ്പിച്ചത്. തന്‍റെ വീടിനു മുന്നില്‍ സജീവ് പാര്‍ക്ക് ചെയ്തിരുന്ന ബൈക്ക് എടുത്തുമാറ്റാന്‍ മനു ആവശ്യപ്പെട്ടതോടെയാണ് ഇരുവരും തമ്മില്‍ തര്‍ക്കം തുടങ്ങിയത്. പ്രകോപിതനായ പ്രതി അരയില്‍ തിരുകിയിരുന്ന കത്തിയെടുത്ത് മനുവിന്‍റെ നെഞ്ചിലും കഴുത്തിലും കുത്തിപ്പരിക്കേല്‍പ്പിക്കുകയായിരുന്നു. മനുവിനെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചു. അന്വേഷണത്തില്‍ പ്രതി സജീവാണെന്ന് തിരിച്ചറിഞ്ഞതോടെയാണ് ഇയാളെ പാറോട്ടുകോണത്തെ സുഹൃത്തിന്‍റെ വീട്ടില്‍നിന്നു മെഡിക്കൽ കോളജ് പോലീസ് കസ്റ്റഡിയിലെടുത്തത്. എറണാകുളം നോര്‍ത്ത്, മണ്ണന്തല, തിരുവനന്തപുരം മെഡിക്കല്‍കോളജ് സ്റ്റേഷനുകളില്‍ നിരവധി ക്രിമിനല്‍ക്കേസുകളിലെ പ്രതിയാണ് സജീവ്. സിഐ ബി.എം ഷാഫി, എസ് പിഎല്‍ വിഷ്ണു, ഗ്രേഡ് എസ്‌സിപിഒമാരായ ബല്‍റാം, വിനോദ്, സിപിഒ ഷഹനാസ് എന്നിവരാണ് കേസന്വേഷിച്ചത്. കോടതിയില്‍ ഹാജരാക്കിയ പ്രതി റിമാന്‍ഡിലാണ്.

രാപകൽ സമരം അവസാനിച്ചു

നെയ്യാറ്റിന്‍കര : പെരുങ്കടവിള കമ്മ്യുണിറ്റി ഹെൽത്ത് സെന്‍ററിനെ സംരക്ഷിക്കണമെന്ന് ആവശ്യപ്പെട്ട് യൂത്ത്‌ കോൺഗ്രസ്‌ പെരുങ്കടവിള ജംഗ്ഷനിൽ നടത്തിയ രാപ്പകൽ സമരം അവസാനിച്ചു. കമ്മ്യൂണിറ്റി ഹെൽത്ത് സെന്‍ററിൽ ഡോക്ടർമാർ ഉൾപ്പെടെയുളള ജീവനക്കാരുടെ ഒഴിവുകൾ നികത്തുക, ക്ലിനിക്കൽ ലാബും മെഡിക്കൽ സ്റ്റോറും 24 മണിക്കൂറും പ്രവർത്തിപ്പിക്കുക, മരുന്നുകൾ മെഡിക്കൽ സ്റ്റോറിൽ ലഭ്യമാക്കുക, കിടത്തി ചികിൽസ പുന:രാരംഭിക്കുക. 3000 സ്ക്വയർ ഫീറ്റിൽ നിർമി കെട്ടിടത്തിലെ അഴിമതി വിജിലൻസിനെ കൊണ്ട് അന്വേഷിപ്പിക്കുക, റോഡ് നിർമാണത്തിലെ അപാകതകൾ പരിശോധിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. എഐസിസി അംഗം നെയ്യാറ്റിൻകര സനൽ, പിസിസി സെക്രട്ടറിമാരായ ഡോ. ആർ വത്സലൻ, അഡ്വ. പ്രാണകുമാർ, പ്രവാസി കോൺഗ്രസ് സംസ്ഥാന പ്രസിഡന്‍റ് എൽ.വി അജയകുമാർ, നേതാക്കളായ മാരായമുട്ടം സുരേഷ്, മാരായമുട്ടം എം.എസ് അനിൽ, ജെ. ജോസ് ഫ്രാങ്ക്ളിന്‍ എന്നിവര്‍ സംബന്ധിച്ചു.

സ്‌നാപക യോഹന്നാന്‍ ദേവാലയ തിരുനാളിന് കൊടിയേറി

വെള്ളറട: മണിവിള വിശുദ്ധ സ്‌നാപക യോഹന്നാന്‍ ദേവാലയ തിരുനാളിന് കൊടിയേറി. 31 വരെ വൈകുന്നേരം 6 നു ജപമാല. തുടര്‍ന്ന് വിശുദ്ധ കുര്‍ബാന, സ്‌നേഹവിരുന്ന് എന്നിവ ഉണ്ടായിരിക്കും. ഇടവക വികാരി റവ.ഫാ. റോബിന്‍ സി. പീറ്റര്‍ തിരുനാള്‍ കൊടിയുയര്‍ത്തി. സഹവികാരി ഫാ. രമേശ് രാജമണി, വിനയഭവന്‍ സിസ്‌റ്റേഴ്‌സ്, ഇടവകാംഗങ്ങള്‍ എന്നിവർ പങ്കെടുത്തു.

സ്കൂട്ടർ മോഷണം: യുവാവ് പിടിയിൽ

പേരൂര്‍ക്കട: വീടിനു മുന്നില്‍ പാര്‍ക്ക് ചെയ്തിരുന്ന ഹോണ്ട ഡിയോ സ്‌കൂട്ടര്‍ മോഷ്ടിച്ച യുവാവിനെ തമ്പാനൂര്‍ പോലീസ് പിടികൂടി. കുടപ്പനക്കുന്ന് മേരിഗിരി സ്വദേശി മണക്കാട് ബലവാന്‍ നഗര്‍ ബിഎന്‍ആര്‍എ 59ല്‍ വാടകയ്ക്കു താമസിക്കുന്ന അബിഷിക്ത് (18) ആണ് പിടിയിലായത്. കഴിഞ്ഞ ദിവസമാണ് തൈക്കാട് ശാന്തികവാടത്തിനു സമീപം താമസിക്കുന്ന സ്‌കൂട്ടര്‍ ഉടമ പോലീസില്‍ പരാതി നല്‍കിയത്. സിസിടിവി ദൃശ്യങ്ങള്‍ പരിശോധിച്ചതില്‍ നിന്ന് അബിഷിക്ത് ഉള്‍പ്പെട്ട മൂന്നംഗസംഘമാണ് മോഷണത്തിനു പിന്നിലെന്നു കണ്ടെത്തി. പ്രതിക്കൊപ്പം കവര്‍ച്ചയ്ക്ക് ഉണ്ടായിരുന്ന അനന്തുവിനെ കഴക്കൂട്ടത്ത് ഒരു കേസുമായി ബന്ധപ്പെട്ട് പോലീസ് പിടികൂടുകയുണ്ടായി. മൂന്നാമന്‍ 17വയസുകാരനാണ്. മോഷണവണ്ടി നമ്പര്‍പ്ലേറ്റ് മാറ്റി പ്രതികള്‍ ഉപയോഗിച്ചു വരികയായിരുന്നു. തമ്പാനൂര്‍ സി.ഐ ജിജുകുമാര്‍, എസ്ഐ ബിനു മോഹന്‍, എസ്‌സിപിഒമാരായ ജയനാരായണ്‍, ഷിബു, ശ്രീരാഗ്, സിപിഒ അനു കൃഷ്ണന്‍ എന്നിവര്‍ ചേര്‍ന്നു പിടികൂടിയ അബിഷിക്തിനെ കോടതിയില്‍ ഹാജരാക്കി റിമാന്‍ഡ് ചെയ്തു. 17കാരനെ ജുവനൈല്‍ കോടതിയില്‍ ഹാജരാക്കി.

കാല്‍ വഴുതി കടലില്‍ വീണ യുവാവിനായുള്ള തെരച്ചില്‍ രണ്ടാം ദിവസവും വിഫലം

വലിയതുറ: വലിയതുറ കടല്‍പ്പാലത്തില്‍ നിന്നും കാല്‍ വഴുതി കടലില്‍ വീണ മത്സ്യത്തൊഴിലാളിക്കായുളള തെരച്ചില്‍ രണ്ടാം ദിവസവും വിഫലം. മുട്ടത്തറയിലെ പ്രത്യാശ ഫ്‌ളാറ്റില്‍ താമസിക്കുന്ന വലിയതുറ ഫ്രണ്ട്‌സ് റോഡ് കര്‍മലമാതാ കുരിശടിക്കു സമീപം ജോണ്‍സന്‍റെയും മെറ്റിയുടെയും മകന്‍ റോബിനെ (32) ആണ് കടലില്‍ വീണ് കാണാതായത്. വെളളിയാഴ്ച രാവിലെ 11.35 നാണ് അപകടം സംഭവിച്ചത്. വലിയതുറ സ്വദേശി അരുളപ്പന്‍റെ ഉടമസ്ഥതയിലുളള വളളത്തില്‍ റോബിനും മറ്റ് അഞ്ചുതൊഴിലാളികളുമായി വിഴിഞ്ഞം തീരത്ത് പുലര്‍ച്ചെ അഞ്ചിനായിരുന്നു മീന്‍പിടിക്കുന്നതിനായി പോയത്. കടല്‍പ്പാലത്തിന്‍റെ കടലിലേയ്ക്ക് തളളിനില്‍ക്കുന്ന ഭാഗത്ത് കെട്ടിയിട്ടുളള റോപ്പിലൂടെ മീനുമായി മുകളിലെത്തിയശേഷം പാലത്തിന്‍റെ അറ്റത്തേക്കു നടന്നുപോകവേ കാല്‍ വഴുതി കടലില്‍ വീണ് കാണാതായി എന്നാണ് ഒപ്പമുളളവര്‍ പോലീസില്‍ നല്‍കിയ വിവരം. സംഭവം നടന്നയുടന്‍ തന്നെ വിഴിഞ്ഞം കോസ്റ്റല്‍ പോലീസും മറൈൻ എന്‍ഫോഴ്‌സ്‌മെന്‍റും കോസ്റ്റ് ഗാര്‍ഡും സംയുക്തമായി വെളളിയാഴ്ച വൈകിട്ട്6വരെ തെരച്ചില്‍ നടത്തിയെങ്കിലും റോബിനെ കണ്ടെത്താന്‍ കഴിഞ്ഞില്ല. തുടര്‍ന്ന് ഇന്നലെ രാവിലെ 7 മുതല്‍ വൈകുന്നേരം 6.30 വരെയും ബോട്ടുപയോഗിച്ച് തെരച്ചില്‍ നടത്തിയിരുന്നു.

ജനവാസ മേഖലയിലിറങ്ങിയ കാട്ടുപോത്ത് സ്കൂട്ടർ തകർത്തു

വിതുര: വനത്തിൽ നിന്ന് ജനവാസ മേഖലയിൽ ഇറങ്ങിയ കാട്ടുപോത്ത് നിർത്തിയിരുന്ന സ്കൂട്ടർ ചവിട്ടി മറിച്ചു. മാതൃകാ കർഷകൻ തച്ചൻകോട് മനോഹരൻനായരുടെ ആക്ടീവ സ്കൂട്ടറിനാണ് കേടു പറ്റിയത്. വിനോബയ്ക്ക് സമീപം വനത്തിനോട് ചേർന്ന ജനവാസ മേഖലയിൽ കഴിഞ്ഞ രണ്ടു ദിവസമായി കാട്ടുപോത്തിനെ കണ്ടിരുന്നു. കാട്ടുപോത്തിനെ കാട്ടിലേക്ക് ഓടിച്ചു വിടാൻ വനപാലകർ ശ്രമിക്കവെ പോത്ത് വിനോബയിലൂടെ കാരയ്ക്കാൻതോടിലേക്ക് പായുകയായിരുന്നു. തച്ചൻകോട്ടുള്ള കൃഷിയിടത്തിനു സമീപത്തെ റോഡരികിലാണ് മനോഹരൻനായർ സ്കൂട്ടർ നിർത്തിയിരുന്നത്. ഓട്ടത്തിനിടയിൽ പോത്ത് സ്കൂട്ടർ ചവിട്ടി മറിക്കുകയായിരുന്നു.

അയിരുപ്പാറ ശങ്കരൻ വധം: പ്രതിക്ക് ജീവപര്യന്തം കഠിനതടവും പിഴയും

തിരുവനന്തപുരം: ഉത്രാട ദിവസം രാത്രിയിൽ അയിരുപ്പാറ ജംഗ്ഷനിൽ വച്ച് സിഐടിയു പ്രവർത്തകനായ ശങ്കരൻ എന്ന രാജേന്ദ്രനെ വെട്ടി കൊലപ്പെടുത്തിയ കേസിൽ ഒന്നാം പ്രതിക്ക് ജീവപര്യന്തം കഠിനതടവും ഒരു ലക്ഷം രൂപ പിഴയും വിധിച്ചു. ഉളിയാഴ്ത്തുറ വില്ലേജിൽ അരുവിക്കര കോണം ചിറ്റൂർ പൊയ്ക വീട്ടിൽ കുട്ടൻ എന്ന സുനിലി (48) നെ ആണു ശിക്ഷിച്ചത്. തിരുവനന്തപുരം ഏഴാം അഡീഷണൽ സെഷൻസ് ജഡ്ജി വി. അനസിന്‍റേതാണ് ഉത്തരവ്. 2003 സെപ്റ്റംബർ എട്ടിനാണ് സംഭവം. അയിരൂപ്പാറ ജംഗ്ഷനിൽ സ്ഥിരമായി പ്രശ്നങ്ങൾ സൃഷ്ടിക്കാറുള്ള പ്രതിയെ മരണപ്പെട്ട ശങ്കരൻ ഒരു വർഷം മുൻപ് ഉപദ്രവിച്ചതിലുള്ള വിരോധത്താൽ ഉത്രാട ദിവസം രാത്രി അയിരൂപ്പാറ ജംഗ്ഷനിലുള്ള പഞ്ചായത്ത് കിണറിനു സമീപം വച്ചു പ്രതി വാളു കൊണ്ട ് കഴുത്തിൽ വെട്ടി കൊലപ്പെടുത്തിയെന്നാണു കേസ്. പോത്തൻകോട്, കഴക്കൂട്ടം പോലീസ് സ്റ്റേഷനുകളിൽ പതിനേഴോളം കേസുകളിൽ പ്രതിയാണ് ശിക്ഷിക്കപ്പട്ട പ്രതി. ഈ കേസിൽ നേരത്തെ ജാമ്യമെടുത്ത് ഒളിവിൽ പോയ പ്രതിയെ പോലീസ് ഈ വർഷമാണു പിടികൂടിയത്. ഈ കേസിൽ രണ്ട ു മുതൽ അഞ്ചുവരെ പ്രതികളെ തെളിവുകളുടെ അഭാവത്തിൽ നേരത്തെ വെറുതേ വിട്ടിരുന്നു. പ്രോസിക്യൂഷന് വേണ്ട ി പബ്ലിക് പ്രോസിക്യൂട്ടർ കെ. വേണി ഹാജരായി.

ലേലം ചെയ്യാൻ തീരുമാനിച്ച വീട്ടിൽ താമസം തുടങ്ങി കുടുംബം: തത്കാലം നടപടി വേണ്ടെന്ന് ബാങ്ക്

പേരൂര്‍ക്കട: ലേല നടപടികള്‍ക്കായി ബാങ്ക് തീരുമാനിച്ചിരുന്ന വീട്ടില്‍ വീട്ടമ്മയും കുടുംബവും താമസം ആരംഭിച്ചു. അതേസമയം തല്‍ക്കാലം നടപടി വേണ്ട എന്ന നിലപാടിലാണ് ബാങ്ക് അധികൃതര്‍. വാഴോട്ടുകോണം മൂന്നാംമൂട് മഞ്ചംപാറ ആനി ഭവനില്‍ സൂസി ജോര്‍ജ് ആണ് സ്വന്തം വീട്ടില്‍ കുടുംബത്തിനൊപ്പം വര്‍ഷങ്ങള്‍ക്കുശേഷം താമസം തുടങ്ങിയത്. 2014ല്‍ സൂസി ജോര്‍ജ് വട്ടിയൂര്‍ക്കാവ് അര്‍ബന്‍ കോ-ഓപ്പറേറ്റീവ് ബാങ്കില്‍ നിന്നു 9.5 ലക്ഷം രൂപ വായ്പയെടുത്തിരുന്നു. 10 വര്‍ഷംകൊണ്ട് പണം തിരിച്ചടയ്ക്കണമെന്നതായിരുന്നു വ്യവസ്ഥ. എന്നാല്‍ കോവിഡ് കാലത്ത് തവണയില്‍ മുടക്കം വരികയുണ്ടായി. മൊത്തം 14 ലക്ഷം രൂപയാണ് വീട്ടമ്മയ്ക്കു ബാങ്കില്‍ അടയ്ക്കാന്‍ സാധിച്ചത്. മുഴുവന്‍ തുകയും അടച്ചുതീര്‍ക്കാതെ വന്നതോടെ രണ്ടരവര്‍ഷത്തിനു മുമ്പ് ബാങ്ക് അധികൃതര്‍ ജപ്തിനോട്ടീസ് പതിച്ചു. ഇതിനെത്തുടര്‍ന്ന് ബന്ധുവീടുകളിലാണ് സൂസിയും ഭര്‍ത്താവും മകളും താമസിച്ചുവന്നിരുന്നത്. അതിനിടെ മുതലും പലിശയും ലഭിക്കാതെ വന്നതോടെ ബാങ്ക് ലേല നടപടികളിലേക്കു നീങ്ങി. ഇതിനിടെയാണ് സൂസി കുടുംബത്തോടൊപ്പം കഴിഞ്ഞദിവസം വീട്ടില്‍ താമസം ആരംഭിച്ചത്. ബാങ്ക് അധികൃതര്‍ തടസവുമായി എത്തിയാല്‍ ആത്മഹത്യ ചെയ്യുമെന്ന നിലപാടിലായിരുന്നു ഇവർ. വിവരമറിഞ്ഞ ബാങ്ക് അധികൃതര്‍ 15 ദിവസത്തേക്ക് നടപടിയെടുക്കേണ്ടതില്ലെന്ന തീരുമാനത്തിലാണ്. അതേസമയം ബാങ്കുമായി ഒത്തുതീർപ്പിനുള്ള ശ്രമവും ആരംഭിച്ചിട്ടുണ്ട്.

ദുബായില്‍ നിന്നും എത്തിയ യുവാവിനെ മർദിച്ചു: പ്രതികൾ റിമാൻഡിൽ

മർദിച്ചത് സ്വർണം ഉണ്ടെന്ന് തെറ്റിദ്ധരിച്ച് വലിയതുറ: ദുബായില്‍ നിന്നും എത്തിയ യുവാവിന് തിരുവനന്തപുരം അന്താരാഷ്ട്ര വിമാനത്താവളത്തിലെ ടെര്‍മിനലിനുമുന്നില്‍ സ്വര്‍ണം പൊട്ടിക്കല്‍ സംഘത്തിന്‍റെ ക്രൂര മര്‍ദനം. സംഭവവുമായി ബന്ധപ്പെട്ട് സംഘത്തിലുണ്ടായിരുന്ന വളളക്കടവ് സ്വദേശികളായ നാലുപേരെ വലിയതുറ പോലീസ് അറസ്റ്റ് ചെയ്തു. സനീര്‍ (39) , സിയാദ് (24) , മാഹീന്‍ (34) , ഹക്കിം (31) എന്നിവരാണ് പിടിയിലായത്. യുവാവിന്റെ പക്കല്‍ സ്വര്‍ണം ഉണ്ടെന്ന് തെറ്റിദ്ധരിച്ചാണ് സ്വര്‍ണം പൊട്ടിക്കല്‍ സംഘത്തിലെ നാലുപേര്‍ ചേര്‍ന്ന് മര്‍ദിച്ചവശനാക്കിയത്. സ്വര്‍ണം കിട്ടാത്തതിനെത്തുടര്‍ന്ന് സംഘം യുവാവിന്റെ കൈവശമുണ്ടായിരുന്ന മൊബബെല്‍ ഫോണ്‍ തട്ടിപ്പറിച്ച് രക്ഷപ്പെടുകയായിരുന്നു. യുവാവിനെ മര്‍ദിക്കുന്നതുകണ്ട് ഒപ്പമുണ്ടായിരുന്ന ഓയൂര്‍ സ്വദേശിനി ഓടി രക്ഷപ്പെടുകയായിരുന്നു. വ്യാഴാഴ്ച പുലര്‍ച്ചെ 3.10 ഓടെ ദുബായില്‍നിന്ന് എയര്‍ ഇന്ത്യ എക്‌സ്പ്രസ് വിമാനത്തിലെത്തിയ തൃശൂര്‍ മുല്ലശ്ശേരി എലവളളി ചേവാക്ഷേത്രത്തിനു സമീപം താമസിക്കുന്ന വിനൂപിനാണ് മർദനമേറ്റത്. എമിഗ്രേഷന്‍ നടപടികള്‍ പൂര്‍ത്തിയാക്കി 3.40 ന് പുറത്തിറങ്ങിയ വിനൂപിനെ ടെര്‍മിനലിലെ പാര്‍ക്കിങ് ഏരിയയിലായിരുന്നു സംഘം തടഞ്ഞുവെച്ച് മര്‍ദിച്ചത്. ദുബായില്‍ നിന്നും തന്നയച്ച സ്വര്‍ണം തരാന്‍ ആവശ്യപ്പെട്ടു. തന്‍റെ പക്കല്‍ സ്വര്‍ണമില്ലെന്ന് അറിയിച്ചതോടെ ഇവര്‍ വിനൂപിനെ മര്‍ദിക്കുകയായിരുന്നു. സ്വര്‍ണം കിട്ടാതെ വന്നതോടെയാണ് സംഘം വിനൂപിന്‍റെ കൈവശമുണ്ടായിരുന്ന 30, 000 രൂപ വിലവരുന്ന മൊബൈല്‍ ഫോണ്‍ തട്ടിയെടുത്ത് രക്ഷപ്പെട്ടത്. സംഭവത്തിനു ശേഷം വിനൂപ് വിമാനത്താവളത്തിനു പുറത്തുളള പോലീസ് എയ്ഡ്‌പോസ്റ്റില്‍ വിവരമറിയിച്ചു. തുടര്‍ന്ന് വലിയതുറ പോലീസ് സംഘം സ്ഥലത്തെത്തി സിസിടിവി ദൃശ്യങ്ങള്‍ കേന്ദ്രീകരിച്ചു നടത്തിയ പരിശോധനയില്‍ നാലുപേരെ പിടികൂടികയായിരുന്നു. പ്രതികളില്‍ മാഹീനും ഹക്കിമും മാസങ്ങള്‍ക്ക് മുമ്പ് തിരുവനന്തപുരം വിമാനത്താവള പരിസരത്തുനിന്നും ഉമര്‍ എന്ന യുവാവിനെ തട്ടിക്കൊണ്ടുപോയ കേസിലെ പ്രതിയാണ്. കഴിഞ്ഞ ദിവസം കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ജീവനൊടുക്കാൻ പോയി; കണ്ടെത്തിയത് ജീവദായിനി

കോട്ടൂർ സുനിൽ കോട്ടൂർ : 2002ൽ ജോഹന്നാസ് ബർഗിൽ നടക്കുന്ന ഭൗമ ഉച്ചക്കോടി. ചടങ്ങിനെത്തിയ കനേഡിയൻ പ്രധാനമന്ത്രി ജീൻക്രിട്ടിനെ കണ്ടപ്പോൾ ഇങ്ങ് അഗസ്ത്യവനത്തിലെ ഉൾക്കാട്ടിൽ നിന്നും വന്ന കുട്ടിമാത്തൻ എന്ന ആദിവാസി പറഞ്ഞു- ""ഞാൻ കേരളത്തിൽ നിന്നും വന്ന കുട്ടിമാത്തൻ കാണി അങ്ങയെ സ്വാഗതം ചെയ്യുന്നു.'' കനേഡിയൻ പ്രധാനമന്ത്രി കുട്ടിമാത്തൻ കാണിയെ ആലിംഗനം ചെയ്തപ്പോൾ സദസിൽ നിന്നും കനത്ത കരഘോഷം ഉയർന്നു. ആരോഗ്യപച്ച എന്ന അത്ഭുത പച്ചമരുന്ന ലോകത്തിന് സമ്മാനിച്ച കുട്ടിമാത്തൻ കാണി ഇനി ഓർമയിൽ മാത്രം. ലോകത്തിന് വിലപ്പെട്ട സമ്മാനം നൽകിയെങ്കിലും കുട്ടിമാത്തൻ കാണിക്ക് എന്നും പട്ടിണി തന്നയായിരുന്നു ശരണം. ഒടുവിൽ രോഗബാധിതനായി മരണവും. ആദിവാസികളിൽ നിന്നും ആദ്യമായി ഭൗമ ഉച്ചക്കോടിയിൽ പങ്കെടുത്ത ആൾ എന്ന നിലയിൽ കിട്ടിയ പ്രശസ്തി തന്‍റെ പട്ടിണി മാറ്റുന്നില്ല എന്ന വേദനയിലായിരുന്നു ഈ കാണിക്കാരൻ. കൊടും പട്ടിണിയുടെ കാലത്ത് കാട്ടിൽ വനവിഭവങ്ങൾ ഒന്നും കിട്ടാതായപ്പോൾ അഗസ്ത്യവനത്തിലെ ചോനം പാറ സെറ്റിൽമെന്‍റിലെ കുട്ടിമാത്തൻ കാണി എന്ന ആദിവാസി യുവാവ് ഒരു തീരുമാനമെടുത്തു-മരിക്കുക. വീട്ടിൽ ആരേയും അറിയിക്കാതെ ഉൾവനത്തിലേക്ക് പോയി. ആത്മഹത്യ ചെയ്യാനായി കൈതോട് വനത്തിലെ പാറപ്പടവിൽ കയറി. കാട്ടുദൈവങ്ങളെ പ്രാർത്ഥിച്ച് കാണിക്കാർ ചാത്താൻകിളങ്ക് എന്ന് വിളിക്കാറുള്ള ചെടിയുടെ ഇലയും അതിന്‍റെ കായും കഴിച്ച് പാറപ്പുറത്ത് കിടന്നു. സമയം നീണ്ടുപോയിട്ടും മരണം എത്തിയില്ല. അരമണിക്കൂർ കഴിഞ്ഞപ്പോൾ മരണം പ്രതീക്ഷിച്ചുകിടന്ന കുട്ടിമാത്തന് ഒരു ഉന്മേഷം. കാലുകൾക്കും കൈകൾക്കും ഉണർവ്. ചാടിയെണീറ്റ മല്ലന് വിശ്വസിക്കാനായില്ല. ചാവാൻ കഴിച്ച ചാത്താൻ കിളങ്ക് പുതിയ ഉന്മേഷം നൽകുക. താമസിയാതെ ഈ വിവരം ഊരിൽ പരന്നു. അങ്ങിനെ ചാത്താൻ കിളങ്ക് പുതിയ താരമായി മാറി. മരണവിഷമായി കണ്ട ഈ ചാത്താൻ കിഴങ്ങ് പിന്നീട് ലോകപ്പെരുമ നേടിയതും അത് ഊർജ ദായനി ആയതും ചരിത്രം. 1987 ൽ കാട്ടിൽ പഠനത്തിന് വന്ന അന്നത്തെ പാലോട് ബൊട്ടാണിക്കൽ ഗാർഡനിലെ( ഇന്ന് നെഹ്രു ബൊട്ടാണിക്കൽ ഗാർഡൻ) ശാസ്ത്രജ്ഞർ ഇടയ്ക്ക് വിശ്രമിക്കാനായി ഇരുന്നപ്പോഴാണ് കാണിക്കാർ അവിടെ കാണപ്പെടുന്ന ചെടിയുടെ ഇലയും കായും കഴിക്കുന്നത് കണ്ടത്. വിശപ്പടക്കാനും തളർച്ച മാറ്റാനും ആദിവാസികൾ ഉപയോഗിച്ച് വന്നിരുന്ന സസ്യത്തെ ശാസ്ത്രജ്ഞർപറിച്ചെടുക്കുകയും 8 വർഷത്തെ പരീക്ഷണത്തിനുശേഷം അതിൽ നിന്ന് ജീവനി എന്ന ഔഷധം നിർമിക്കുകയും ചെയ്തു. പ്രതിരോധശക്തി വർധിപ്പിച്ച് രക്ത അളവുകൂട്ടാനാണ് ജീവനി ഉപയോഗിച്ചിരുന്നത്. ഇതിനിടെ ആരോഗ്യപച്ച ആഗോളപ്രശസ്തി നേടുകയും കാണിക്കാരെ ശാസ്ത്രസമൂഹം അംഗീകരിക്കുകയും ചെയ്തു. കോയമ്പത്തൂർ ആര്യവൈദ്യഫാർമസിയ്ക്ക് സാങ്കേതികവിദ്യ കൈമാറ്റം നടത്തി . 10 ലക്ഷം രൂപയ്ക്കാണ് ഇൻസ്റ്റിറ്റ്യൂട്ട് ഫാർമസിയ്ക്ക് കൈമാറ്റം നടത്തിയത്. റോയൽറ്റി ഇനത്തിൽ വിറ്റുവരവിന്‍റെ രണ്ടു ശതമാനത്തിന്‍റെ പകുതി കാണിക്കാർക്ക് നൽകാനും ചട്ടമുണ്ടാക്കി. കാണിക്കാർ ഒരു ട്രസ്റ്റ് ഉണ്ടാക്കി ആരോഗ്യപച്ച ക്യഷി ചെയ്യാൻ വൻ പദ്ധതിയാണ് തയ്യാറാക്കിയത്. ഇതിനിടെ ടെക്സാസിലെ കോട്ടൻ വൈറ്റ് ക്ലിനിക്ക് ആൻഡ്് ഹോസ്പിറ്റിലെ ന്യൂറോളജി ഡിപ്പാർട്ടുമെന്‍റിലേയും ടെക്സാസിലെ ഹെൽത്ത് സയൻസ് സെന്‍ററിലേയും ശാസ്ത്രജ്ഞർ കോശങ്ങളിൽ അടിയുന്ന അഴുക്കുകളെ മാറ്റാൻ ഈ സസ്യത്തിന് കഴിയുമെന്ന് കണ്ടെത്തിയതും ആരോഗ്യപച്ചയുടെ പ്രശസ്തി വർധിപ്പിക്കാൻ ഇടയാക്കി. സമുദ്രനിരപ്പിൽ നിന്നും 900 മീറ്റർ മുകളിൽ മാത്രം വളരുന്ന ഈ സസ്യത്തെ കാട്ടിനകത്തേ വളർത്താനാകൂ. ഇലകൾ വേണ്ടത്ര ലഭ്യമല്ലാത്ത അവസ്ഥ വരെ വന്നു. അതിനിടെ സസ്യത്തെ കാട്ടി കൊടുത്ത കുട്ടിമാത്തൻ ഉൾപ്പടെയുള്ളവർക്ക് ഇൻസ്റ്റിറ്റ്യൂട്ടിൽ താൽക്കാലിക ജോലിയും നൽകി. അതിനിടെ പുതുക്കിയ കരാറിനായി ഫാർമസി വീണ്ടും സർക്കാരിനെ സമീപിച്ചു. എന്നാൽ ഫാർമസിയ്ക്ക് കരാർ നൽകിയില്ല. പകരം സർക്കാർ സ്ഥാപനമായ ഔഷധിയ്ക്ക് കരാർ നൽകി. കൃഷി നടത്താനുള്ള നടപടികളൊന്നും സജീവമാകാത്തതോടെ കാണിക്കാർ പതിയെ കൃഷി ഉപേക്ഷിച്ചു തുടങ്ങി. ജീവനി എന്ന ഔഷധം പോലും നിർമിക്കുന്നത് നിറുത്തി. അങ്ങിനെ ആഗോളപ്രശസ്തി നേടിയ ആരോഗ്യപച്ചയ്ക്ക് തളർവാതവും വന്നു. ഇതിനിടെ കുട്ടിമാത്തനെ ജോലിയിൽ നിന്നും പിരിച്ചു വിടുകയും ചെയ്തു. ജോലി നഷ്ടപ്പെട്ടതോടെ കുട്ടിമാത്തന്‍റെ ജീവിതവും തകർന്നു. സദാ ചോർന്നൊലിക്കുന്ന വീട്ടിൽ തന്‍റെ പഴയ ഓർമകൾ അയവിറക്കി ജീവിതം തള്ളി നീക്കിയപ്പോഴാണ് അർബുദം ബാധിക്കുന്നതും ഇന്നലെ മരണം സംഭവിച്ചതും.

കാർ മതിലിലിടിച്ച് രണ്ടു പേർ മരിച്ചു

ചാത്തന്നൂർ: കാർ മതിലിൽ ഇടിച്ച് രണ്ടു പേർ മരിച്ചു. ഒരാൾ ഗുരുതരമായ പരിക്കുകളോടെ ചികിത്സയിലാണ്. റോഡുവിള ഫറുഖ് മൻസിലിൽ മുഹമ്മദ് അലി (23) കരിങ്ങന്നൂർ മോട്ടോർകുന്ന് മുളക് വിള അച്ചൂസിൽ അമ്പാടി സുരേഷ് (23) എന്നിവരാണ് മരിച്ചത്. ഗുരുതരമായി പരിക്കേറ്റ ചെറിയ വെളിനല്ലൂർ ആക്കൽ കമ്പിനിക്കട നഹപ്പിൽ വീട്ടിൽ അഫ്സൻ(23) മിയ്യണ്ണൂരിലെ സ്വകാര്യമെഡിക്കൽ കോളജിൽ ചികിത്സയിലാണ്. വെള്ളിയാഴ്ച അർദ്ധരാത്രിയോടെയായിരുന്നു അപകടം. ഓയൂരിന് സമീപം പയ്യക്കോടിനും തിരുച്ചം കാവിനും ഇടയ്ക്ക് വച്ച് ഇവർ സഞ്ചരിച്ചിരുന്ന നീല മാരുതി സ്വിഫ്റ്റ് കാർ നിയന്ത്രണം വിട്ട് സമീപത്തെ വീടിന്‍റെ മതിലിലിടിക്കുകയായിരുന്നു. ഓടികൂടിയ നാട്ടുകാരും പൂയ്യപ്പള്ളി പോലീസും ചേർന്ന് കാർ വെട്ടി പൊളിച്ചാണ് ഇവരെ പുറത്തെടുത്തത്. മൂന്ന് പേരെയും മിയ്യണ്ണൂരിലെ സ്വകാര്യ മെഡിക്കൽ കോളേജിൽ എത്തിച്ചെങ്കിലും മുഹമ്മദലിയും അമ്പാടിയും മരിച്ചു. ആയൂരിൽ ഇവരുടെ ഒരു സുഹൃത്ത് പുതിയ കടതുടങ്ങുന്നതിന്‍റെ ഒരുക്കങ്ങളിലായിരുന്നു ഇവർ. ഉദ്ഘാടനത്തിനുള്ള സംവിധാനങ്ങൾ ഒരുക്കിയ ശേഷം മറ്റ് കൂട്ടുകാരെ വീടുകളിലെത്തിക്കാനും കാറിന് ഇന്ധനം നിറയ്ക്കാനും വേണ്ടി പോവുകയായിരുന്നു. കാർ അമിത വേഗതയിലായിരുന്നുവെന്ന് പറയുന്നു. പരിക്കേറ്റ് ചികിത്സയിൽ കഴിയുന്ന അഫ്സലിന്‍റേതാണ് കാർ എന്നാണു വിവരം. ബംഗളുരുവിൽ നഴ്സ് ആയ അമ്പാടി സുരേഷ് സുരേഷ് - ദീപ ദമ്പതികളുടെ ഏക മകനാണ്. പരേതനായ സുലൈമാന്‍റെയും സക്കീനയുടെയും മകനാണ് മുഹമ്മദ് അലി. ബിസിനസ് ആയിരുന്നു. സഹോദരൻ മുഹമ്മദ് ഫറൂഖ്. ചികിത്സയിൽ കഴിയുന്ന അഫ്സൻ ബി ടെക് ബിരുദധാരിയാണ്. പൂയപ്പള്ളി പോലീസ് കേസെടുത്തു.

ഡോ.സി.ജി. രാമചന്ദ്രന്‍ നായരുടെ സംസ്കാരം നാളെ

തിരുവനന്തപുരം: കഴിഞ്ഞ ദിവസം അന്തരിച്ച പ്രശസ്ത രസതന്ത്ര ശാസ്ത്രഞ്ജനും കേരള ഭാഷാ ഇന്‍സ്റ്റിറ്റ്യൂട്ടിന്‍റെ നിരവധി ഗ്രന്ഥങ്ങളുടെ രചയിതാവുമായ ഡോ. സി.ജി.രാമചന്ദ്രന്‍ നായരുടെ(93)സംസ്കാരം നാളെ 10.30ന് തൈക്കാട് ശാന്തികവാടത്തില്‍ നടക്കും. മൃതദേഹം തൈക്കാട് ഇലങ്കം നഗറിലെ നെകാരയില്‍ നാളെ രാവിലെ എട്ടു മുതല്‍ പൊതുദര്‍ശനത്തിന് വയ്ക്കും. കേരള സര്‍വകലാശാല രസതന്ത്ര വിഭാഗം മുന്‍ മേധാവിയാണ്. കേരള സര്‍വകലാശാലയില്‍ നിന്നും ഒന്നാം റാങ്കോടെ കെമിസ്ടിയില്‍ ബിരുദാനന്തര ബിരുദം നേടിയ അദ്ദേഹം ബംഗളൂരു യൂണിവേഴ്‌സിറ്റിയില്‍ നിന്നും സ്വർണ മെഡലോടെയാണ് പിഎച്ച്ഡി നേടിയത്. കേരള ഭാഷാ ഇന്‍സ്റ്റിറ്റ്യൂട്ട് ഭരണസമിതിയംഗവും സര്‍വവിജ്ഞാനകോശ ഇന്‍സ്റ്റിറ്റ്യൂട്ട് ഡയറക്ടറുമായിരുന്ന സി.ജി.ആര്‍‌. വിക്രം സാരാഭായ് സ്‌പേസ് സെന്‍ററില്‍ വിസിറ്റിംഗ് കണ്‍സള്‍ട്ടറ്റ്, സെന്‍ട്രല്‍ യൂണിവേഴ്‌സിറ്റി വിസിറ്റിംഗ് പ്രഫസര്‍ തുടങ്ങിയ പല നിലകളിലും പ്രവര്‍ത്തിച്ചിട്ടുണ്ട്. മിക്‌സഡ് മെറ്റല്‍ ഓക്‌സൈഡുകള്‍, ക്വാണ്ടം മെക്കാനിക്‌സ്, സ്റ്റീരിയോ കെമിസ്ട്രി, ലിഗാന്‍ഡ് ഫീല്‍ഡ് തിയറി, സെമി കണ്ട ക്ടിവിറ്റി എന്നിവയിലെ പഠനങ്ങള്‍ അദ്ദേഹത്തെ രാജ്യാന്തര തലത്തില്‍ ശ്രദ്ധേയനാക്കി. ജര്‍മന്‍‌, ഫ്രഞ്ച് ഭാഷകളില്‍ പ്രാവീണ്യമുണ്ടായിരുന്ന അദ്ദേഹം മലയാളത്തില്‍ 24ഉം ഇംഗ്ലീഷില്‍ അഞ്ചും പുസ്തകങ്ങള്‍ രചിച്ചിട്ടുണ്ട്. സ്വദേശി ശാസ്ത്ര പുരസ്‌കാരം നേടിയിട്ടുണ്ട്. ഭാര്യ കെ.ഭാരതി ദേവി രണ്ടു മാസം മുന്‍പാണ് അന്തരിച്ചത്. മക്കള്‍: പരേതയായ ഗിരിജ ദീപക് (ധ്യാപിക, വിവിധ ഇന്‍റര്‍നാഷനല്‍ സ്‌കൂളുകൾ ), ഡോ. രാം കെ. മോഹന്‍ (എന്‍വയണ്‍മെന്‍റല്‍ എന്‍ജിനീയര്‍, യുഎസ്). മരുമക്കള്‍: ദീപക് നായര്‍(ഇന്‍വെസ്റ്റ്‌മെന്‍റ് കണ്‍സള്‍ട്ടന്‍റ്), ഡോ.അപര്‍ണ മോഹന്‍(യുഎസ്).

സ്വകാര്യ ആശുപത്രിയിലെ നഴ്സ് തൂങ്ങി മരിച്ചനിലയില്‍

നെയ്യാറ്റിൻകര : സ്വകാര്യ ആശുപത്രിയിലെ നഴ്സിനെ വാടക വീട്ടില്‍ തൂങ്ങിമരിച്ച നിലയില്‍ കണ്ടെത്തി. കൊല്ലം പള്ളിക്കല്‍ സ്വദേശിനിയായ അഞ്ജലി റാണി (29) യെയാണ് ആറാലുംമൂട്ടിലെ വാടക വീട്ടില്‍ മരിച്ച നിലയില്‍ കണ്ടെത്തിയത്. ഒരു വര്‍ഷം മുന്പ് നെയ്യാറ്റിന്‍കരയിലെ സ്വകാര്യ ആശുപത്രിയില്‍ നഴ്സായി ജോലിയില്‍ പ്രവേശിച്ച അഞ്ജലി ആശുപത്രിയിലെ മൂന്നു ജീവനക്കാരികളോടൊപ്പം ആറാലുംമൂട്ടിലെ വീട്ടില്‍ പേയിംഗ് ഗസ്റ്റായി താമസിച്ച് വരികയായിരുന്നു. നൈറ്റ് ഡ്യൂട്ടി കഴിഞ്ഞ് ഇന്നലെ രാവിലെയാണ് അഞ്ജലി വീട്ടിലെത്തിയത്. മറ്റു മൂവരും ജോലിക്ക് പോയിരുന്നു. അടുത്ത ഡ്യൂട്ടിക്ക് കയറേണ്ട സമയമായിട്ടും അഞ്ജലിയെ കാണാഞ്ഞതിനാല്‍ മറ്റു ജീവനക്കാര്‍ അന്വേഷിച്ച് വീട്ടിലെത്തിയപ്പോഴാണ് മരിച്ച നിലയില്‍ കണ്ടെത്തിയത്. സഹീറാണ് അഞ്ജലിയുടെ ഭര്‍ത്താവ്. ഈ ദന്പതികള്‍ക്ക് ഒരു കുട്ടിയുമുണ്ട്. മുറിയില്‍ നിന്ന് ആത്മഹത്യാക്കുറിപ്പ് കണ്ടെത്തിയിട്ടുണ്ട്.

പൂജപ്പുര ജയിലിലെ അന്തേവാസി മരിച്ചു

തിരുവനന്തപുരം: പൂജപ്പുര സെൻട്രൽ ജയിലിലെ അന്തേവാസി ആശുപത്രിയിൽ ചികിത്സയിലിരിക്കെ മരിച്ചു. കൊല്ലം കൊട്ടാരക്കര സ്വദേശി നാണുവിന്‍റെ മകൻ കുട്ടപ്പൻ (78) ആണ് മരിച്ചത്. വധശ്രമവുമായി ബന്ധപ്പെട്ട് കൊട്ടാരക്കര ജുഡീഷൽ മജിസ്ട്രേറ്റ് കോടതി ഒന്ന് ശിക്ഷ വിധിച്ചതിനെ തുടർന്ന് കുറച്ചുനാളായി പൂജപ്പുര ജയിലിൽ കഴിഞ്ഞു വരികയായിരുന്നു. ശാരീരിക അവശതകളെ തുടർന്ന് കഴിഞ്ഞ 30-നാണ് ഇദ്ദേഹത്തെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്. മൃതദേഹം ആശുപത്രി മോർച്ചറിയിൽ സൂക്ഷിച്ചിട്ടുണ്ട്.

കളഞ്ഞ് കിട്ടിയ പണം ഉടമയ്ക്കു തിരികെനല്‍കി തൊഴിലാളി മാതൃകയായി

പാറശാല: കളഞ്ഞുകിട്ടിയ പണം ഉടമയ്ക്ക് തിരികെ നല്‍കി കുന്നത്തുകാലിലെ ഹോട്ടല്‍ തൊഴിലാളി മാതൃകയായി. കുന്നത്തുകാൽ അമൃത ഹോട്ടലിലെ തൊഴിലാളി നിലമാമൂട് പുന്നക്കര സ്വദേശി പരമശിവം കഴിഞ്ഞദിവസം രാവിലെ പുറത്തുനിന്നും ഹോട്ടലിലേക്കുള്ള പാല്‍ വാങ്ങി മടങ്ങിയെത്തുമ്പോള്‍ ഹോട്ടലിനു മുന്നിലായി തറയില്‍ ഒരു പൊതി കിടക്കുന്നത് യാഥാര്‍ശ്ചിമായി കണ്ടെത്തുകയായിരുന്നു. എടുത്തു തുറന്നു നോക്കിയപ്പോള്‍ 35,000 രൂപയുടെ നോട്ട് കെട്ടുകള്‍. ഇതോടെ തനിക്ക് ലഭിച്ച പണം ഹോട്ടലിലെ കൗണ്ടറില്‍ ഏല്‍പ്പിക്കുകയായിരു ന്നു. ഉച്ചയോടുകൂടി പണം നഷ്ടമായ പുത്തന്‍ചന്ത സ്വദേശി ശേഖരന്‍ എത്തുകയും പരമശിവം ശേഖരനു പണം കൈമാറുകയും ചെയ്തു. കുന്നത്തുകള്‍ മാര്‍ക്കറ്റില്‍ റബര്‍ ഷീറ്റ് വിറ്റശേഷം പണവുമായി ഹോട്ടലില്‍ ഭക്ഷണം കഴിച്ചശേഷം മടങ്ങി പോകുമ്പോഴാണ് ശേഖരനു പണം നഷ്ടമായത്.

ജി. ഗോപിനാഥൻ നായർ സ്മൃതി പുരസ്കാരം സമ്മാനിച്ചു

തിരുവനന്തപുരം: ഐരാണിമുട്ടം തുഞ്ചൻ സ്‌മാരക സമിതിയുടെ സ്ഥാപക ജനറൽ സെക്രട്ടറിയും എഴുത്തച്ഛൻ നാഷണൽ അക്കാദമി സ്ഥാപകനുമായിരുന്ന ജി. ഗോപിനാഥൻ നായരുടെ ഒന്പതാമത് സ്മൃതി ദിനത്തോടനുബന്ധിച്ചു തുഞ്ചൻ സ്‌മാരക സമിതി ഏർപ്പെടുത്തിയിരുന്ന പുരസ്കാരം പ്രമുഖചിത്രകാരനും, സാംസ്കാരിക പ്രവർത്തകനുമായ കാരയ്ക്കാമണ്ഡപം വിജയകുമാറിനു മന്ത്രി അഡ്വ. ജി.ആർ. അനിൽ സമ്മാനിച്ചു. തുഞ്ചൻ സ്മാരക മണ്ഡപത്തിൽ നടന്ന സ്മൃതി വാർഷികാചരണത്തിൽ ഡോ. ടി.ജി. രാമചന്ദ്രൻപിള്ള അധ്യക്ഷത വഹിച്ചു. ഡോ. ജോർജ് ഓണക്കൂർ, പ്രഫ. കാട്ടൂർ നാരായണപിള്ള, ഡോ. വള്ളിക്കാവ് മോഹൻദാസ്, ശ്രീകുമാർ മുഖത്തല, സുധാ ഹരികുമാർ, പി.എ. പിള്ള, ആർ. ഉണ്ണികൃഷ്ണൻ, ആറ്റുകാൽ ജി. കുമാരസ്വാമി, കെ. മുരളീധരൻ തുടങ്ങിയവർ പങ്കെടുത്തു.

മുക്കുപണ്ടം പണയംവച്ച് തട്ടിപ്പ്; അന്വേഷണം ഊര്‍ജിതം

പേരൂര്‍ക്കട: മുക്കുപണ്ടം പണയംവച്ചു തട്ടിപ്പു നടത്തിയതുമായി ബന്ധപ്പെട്ട് കണ്ണികള്‍ക്കായി പേരൂര്‍ക്കട പോലീസ് അന്വേഷണം ഊര്‍ജിതപ്പെടുത്തി. ആഭരണം രൂപപ്പെടുത്തിയതും വില്‍പ്പന നടത്തിയതുമായി ബന്ധപ്പെട്ടുള്ള വ്യക്തികളെയാണു പോലീസ് അന്വേഷിച്ചു വരുന്നത്. വഴയില, മണ്ണാമ്മൂല എന്നിവിടങ്ങളിലെ ഫിനാന്‍സ് സ്ഥാപനങ്ങളില്‍ മുക്കുപണ്ടം പണയംവച്ച് മൂന്നുലക്ഷത്തോളം രൂപ തട്ടിയെടുത്ത സംഭവത്തിലെ സൂത്രധാരനായ അഖില്‍ ക്ലീറ്റസ്, കൂട്ടുപ്രതികളായ പ്രതീഷ്‌കുമാര്‍, സണ്ണി, സ്മിജു സണ്ണി, ഷെജിന്‍ എന്നിവര്‍ ഇപ്പോള്‍ റിമാന്‍ഡില്‍ കഴിയുകയാണ്. അതേസമയം തിരുവനന്തപുരത്ത് പേരൂര്‍ക്കട സ്റ്റേഷന്‍ പരിധിയില്‍ മാത്രമല്ല, മറ്റു സ്റ്റേഷനുകളിലും വേറെ ജില്ലകളില്‍ ഇവര്‍ തട്ടിപ്പു നടത്തിയിട്ടുണ്ടെന്നാണ് പോലീസിന്‍റെ വിലയിരുത്തല്‍. വിവിധ സംഘങ്ങളായി തിരിഞ്ഞു മുക്കുപണ്ടം പണയംവച്ചു തട്ടിപ്പ് നടത്തിയ സംഭവങ്ങള്‍ വെളിച്ചത്തു വരണമെങ്കില്‍ കൂടുതല്‍ പരാതികള്‍ ലഭിക്കേണ്ടതുണ്ട്. വളരെ വൈദഗ്ധമുള്ളവര്‍ക്കു മാത്രം തിരിച്ചറിയാനാകുന്ന വിധത്തിലാണ് ഇവര്‍ മുക്കുപണ്ടത്തിനുമേല്‍ സ്വര്‍ണത്തിനു സമാനമായ ലോഹം പൂശുന്നത്. പ്രതികളെ കസ്റ്റഡിയില്‍ വാങ്ങി തെളിവെടുപ്പു നടത്തിയാല്‍ മാത്രമേ സംഭവത്തിന്‍റെ പൂര്‍ണചിത്രം വ്യക്തമാകുകയുള്ളൂ.

കടം കൊടുത്ത രൂപ തിരികെ ചോദിച്ചതിനു ക്രൂരമര്‍ദനം

വെള്ളറട : കടം കൊടുത്ത പൈസ തിരികെ ചോദിച്ചതിനു വ യോധികയ്ക്കു മൂന്നംഗ സംഘത്തിന്‍റെ ക്രൂരമര്‍ദനം. കിളിയൂര്‍ അതുല്യയില്‍ മോളി (56) യ്ക്കാണു മര്‍ദനമേറ്റത്. ഒപ്പം ഉണ്ടായിരുന്ന ഭര്‍ത്താവ് അശോക(57 )നും മര്‍ദനമേറ്റു. സമീപവാസികളായ സുനില്‍ (40), ബിനു (42), ഇവരുടെ രക്ഷിതാവ് വിജയന്‍ (65) ഇവര്‍ ചേര്‍ന്നാണു മർദിച്ചത്. ക്ഷേമനിധിയില്‍ പൈസ അടച്ച ശേഷം തിരികെ വരുമ്പോഴായിരുന്നു മദ്യലഹരിയില്‍ ആയിരുന്ന മൂന്നംഗസംഘം ക്രൂരമായി മര്‍ദിച്ചത്. ഈ കഴിഞ്ഞ പതിനേഴാം തീയതി ആയിരുന്നു ആക്രമണം. അപ്പോള്‍ തന്നെ വെള്ളറട പോലീസില്‍ വിവരം അറിയിക്കുകയും തുടര്‍ന്ന് വെള്ളറട സര്‍ക്കാര്‍ ആശുപത്രിയിലും അവിടെനിന്ന് നെയ്യാറ്റിന്‍കര താലൂക്ക് ആശുപത്രിയിലും ഇപ്പോള്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. 2,85,000 രൂപയാണ് മോളി-അശോകന്‍ ദമ്പതികള്‍ മൂന്നംഗ സംഘത്തിനു കടം നല്‍കിയത്. ഈ രൂപ കൊടുത്ത സമയം അവര്‍ തന്ന രേഖയായി ചെക്കും പ്രാംസറി നോട്ട് അടക്കം വാങ്ങിയിട്ടുണ്ടായിരുന്നു. പൈസ മടക്കി ചോദിച്ചതിലുള്ള വൈരാഗ്യമാണ് ആക്രമണത്തില്‍ കലാശിച്ചത്. മോളി ഇപ്പോഴും മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

സഹകരണ വകുപ്പ് അന്വേഷണ റിപ്പോർട്ട് : നേമം സഹകരണ ബാങ്കിലെ തിരിമറിക്ക് സ്ഥിരീകരണം

നേമം: സഹകരണ വകുപ്പ് അന്വേഷണ റിപ്പോര്‍ട്ടില്‍ നേമം സര്‍വീസ് സഹകരണ ബാങ്കില്‍ ലക്ഷങ്ങളുടെ തിരിമറി സ്ഥിരീകരി ച്ചു. വകുപ്പന്വേഷണത്തിന്‍റെ അ ന്തിമ റിപ്പോര്‍ട്ടാണ് വിവരാവകാശ നിയമപ്രകാരം പുറത്തായത്. ബാങ്കിലെ സ്ഥിരം ഇടപാടുകാരായ പലരുടെയൂം അക്കൗണ്ടുകൾ വഴി വന്‍ സാമ്പത്തിക തിരിമറികള്‍, ഗൂഢാലോചന, വ്യാജരേഖ നിര്‍മിക്കല്‍ തുടങ്ങിയവ ചൂണ്ടിക്കാട്ടി ക്രിമിനല്‍ നടപടികള്‍ പ്രകാരം പ്രോസിക്യൂട്ട് ചെയ്യുന്നതിനും റിപ്പോര്‍ട്ടില്‍ ശുപാര്‍ശ ചെയ്യുന്നുണ്ട്. ജോയ് എന്ന ഇടപാടുകാരനില്‍നിന്നും മാത്രം 50 ലക്ഷം രൂപയുടെ ഇടപാടും മറ്റ് അംഗങ്ങളുടെ പേരിലുള്ള വായ്പകളില്‍ അഞ്ചുകോടി രൂപയുടെ പൊരുത്തക്കേടുകളുമാണു കണ്ടെത്തിയിട്ടുള്ളത്. സി-ഡാക്ക് എംപ്ലോയീസ് സഹകരണ സംഘം, തിരുവനന്തപുരം പ്രാഥമിക കാര്‍ഷിക ഗ്രാമവികസന ബാങ്ക് തുടങ്ങിയ വിവിധ സഹകരണ സ്ഥാപനങ്ങള്‍ നേമം ബാങ്കില്‍ നിക്ഷേപം നടത്തിയിട്ടുണ്ട്. സാമൂഹിക പെന്‍ഷന്‍ വിതരണത്തിലും പൊരുത്തക്കേടുകള്‍ കണ്ടെത്തിയിട്ടുണ്ട്. ബാങ്കിന്‍റെ ആസ്ഥാന മന്ദിര നിര്‍മാണവുമായി ബന്ധപ്പെട്ട് കരാറുക്കാരനുമായി നടന്ന സാമ്പത്തിക ഇടപാടുകളെ സംബന്ധിച്ച്ു പോലീസ് വിജിലന്‍സ് അന്വേഷണത്തിനും ശുപാര്‍ശയുണ്ട്. പൊതുമേഖല ധനകാര്യ സ്ഥാപനമായ കെഎസ്എഫ്ഇയെ കബളിപ്പിച്ചതായും റിപ്പോര്‍ട്ടിൽ പറയുന്നു. താത്കാലിക ബാക്കി പത്രപ്രകാരം ബാങ്കിന് 34,26, 39,911 രൂപ ബാക്കി നില്‍പ്പുണ്ടെങ്കിലും 15,55,01,195 രൂപ മാത്രമേ നിയമാനുസൃതം തിരികെ പിടിക്കാന്‍ കഴിയൂ. ബാക്കിയുള്ളവ ജാമ്യവ്യവസ്ഥകള്‍ പാലിക്കാത്തതും കാലഹരണപ്പെട്ടതായും പറയുന്നു. കോടികളുടെ ക്രമക്കേടുകള്‍ നടത്തിയ പ്രതികളുടെ വസ്തു വകകള്‍ കണ്ടുകെട്ടി നിക്ഷേപകര്‍ക്ക് നിക്ഷേപം തിരികെ നല്‍കാന്‍ നടപടി വേണമെന്നും സര്‍ക്കാര്‍ ഗ്യാരണ്ടി ബോര്‍ഡില്‍നിന്നും അഞ്ചുലക്ഷം രൂപ വീതം ഓരോ നിക്ഷേപകനും നല്‍കാന്‍ തയാറാകണമെന്നും നിക്ഷേപക കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കണ്‍വീനര്‍ കൈമനം സുരേഷും ആവശ്യപ്പെട്ടു.

വീടുനിർമാണത്തിനു സൂക്ഷിച്ചിരുന്ന വസ്തുക്കൾ കത്തിനശിച്ചു

ഉറിയാക്കോട്: ഉറിയക്കോട് എൽപി സ്‌കൂളിനു സമീപം പ്രബിന്‍റെ ശിവശക്തിയിൽ വാടകയ്ക്ക് താമസിക്കുന്ന സുകൂ (44) വിന്‍റെ ബുള്ളറ്റും ഇലക്ട്രിക് വാഹനവും ഒരു സൈക്കിളും ഉൾപ്പെടെ പുതിയ വീട് നിർമാണത്തിനുവേണ്ടി സൂക്ഷിച്ചിരുന്ന കട്ടിലുകളും കബോർഡുകളും പാത്രങ്ങളും തുടങ്ങി എല്ലാം കത്തി നശിച്ചു. ഇന്നലെ രാവിലെ അഞ്ചരയോ ടെയായിരുന്നു തീപിടിത്തം. വീടിന്‍റെ മുൻവശത്തുണ്ടായ തീപിടിത്തത്തിൽ ജനൽ, വൈദ്യുത വയറിംഗ് എല്ലാം നശിച്ചു. ഇലക്ട്രിക്ക് സ്‌കൂട്ടർ തീപിടിച്ചതാകാം അപകടത്തിന് കാരണമെന്നാണു പ്രാഥമിക നിഗമനം. വലിയ തീപിടിത്ത മായതോടെ പുക പടർന്നു വീട്ടിനുള്ളിലേക്കു കയറുകയും വീട്ടുകാർക്കു ശ്വാസ തടസം നേരിടുകയും ചെയ്തു. വീട്ടിലെ ഇളയ കുട്ടി മെമ്പിൻ സിറ്റൗട്ടിലാണു കിടന്നിരുന്ന ത്. ഈ കുട്ടിയാണ് അസ്വസ്ഥത അനുഭവപ്പെട്ടശേഷം ആദ്യം ഉണർന്നത്. തുടർന്നു സുകു, മജ്റു, മിഥുൻ എന്നിവരും ഉണർന്നു. കണ്ണു കാണാൻ പറ്റാത്തവിധം പുക നിറഞ്ഞു അസ്വസ്ഥത കൂടുകയും വളരെ ശ്രമപെട്ടു വീടിന്‍റെ പിൻവാതിൽ തുറന്നു എല്ലാവരും പുറത്തേക്ക് ഓടി രക്ഷപ്പെടുകയുമായിരുന്നു. ഇതിനു ശേഷം സുകു വീണ്ടും വീട്ടിനുള്ളിലേക്കു കയറി എൽപിജി സിലിണ്ടർ എടുത്തു പുറത്തേക്ക് എറിഞ്ഞു. ഈ സമയം സമീപവാസി സംഭവം കാണുകയും നാട്ടുകാരെ വിളിച്ചു കൂട്ടുകയും ചെയ്തു. തുടർന്നു കാട്ടാക്കട അഗ്നിരക്ഷാസേന, വിളപ്പിൽ പോലീസ് എന്നിവരെയും അറിയിച്ചു. നാട്ടുകാർ രക്ഷാപ്രവർത്തനം നടത്തുന്നതിനിടെ അഗ്നിരക്ഷാ സേനയും എത്തി. തുടന്നു തീ കെടുത്തി. വീടിനുള്ളിൽ ഭിത്തിയിൽ എല്ലാം പുക പിടിച്ചു ഭിത്തി പാളികൾ ഇളകി നശിച്ചു. വീട്ടിൽ സൂക്ഷിച്ചിട്ടുള്ള വസ്ത്രങ്ങളും ക ത്തി നശിച്ചു. തീപിടിച്ച കാർഷിനോടു ചേർന്നുള്ള മുറിയുടെ ജന ചില്ലുകളും തകർന്നു. സമയോചിതമായ ഇടപെടലുണ്ടായ തിനെ തുടർന്നു പെയിന്‍റ് ഉൾപ്പെടെയുള്ള നിർമാണ സാമഗ്രികളെല്ലാം സൂക്ഷിച്ചിരുന്നിടത്തേക്കു തീ പടരാതിരുന്നാൽ വൻ ദുരന്തം ഒഴിവായി.

യുവാവിനെ ആക്രമിച്ചയാള്‍ അറസ്റ്റില്‍

മെഡിക്കല്‍കോളജ്: യുവാവിനെ ആക്രമിച്ചു പരിക്കേല്‍പ്പിച്ചയാളെ കന്‍റോൺമെന്‍റ് പോലീസ് അറസ്റ്റുചെയ്തു. പൂന്തുറ സ്വദേശി കുട്ടു എന്നുവിളിക്കുന്ന അജീഷ് (26) ആണ് അറസ്റ്റിലായത്. ഈമാസം 21-നാണ് കേസിനാസ്പദമായ സംഭവം. വഞ്ചിയൂര്‍ കുന്നുകുഴി ബാര്‍ട്ടണ്‍ ഹില്‍ സ്വദേശി മനോജ് (42) ആണ് ആക്രമണത്തിനിരയായത്. സംഭവദിവസം പാളയം മാര്‍ക്കറ്റിലെത്തിയ മനോജിനെ ഇരുമ്പുചങ്ങല ഉപയോഗിച്ച് അജീഷ് മുഖത്തിടിച്ചു പരിക്കേല്‍പ്പിച്ചുവെന്നായിരുന്നു പരാതി. എന്നാല്‍ പരാതിയില്‍ പറയുന്ന വിധത്തില്‍ ഇടതുകണ്ണിനു താഴെ പൊട്ടലുണ്ടായി എന്നും ആഴത്തിലുള്ള മുറിവുണ്ടായതുമൂലം തുന്നലിടേണ്ടിവന്നുവെന്നുമുള്ളതു പൂർണമായും ഉള്‍ക്കൊള്ളാനാകുന്നതല്ലായിരുന്നുവെന്ന് കന്‍റോൺമെന്‍റ് പോലീസ് പറഞ്ഞു. അതേസമയം വ്യക്തിവിരോധംമൂലം മനോജിനെ പ്രതി ആക്രമിച്ചുവെന്നതു വാസ്തവവുമായിരുന്നു. പോലീസ് അറസ്റ്റുചെയ്തയാളെ പിന്നീട് ജാമ്യത്തില്‍ വിട്ടയച്ചു.

അഴിമതി ആരോപണം : വെള്ളറട പഞ്ചായത്തില്‍ മൂന്നു ജീവനക്കാര്‍ക്ക് സസ്‌പെന്‍ഷന്‍

വെള്ളറട: വെള്ളറട പഞ്ചായത്തില്‍ മെറ്റീരിയല്‍ വര്‍ക്കുമായി ബന്ധപ്പെട്ടു രണ്ടു കോടിയിലധികം രൂപയുടെ തട്ടിപ്പ് നടന്നതായി ഓഡിറ്റ് നടത്തിപ്പില്‍ കണ്ടെത്തിയ സംഭവിത്തിൽ മൂന്നു ജീവനക്കാരെ പഞ്ചായത്ത് ഭരണസമിതി സസ്‌പെന്‍ഡ് ചെയ്തു. ജീവനക്കാരായ ജെ.ജെ. നിവിന്‍, പ്രദീപ്, എസ്. റെജിന്‍ എന്നിവരെയാണു സസ്പെൻഡു ചെയ്തത്. പഞ്ചായത്ത് ഭരണസമിതി മൂന്നു പേരെ സസ്‌പെന്‍ഡ് ചെയ്തതില്‍ പ്രതിപക്ഷവും അനുകൂലിച്ചു. എന്നാല്‍ മൂന്നുപേരുടെ തട്ടിപ്പിനു കൂട്ടുനിന്ന പഞ്ചായത്ത് പ്രസിഡന്‍റ് എം. രാജ്‌മോഹന്‍ രാജിവെക്കണമെന്നു പ്രതിപക്ഷ മെമ്പര്‍മാര്‍ ആവശ്യപ്പെട്ടു. പഞ്ചായത്തില്‍നിന്ന് പ്രസിഡന്‍റ് രാജിവയ്ക്കും വരെയും പ്രതിഷേധ പരിപാടി തുടരുമെന്നു പ്രതിപക്ഷ മെമ്പര്‍മാര്‍ മുന്നറിയിപ്പു നല്‍കുകയും, യോഗം ബഹിഷ്‌കരിച്ച് പഞ്ചായത്തിനു മുന്നില്‍ പ്രതിഷേധ ധര്‍ണ സംഘടിപ്പിക്കുകയും ചെയ്തു. പഞ്ചായത്തംഗം നളിനകുമാര്‍ അധ്യക്ഷത വഹിച്ച യോഗം പ്രതിപക്ഷ നേതാവ് ജ്ഞാനദാസ് ഉദ്ഘാടനം ചെയ്തു. മെമ്പര്‍മാരായ കൂതാളി ഷാജി, പനച്ചമൂട് ഷാം, സുനീഷ്, ശ്രീകല, ശാന്തകുമാരി, ഷീജാ വിന്‍സന്റ്, മേരിക്കുട്ടി തുടങ്ങിയ മെമ്പര്‍മാര്‍ സംസാരിച്ചു. എത്രയും പെട്ടെന്ന് പഞ്ചായത്ത് പ്രസിഡന്‍റ് രാജിവെച്ച് അന്വേഷണത്തെ നേരിടണം എന്നതാണ് പ്രതിപക്ഷ മെമ്പര്‍മാരുടെ ആവശ്യം. ഓഡിറ്റില്‍ കൃത്രിമം കണ്ടതു ശ്രദ്ധയില്‍പ്പെട്ട പ്പോള്‍ തന്നെ പ്രതിപക്ഷം പഞ്ചായത്ത് പ്രസിഡന്‍റിന്‍റെ രാജി ആവശ്യപ്പെട്ട് നിരന്തരം പ്രതിഷേധ പരിപാടികള്‍ നടത്തുതിനിടയാണ് ഭരണസമിതിക്കു രക്ഷപ്പെടുന്നതിനായും മുഖം രക്ഷിക്കുന്നതിനു വേണ്ടി മൂന്നു ജീവനക്കാരുടെ മേല്‍ പഴിചാരിയിരിക്കുന്നതെന്നും പ്രതിപക്ഷം ആരോപിച്ചു. മൂന്നു ജീവനക്കാര്‍ക്ക് മാത്രമായി പഞ്ചായത്തില്‍ വെട്ടിപ്പു നടത്താന്‍ കഴിയുകയില്ലെന്നും ഇതുമായി ബന്ധപ്പെട്ട പേപ്പറുകള്‍ ഒപ്പിട്ടു നല്‍കി കോടികള്‍ തട്ടിയതു പഞ്ചായത്ത് പ്രസിഡന്‍റ് രാജ്‌മോഹനനാണെന്നും പഞ്ചായത്ത് പ്രസിഡന്‍റിന് ഈ അഴിമതിയില്‍ നിന്നു തലയൂരാന്‍ കഴിയുകയില്ലെന്ന് പ്രതിപക്ഷം ആരോപിച്ചു. പാറപോടിയും, പാറവേസ്റ്റും ഉപയോഗിച്ച് പണിത റോഡുകള്‍ തകര്‍ന്നു തുടങ്ങി. വെട്ടിച്ച കോടികള്‍ തിരിച്ചടച്ചു മാത്രക കാണിച്ചില്ലങ്കില്‍ എത്രയും പെട്ടെന്നു പഞ്ചായത്ത് പ്രസിഡന്‍റ് രാജ് മോഹന്‍ രാജി വെച്ച് അന്വേഷണത്തെ നേരിടണം. അല്ലെങ്കില്‍ തുടര്‍ന്നും ശക്തമായ പ്രതിഷേധ പരിപാടികള്‍ സംഘടിപ്പിക്കുമെന്ന് പ്രതിപക്ഷ നേതാവ് ഞാനദാസ് മുന്നറിയിപ്പ് നല്‍കി.

രാഹുൽ മാങ്കൂട്ടത്തിലിന്‍റെ കോലം കത്തിച്ചു

വിഴിഞ്ഞം: ലൈംഗിക പീഡനാരോപണ കേസിൽ പ്രതിയായ രാഹുൽ മാങ്കൂട്ടത്തിൽ എംഎൽഎ സ്ഥാനം രാജി വയ്ക്കണമെന്ന് ആവശ്യപ്പെട്ടു ബിജെപി കോവളം മണ്ഡലം കമ്മിറ്റിയുടെ നേതൃത്വത്തിൽ പ്രവർത്തകർ പ്രതിഷേധപ്രകടനം നടത്തി.രാഹുൽ മാങ്കൂട്ടത്തിന്‍റെ കോലം കത്തിച്ചു. പനങ്ങോടു നിന്നും ആരംഭിച്ച പ്രതിഷേധജാഥ വെങ്ങാനൂർ ജംഗ്ഷനിൽ സമാപിച്ചു. ബിജെപി ദക്ഷിണ മേഖല വൈസ് പ്രസിഡന്‍റ് വെങ്ങാനൂർ ഗോപകുമാർ പ്രതിഷേധ യോഗം ഉദ്ഘാടനം ചെയ്തു. കർഷക മോർച്ച ജില്ലാ പ്രസിഡന്‍റ് പ്രദീപ് പനങ്ങോട്, ന്യൂപക്ഷമോർച്ച ജില്ലാ പ്രസിഡന്‍റ് വിജയ ക്ലമന്‍റ്, ബിജെപി കോവളം മണ്ഡലം വൈസ് പ്രസിഡന്‍റുമാരായ മിനി വേണുഗോപാൽ, ആർ. ഷാൻ രാജ്, ജനറൽ സെക്രട്ടറിമാരായ പി. പ്രവീൺകുമാർ, ഡി. ആനന്ദൻ വെങ്ങാനൂർ, ട്രഷറർ രാജേഷ് മംഗ്ലാവിൽ, പഞ്ചായത്ത് കമ്മിറ്റി ഭാരവാഹികളായ അനൂപ്, അനന്തു, അമ്പാടി വിജയൻ, തുടങ്ങിയവർ പരിപാടിയിൽ പങ്കെടുത്തു.

സാഹിത്യകാരന്‍ ഡോ. എസ്.വി. മൂന്നാം സ്മൃതി സായാഹ്നം ഇന്ന്

നെയ്യാറ്റിൻകര: കഥാകൃത്ത് ഡോ.എസ്.വി വേണുഗോപൻനായരുടെ മൂന്നാം സ്മൃതി വാര്‍ഷിക ദിനത്തോടനുബന്ധിച്ച് എസ്.വി ഫൗണ്ടേഷന്‍റെ ആഭിമുഖ്യത്തില്‍ ഇന്ന് അനുസ്മരണ പരിപാടികള്‍ സംഘടിപ്പിക്കും. സാഹിത്യ ക്വിസ്, കഥാസന്ദർഭ ചിത്രരചന, കഥാ ചർച്ച, പ്രഭാഷണം, സ്മൃതി ദീപം, വരയാനന്ദം, അനുസ്മരണ സമ്മേളനം തുടങ്ങിയ പരിപാടികൾ വാർഷികാചരണത്തിന്‍റെ ഭാഗമായി സംഘടിപ്പിച്ചിട്ടുണ്ടെന്ന് ഭാരവാഹികള്‍ അറിയിച്ചു. ഉച്ചയ്ക്ക് 12.30ന് നെയ്യാറ്റിന്‍കരയിലെ എഴുത്തുകാരുടെയും മാളുബെന്‍ ബുക് സിന്‍റെയും പുസ്തക പ്രദര്‍ശനം നഗരസഭ ചെയര്‍മാന്‍ പി.കെ രാജമോഹനന്‍ ഉദ്ഘാടനം ചെയ്യും. 2.30ന് "സത്യാനന്തര കാലത്തെ മാധ്യമ സ്വാധീനം' എന്ന വിഷയത്തിൽ ഡോ. ആസാദ് പ്രഭാഷണം നടത്തും. വൈകുന്നേരം 3.30 ന് "കഥയെഴുത്തിലെ കരവിരുതുകൾ' എന്ന വിഷയത്തിൽ വിനു ഏബ്രഹാം, സലിൻ മാങ്കുഴി, ഡോ. ബെറ്റിമോൾ മാത്യു, വി.ആർ. സതീജ, എസ്.വി ഉണ്ണികൃഷ് ണൻനായർ, ആർ.വി അജയഘോഷ് തുടങ്ങിയവർ പങ്കെടുക്കുന്ന ചര്‍ച്ച, വരയാനന്ദം എന്ന പേരിൽ ആര്‍ട്ടിസ്റ്റ് ആനന്ദ് ഗീതയുടെ തത്സമയ ചിത്രരചന, കേരള സാഹിത്യ അക്കാദമി അവാർഡ് ജേതാക്കളായ ജി.ആർ. ഇന്ദുഗോപൻ, വി. ഷിനിലാൽ, കെ.ആർ. അജയകുമാർ എ ന്നിവര്‍ക്ക് ആദരം എന്നിവയും നടക്കും. വൈകുന്നേരം 4.30ന് ചേരുന്ന എസ്.വി. സ്മൃതി സായാഹ്നം മന്ത്രി വി. ശിവൻകുട്ടി ഉദ്ഘാടനം ചെയ്യും. കവി പ്രൊഫ. വി. മധുസൂദനൻനായർ അധ്യക്ഷനാകും. കവി പ്രഭാവർമ അനുസ്മരണ പ്രഭാഷണം നടത്തും. എംഎൽഎമാരായ സി.കെ. ഹരീന്ദ്രൻ, കെ. ആൻസലൻ, എം. വിൻസന്‍റ്, ഐ.ബി. സതീഷ്, നെയ്യാറ്റിൻകര നഗരസഭ ചെയർമാൻ പി.കെ. രാജമോഹനൻ, ജില്ലാ പഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാർ, കേരള ഭാഷ ഇൻസ്റ്റിറ്റ്യൂട്ട് മുൻ ഡയറക്ടർ പ്രൊഫ. വി. കാർത്തികേയൻനായർ എന്നിവര്‍ പങ്കെടുക്കും.

സിവിൽ സപ്ലൈസ് ഗോഡൗണില്‍ നിന്നും റേഷനരി കടത്തിയ സംഭവം: ഒരാള്‍ അറസ്റ്റില്‍

വെഞ്ഞാറമൂട്: സിവിൽ സപ്ലൈസ് ഗോഡൗില്‍നിന്നും റേഷന്‍ അരി കടത്തിയ സംഭവത്തില്‍ ഒരാള്‍ അറസ്റ്റില്‍. വെഞ്ഞാറമൂട് ചന്തയ്ക്ക് സമീപം പ്രവര്‍ത്തിക്കുന്ന സിവിൽ സപ്ലൈസ് ഗോഡൗണിലെ സീനിയര്‍ അസിസ്റ്റന്‍റ് പേരൂര്‍ക്കട സ്വദേശി ധര്‍മ്മേന്ദ്രയാണ്(50)അറസ്റ്റിലായത്. ഇക്കഴിഞ്ഞ ബുധനാഴ്ചയാണ് കേസിനാസ്പദമായ സംഭവമുണ്ടായത്. അന്നേ ദിവസം രാവിലെ 10.30യോടെ ഗോഡൗണില്‍ നിന്നും അരി കയറ്റിയ ഒരു മിനി ലോറി ഗോഡൗണില്‍ നിന്നും പുറത്തിറങ്ങുന്നത് തൊഴിലാളികളുടെ ശ്രദ്ധയില്‍ പെടുകയും സംശയം തോന്നിയ അവര്‍ വാഹനം തടഞ്ഞിട്ട ശേഷം വെഞ്ഞാറമൂട് പോലീസില്‍ അറിയിക്കുകയും ചെയ്തു. തുടര്‍ന്നു പോലീസെത്തി സിവിൽ‍ സപ്ലൈസ് അധികൃതരെ വിവരമറിയിക്കുകയും അവര്‍ എത്തി വാഹനത്തിലുള്ളത് റേഷന്‍ അരിയാണന്ന് സ്ഥിരീകരിക്കുകയും ചെയ്ത ശേഷം വെഞ്ഞാറമൂട് പോലീസില്‍ പരാതി നൽകുകയുമായിരുന്നു. ഇതിന്റെ അടിസ്ഥാനത്തില്‍ പോലീസ് വാഹനം അരി സഹിതം സ്റ്റേഷനിലേക്ക് മാറ്റുകയും ജീവനക്കാരായ രണ്ടു പേര്‍ക്കും ലോറി ഡൈവര്‍ക്കുമെതിരെ കേസെടുക്കുകയും ചെയ്തു. ഇതിനിടയില്‍തന്നെ ജീവനക്കാരായ രണ്ടുപേരും ലോറി ഡ്രൈവറും സ്ഥലത്തു നിന്നും രക്ഷപ്പെട്ടിരുന്നു. തുടര്‍ന്ന് പോലീസ് നടത്തിയ അന്വേഷണത്തില്‍ ധര്‍മ്മേന്ദ്രയെ തിരുവനന്തപുരത്ത് നിന്നാണ് പിടികൂടിയത്. വെഞ്ഞാറമൂട് പോലീസ് എസ്എച്ച്ഒ ആസാദ് അബ്ദുല്‍ കലാം, എസ്ഐമാരായ ഷാന്‍, സജിത്ത്, സീനിയര്‍ സിവിൽ പോലീസ് ഓഫീസര്‍മാരായ ശ്രീകാന്ത്, ഷിയാസ് എന്നിവരടങ്ങിയ സംഘമാണ് പ്രതിയെ പിടികൂടിയത്. പ്രതിയെ കോടതിയില്‍ ഹാജരാക്കി. കേസിലെ മറ്റു രണ്ട് പ്രതികളെ കുറിച്ച് അന്വേഷിച്ചു വരികയാണന്നും പോലീസ് പറഞ്ഞു.

എൽസാ-3 കപ്പൽ കടലിൽമുങ്ങിയ സംഭവം : മാലിന്യനീക്കത്തിന് ഇഷ്ടക്കാരെ നിയോഗിക്കുന്നുവെന്ന് ആക്ഷേപം

എസ്. രാജേന്ദ്രകുമാർ വിഴിഞ്ഞം: കണ്ടെയ്നർ കപ്പലായ എംഎസ്സി എൽസാ-3 യിൽ നിന്ന് കരക്കടിയുന്ന പ്ലാസ്റ്റിക് പെല്ലറ്റുകൾ മറ്റുന്നതിലും ഇഷ്ടക്കാരെ നിയോഗിക്കുന്നതായി ആക്ഷേപം. പരാതിയുമായി പൂവാർ പഞ്ചായത്തിലെ അയൽക്കൂട്ടം അംഗങ്ങൾ പരസ്യമായി രംഗത്തിറങ്ങി പ്രതിഷേധമറിയിച്ചു. രാവിലെ എട്ടു മുതൽ വൈകുന്നേരം മൂന്നു വരെയുള്ള മാലിന്യനീക്കത്തിന് ആയിരം രൂപ ശമ്പളവും ചെലവും എന്നുള്ള ആകർഷണിയ തൊഴിലാണ് കുടുംബശ്രീകൾ അയൽക്കൂട്ടം യൂണിറ്റുകളിലെ ഇഷ്ടപ്പെട്ടവർക്ക് നൽകുന്നതായി പരാതി ഉയർന്നിരിക്കുന്നത്. മാസങ്ങളായി തുടരുന്ന പ്ലാസ്റ്റിക് മാലിന്യനീക്കം അവസാനമില്ലാതെ തുടരുമ്പോൾ വഴക്കടിയുടെ ആഴവും കൂടുന്നതായാണറിവ്. തീരദേശത്തെപൂവാർ പഞ്ചായത്തിൽ കുടുംബശ്രീ സിഡിഎസ് ചെയർപേഴ്സനും സിഡിഎസ് അംഗങ്ങൾക്കുമെതിരേ ആരോപണങ്ങളുമായി അയൽക്കൂട്ടം യൂണിറ്റുകൾ തന്നെ രംഗത്തെത്തിയിരിക്കുകയാ ണ്. സമീപ പഞ്ചായത്തുകളായ കുളത്തൂർ, കരിംകുളം, കോട്ടുകാൽ കോർപ്പറേഷൻ ഡിവിഷനുകളിലും പരാതികൾ ഉയർന്നെങ്കിലും ആരും അധികൃതരെ സമീപിച്ചില്ലെന്നാണറിവ്. സർക്കാർ മാനദണ്ഡങ്ങൾ മറിക്കടന്നു വേണ്ടപ്പെട്ട അംഗങ്ങൾക്കു തുടർച്ചയായി 45 ദിവസംവരെ ജോലി നൽകിയതിനെതിരേയാണു പൂവാറിൽ അയൽക്കൂട്ടങ്ങളിലെ ഒരു വിഭാഗം പരാതിയുമായി പഞ്ചായത്ത് അധികൃതരെ സമീപിച്ചത്. ജില്ലയിലെ കടൽ തീരങ്ങളിൽ അടിഞ്ഞുകൂടുന്ന പ്ലാസ്റ്റിക്ക് പെല്ലറ്റുകൾ നീക്കം ചെയ്യുന്നതിന് ഫയർഫോഴ്സിലെ സിവിൽ ഡിഫൻസ് പ്രവർത്തകർക്കൊപ്പംകുടുംബശ്രീ പ്രവർത്തകരെ കൂടി ഉൾപ്പെടുത്തി ക്ലീനിംഗ് നടപടി പൂർത്തിയാക്കാനാണ് ദുരന്ത നിവാരണ അഥോറിറ്റി നേരത്തെ ഉത്തരവ് ഇറക്കിയത്. തുടക്കത്തിൽ മേഖലയിലെ ഫയർ ഫോഴ്സ് അധികൃതർക്കായിരുന്നു കുടുംബശ്രീക്കാരെ നിയോഗിക്കാനുള്ള ചുമതല. എന്നാൽ ജോലി ആവശ്യവുമായി എത്തിയവരുടെ എണ്ണക്കൂടുതലും തർക്കവും തുടങ്ങിയതോടെ അവർ കൈയൊഴിയുകയായിരുന്നു. അതോടെ കുടുംബശ്രീക്കാരുടെ ചുമതല വീണ്ടും പഞ്ചായത്തിന്‍റെ കീഴിലേക്കുതന്നെ മാറി. നേരത്തെ ഉയർന്നപരാതികൾ പരിഹരിക്കാൻ ദുരന്തനിവാരണ വിഭാഗം പുതിയ സർക്കുലർ ഇറക്കി. 40 അംഗങ്ങളെ ഉൾപ്പെടുത്തികൊണ്ട് ഒരു ടീമിനു തുടർച്ചയായി പരാമാവധി അഞ്ചു ദിവസത്തെ തൊഴിൽ ലഭിക്കും. എന്നാൽ അതും അട്ടിമറിക്കപ്പെട്ടതായാണ് ആരോപണം. 250-ഓളം അയൽകൂട്ടങ്ങളുള്ള പൂവാർ പഞ്ചായത്തിൽഅഞ്ചു ദിവസത്തിലധികം ജോലി ലഭിക്കാത്ത അയൽക്കൂട്ടങ്ങളാണു പരാതിയുമായി പഞ്ചായത്തിനെ സമീപിച്ചത്. ഇക്കാര്യത്തിൽ സുതാര്യത ഉറപ്പ് വരുത്താൻ 2023-24 വർഷത്തെ ഓഡിറ്റ് പൂർത്തിയാക്കി അഫിലയേഷൻ നേടിയിട്ടുള്ളതോ, രൂപികരിച്ച് അഫിലിയേഷൻ ആയ അയൽക്കൂട്ട അംഗങ്ങളെ മാത്രം പ്രവർത്തനത്തിനു നിയോഗിക്കണമെന്നാണ് ഉത്തരവിൽ പറയുന്നത്. എന്നാൽ അർഹതയുള്ള അയൽകൂട്ടം യൂണിറ്റുകളെ ഒഴിവാക്കി ചെയർപേഴ്സനും സിഡിഎസ് അംഗങ്ങൾക്കും താൽപര്യമുള്ള യൂണിറ്റ് അംഗങ്ങളെ തിരുകികയറ്റി ജോലി നേടിയതായാണ് ഒരു വിഭാഗം അംഗങ്ങൾ ആരോപണം. സംഭവം വിവാദമായതോടെ ജോലി ചെയ്തവരുടെ പേരു വിവരമടങ്ങിയ രജിസ്റ്റർ ബുക്ക് വലിച്ചു കീറി തെളിവു നശിപ്പിച്ചതായും പറയപ്പെടുന്നു. രജിസ്റ്റർ നശിപ്പിച്ചതിനെതിരേ പൂവാർ പഞ്ചായത്ത് കുടുംബശ്രീ അസിഡന്‍റ് സെക്രട്ടറി കുടുംബശ്രീ ജില്ലാ മിഷനു പരാതി നൽകിയതായും അറിയുന്നു.

പ്രതിപക്ഷ നേതാവിനെതിരേ സര്‍വീസ് സംഘടനകളുടേത് ആഭാസ സമരമെന്ന് സെക്രട്ടേറിയറ്റ് ആക്‌ഷന്‍ കൗണ്‍സില്‍

തിരുവനന്തപുരം: പ്രതിപക്ഷ നേതാവ് വി.ഡി. സതീശനെതിരേ മാര്‍ക്‌സിസ്റ്റ് വിലാസം സര്‍വീസ് സംഘടനകള്‍ നടത്തുന്നത് ആഭാസ സമരമാണെന്ന് സെക്രട്ടേറിയറ്റ് ആക്‌ ഷന്‍ കൗണ്‍സില്‍ കണ്‍വീനര്‍ എം.എസ് ഇര്‍ഷാദ്. ജീവനക്കാരെ ആക്ഷേപിക്കുന്ന പരാമര്‍ശങ്ങളൊന്നും പ്രതിപക്ഷ നേതാവിന്‍റെ ഭാഗത്തു നിന്നുണ്ടായിട്ടില്ല.സര്‍ക്കാര്‍ ഓഫീസുകളില്‍ എത്ര പേരെപ്പറ്റി പരാതിയുണ്ടെന്നും അതില്‍ പലരുടെയും പേര് തനിക്കറിയാമെന്നും പത്രസമ്മേളനത്തില്‍ മാധ്യമ പ്രവര്‍ത്തകരുടെ ചോദ്യത്തിനു മറുപടിയായി പറഞ്ഞതില്‍ എന്താക്ഷേപമാണുള്ളത്. സര്‍ക്കാര്‍ ഓഫീസില്‍ സഹപ്രവര്‍ത്തകരോട് മോശമായി പെരുമാറുന്ന ജീവനക്കാരില്ലേയെന്ന ചോദ്യം എങ്ങനെയാണ് ജീവനക്കാരെ അധിക്ഷേപിക്കുന്നതാകുന്നത്. ‌എല്ലാ സര്‍ക്കാര്‍ ഓഫീസിലും ഇത്തരം പരാതിയുണ്ടെന്നതു വസ്തുതയാണ്. സെക്രട്ടേറിയറ്റിലടക്കം ഇത്തരം പരാതിയുണ്ട്. ജീവനക്കാരുടെ താല്‍പര്യങ്ങളും അവകാശങ്ങളും അനുകൂലിക്കുന്നവരേയും തിരസ്‌കരിക്കുന്നവരെയും ജീവനക്കാര്‍ക്ക് നന്നായി തിരിച്ചറിയാം. ജീവനക്കാരുടെ അതിജീവന പോരാട്ടത്തിന് ശക്തമായ പിന്തുണ നല്‍കുകയും യുഡിഎഫ് അധികാരത്തില്‍ വന്നാല്‍ ജീവനക്കാരുടെ ആനുകൂല്യങ്ങള്‍ മുഴുവന്‍ അനുവദിക്കുമെന്നുമുള്ള പ്രതിപക്ഷ നേതാവിന്‍റെ പ്രസ്താവനകളില്‍ ജീവനക്കാര്‍ക്ക് വിശ്വാസമുണ്ട്. കുപ്രചരണം നടത്തി വിശ്വാസ്യത തകര്‍ക്കാമെന്ന സിപിഎം മോഹം വിലപ്പോവില്ലെന്നും അദ്ദേഹം പറഞ്ഞു.

ഡോ. മുഹമ്മദ് നസീര്‍ അന്താരാഷ്ട്ര ഉപദേഷ്ടാവ്

തിരുവനന്തപുരം: കിംസ്‌ഹെല്‍ത്ത് ഓര്‍ത്തോപീഡിക്‌സ് ആന്‍ഡ് ട്രോമ വിഭാഗം സീനിയര്‍ കണ്‍സള്‍ട്ടന്‍റും ക്ലിനിക്കൽ സർവീസസ് ഡയറക്ടറുമായ ഡോ. മുഹമ്മദ് നസീര്‍ റോയല്‍ കോളജ് ഓഫ് ഫിസിഷ്യന്‍സ് ആന്‍ഡ് സര്‍ജന്‍സ് ഓഫ് ഗ്ലാസ്‌ഗോയുടെ അന്താരാഷ്ട്ര ഉപദേഷ്ടാവായി തെരഞ്ഞെടുക്കപ്പെട്ടു. ഡോക്ടര്‍മാര്‍ക്കും ആരോഗ്യമേഖലയില്‍ പ്രവര്‍ത്തിക്കുന്നവര്‍ക്കും ഫെലോഷിപ്പുകളും അംഗത്വ അവസരങ്ങളും വാഗ്ദാനം ചെയ്യുന്ന, ലോകത്തിലെ തന്നെ മുന്‍നിര റോയല്‍ കോളജുകളില്‍ ഒന്നാണ് റോയല്‍ കോളേജ് ഓഫ് ഫിസിഷ്യന്‍സ് ആന്‍ഡ് സര്‍ജന്‍സ് ഗ്ലാസ്‌ഗോ. ഈ പദവിയിലെത്തുന്ന കേരളത്തില്‍ നിന്നുള്ള ആദ്യ ഡോക്ടറാണ് മുഹമ്മദ് നസീര്‍. മൂന്ന് വര്‍ഷത്തേക്കാണ് നിയമനം. ഈ കാലയളവില്‍ ആഗോള തലത്തില്‍ ആര്‍സിപിഎസ്ജിയുടെ പ്രതിനിധിയായി ഡോ. നസീര്‍ പ്രവര്‍ത്തിക്കും. യുകെയില്‍ പരിശീലന അവസരങ്ങള്‍ തേടുന്ന മെഡിക്കല്‍ ബിരുദധാരികള്‍ക്ക് ആവശ്യമായ നിര്‍ദേശങ്ങളും സഹായങ്ങളും നൽകും.

കനകക്കുന്നിൽ മോട്ടോർ എക്സ്പോയ്ക്കു തുടക്കമായി

തിരുവനന്തപുരം: കെഎസ്ആർടിസിയും കേരള മോട്ടോർ വാഹന വകുപ്പും സംയുക്തമായി സംഘടിപ്പിക്കുന്ന "ട്രാൻസ്പോ 2025’ കെഎസ്ആർടിസി-എംവിഡി മോട്ടോർ എക്സ്പോയുടെ ഉദ് ഘാടനം മന്ത്രി കെ.എൻ. ബാലഗോപാൽ നിർവഹിച്ചു. കനകക്കുന്നിൽ നടക്കുന്ന മൂന്നു ദിവസത്തെ എക്സ്പോയിൽ ആധുനിക സൗകര്യങ്ങളോടുകൂടിയ കെഎസ്ആർടിസി ബസുകളുടെ മെഗാ ലോഞ്ചിംഗിനൊപ്പം ട്രാൻസ്പോർട്ട്, ഓട്ടോമൊബൈൽ, ഇമൊബിലിറ്റി, ടൂറിസം, ടെക്നോളജി, സേവന മേഖലകളിൽ പ്രവർത്തിക്കുന്ന സ്ഥാ പനങ്ങളും പങ്കെടുക്കുന്നുണ്ട്. മന്ത്രി കെ.ബി. ഗണേഷ്കുമാർ ചടങ്ങിൽ അധ്യക്ഷത വഹിച്ചു. വി.കെ. പ്രശാന്ത് എംഎൽഎ, കെ എസ്ആർടിസി ചെയർമാൻ ആൻഡ് മാനേജിംഗ് ഡയറക്ടർ ഡോ. പി.എസ്. പ്രമോജ് ശങ്കർ, ഗതാഗത കമ്മീഷണർ നാഗരാജു ചകിലം തുടങ്ങിയവർ ചടങ്ങിൽ പങ്കെടുത്തു. വാഹന പ്രേമികൾക്കു പുത്തൻ സാങ്കേതിക വിദ്യകളും വാഹനങ്ങളുടെ സവിശേഷതകളും അടുത്തറിയാനുള്ള അവസരമാണ് എക്സ്പോ ഒരുക്കുന്നത്. കാർ, ബൈക്ക്, ബസ്, ട്രക്ക് തുടങ്ങിയ വാഹനങ്ങളും ഭാവിയിലെ ഗതാഗത സാങ്കേതിക വിദ്യകളും പ്രദർശിപ്പിക്കുന്നു. സന്ദർശകർക്കു വാഹനങ്ങൾ നേരിട്ട് കാണാനും സവിശേഷതകൾ മനസിലാക്കാനും ടെസ്റ്റ് ഡ്രൈവ് നടത്താനുമുള്ള സൗകര്യവും ഒരുക്കിയിട്ടുണ്ട്. എക്സ് പോയിൽ മൂന്നു ദിവസങ്ങളിലായി കലാസാംസ്കാരിക പരിപാടികളും വിനോദ വിജ്ഞാന പരിപാടികളും നടക്കും. എക്സ്പോ എല്ലാ ദിവസവും രാവിലെ 11 മുതൽ രാത്രി11 വരെ സന്ദർശകർക്കായി തുറന്നിരിക്കും.

അമിത കൂലി ചോദിച്ചെന്ന് ആരോപണം : തൊഴിലാളിക്കാവലിൽ ലോഡ് ഇറക്കി വീട്ടുടമസ്ഥ

വെഞ്ഞാറമൂട്: തൊഴിലാളിക്കാവലിൽ ലോഡ് ഇറക്കി വീട്ടുടമസ്ഥ. വീടു നിർമാണത്തിനു ലോറിയിൽ കൊണ്ടുവന്ന തറയോടുകൾ ഇറക്കാൻ സിഐ ടിയു ചുമട്ടു തൊഴിലാളികൾ അമിത കൂലി ചോദിച്ചതോടെ യാണു വീട്ടുടമസ്ഥ ഒറ്റയ്ക്ക് ലോഡ് ഇറക്കിയത്. മറ്റാരും സഹായിക്കാതിരിക്കാൻ തൊഴിലാളികൾ വീടിനു മുന്നിൽ അത്ര നേരവും കാരൽ നിന്നു. തച്ചോണം മുസ്‌ലിം പള്ളിക്കു സമീപം കിളിമാനൂർ റോഡിൽ പുതിയ വീട് നിർമിക്കുന്ന കുമ്മിൾ തച്ചോണം പ്രിയ നിവാസിൽ പ്രിയ വിനോദ് (48) ആണ് കഴിഞ്ഞ രാത്രി രണ്ടു മണിക്കൂർ പണിപ്പെട്ട് 150 തറയോടുകൾ ഇറക്കിയത്. തറയോടുകൾ അടുക്കി വയ്ക്കാൻ നിർമാണത്തൊഴിലാളികൾ മുന്നോട്ടുവന്നെങ്കിലും അവരെയും സിഐടിയു തൊഴിലാ ളികൾ തടഞ്ഞു. കഴിഞ്ഞ ദിവസം രാത്രിയോടെ കൊണ്ടുവന്ന മുറ്റത്തുവിരിയ്ക്കാനുളള പാറയിൽ തീർത്ത തറയോടുകൾ ഇറക്കാൻ സിഐടിയു തൊഴിലാളികൾ അമിത കൂലി ആവശ്യപ്പെട്ടതാണ് തർക്കത്തിനിടയാക്കിയത്. കെട്ടിടത്തിനുള്ളിൽ വിരിക്കാനുള്ള തറയോടുകൾ കഴിഞ്ഞ ഫെബ്രുവരിയിൽ കൊണ്ടുവന്നപ്പോൾ ഇറക്കു കൂലിയായി ആവശ്യപ്പെട്ടത് 12,000 രൂപയായിരുന്നു. അന്നു തർക്കത്തിനൊടുവിൽ 3500 രൂപ കൊടുക്കേണ്ടി വന്നു. അതേ കൂലിയാണ് ഇന്നലെയും തറയോടുകൾ ഇറക്കാൻ തൊഴിലാളികൾ ആവശ്യപ്പെട്ടെതെന്നു പ്രിയ വിനോദ് പറയുന്നു. ഒരെണ്ണം ഇറക്കാൻ രണ്ടു രൂപ വച്ച് ആകെ 300 രൂപ കൊടുക്കേണ്ടിടത്താണിത്. ആവശ്യപ്പെട്ട കൂലി തന്നില്ലെങ്കിൽ പ്രിയയും ഭർത്താവും ചേർന്നു ലോഡ് ഇറക്കിക്കോളാനും മറ്റാരെയും വിളിക്കാൻ പാടില്ലന്നും തൊഴിലാളികൾ വ്യവസ്ഥയും വച്ചു. തുടർന്നു പ്രിയ ലോറിയിൽ കയറി ലോഡ് ഇറക്കുകയായിരുന്നു. മലപ്പുറത്ത് പോലീസ് സബ് ഇൻസ് പെക്ടെറായ ഭർത്താവ് ഐ.വി. വിനോദ് അവിടെയായിരുന്നു. വിവരമറിഞ്ഞു പാങ്ങോട് പോലീസ് സ്ഥലത്ത് എത്തിയെങ്കിലും ഇടപെട്ടില്ല. വെഞ്ഞാറമൂട്ടിൽനിന്നു തറയോടുകൾ ലോറിയിൽ കയറ്റാൻ ഇത്രയും കൂലി കൊടുക്കേണ്ടിവന്നില്ലെന്നു പ്രിയ പറയുന്നു. നേരത്തേ കേന്ദ്രീയ വിദ്യാലയത്തിൽ അധ്യാപികയായിരുന്ന പ്രിയ വിനോദ് ഇപ്പോൾ സ്വതന്ത്ര പത്രപ്രവർത്തകയും കെപിസിസി മീഡിയ സെൽ അംഗവുമാണ്. അതേ സമയം അമിത കൂലി ചോദിച്ചെന്ന ആരോപണം ശരിയല്ലെന്നു സിഐടിയു യൂണിയൻ കൺവീനർ കെ. ഹർഷകുമാർ പറഞ്ഞു.

മാര്‍ ബസേലിയസ് ഇംഗ്ലീഷ് മീഡിയം സ്‌കൂളില്‍ കർഷകദിനാചരണം

വെള്ളറട: കര്‍ഷക ദിനാചരണത്തിന്‍റെ ഭാഗമായി മാര്‍ ബസേലിയോസ് ഇംഗ്ലീഷ് മീഡിയം സ്‌കൂളില്‍ വിദ്യാര്‍ഥികള്‍ വൃക്ഷത്തൈകള്‍ നട്ടു. ഫാ. സാമുവേല്‍ തിരുഹൃദയം, പ്രിന്‍സിപ്പല്‍ സി. ഡബ്ലിയു. ജീന്‍, അധ്യാപകര്‍, രക്ഷകര്‍ത്താക്കള്‍ എന്നിവര്‍ പങ്കെടുത്തു. ‌ഹരിത കേരള മിഷന്‍ അംഗം പി. ചാള്‍സ് വൃക്ഷത്തൈ നടീല്‍ ഉദ്ഘാടനം നിര്‍വഹിച്ചു. വിദ്യാര്‍ഥികൾ വീടുകളില്‍നിന്ന് വൃക്ഷത്തൈകള്‍ കൊണ്ടുവരികയും സ്‌കൂള്‍ പരിസരത്തു നട്ടുപിടിപ്പിക്കുകയും ചെയ്തു. വിദ്യാര്‍ഥികളുടെ നേതൃത്വത്തില്‍ നാടന്‍പാട്ട് അവതരണം, ലഘുനാടകം, പ്രസംഗം, നൃത്താവിഷ്‌കാരം എന്നിവയും ഉണ്ടായിരുന്നു. സ്‌കൂള്‍ ക്വയറിന്‍റെ നേതൃത്വത്തില്‍ നടന്ന ദേശഭക്തിഗാനത്തോടെ ചടങ്ങുകള്‍ സമാപിച്ചു.

ബസില്‍നിന്നു വീണ് കണ്ടക്ടര്‍ക്ക് ഗുരുതര പരിക്ക്

പേരൂര്‍ക്കട: ഓടിക്കൊണ്ടിരുന്ന ബസില്‍നിന്നു വീണു കെഎസ്ആര്‍ടിസി കണ്ടക്ടര്‍ക്ക് പരിക്കേറ്റു. വട്ടിയൂര്‍ക്കാവ് വാഴോട്ടുകോണം സുലൈഖ മന്‍സിലില്‍ എം.ബി. മുഹമ്മദ് ഷബീറാ(50)ണു പരിക്കേറ്റത്. ശാസ് തമംഗലത്തെ ശ്രീരാമകൃഷ് ണ മിഷന്‍ ആശുപത്രിയില്‍ ചികിത്സയില്‍ കഴിയുന്നത്. വ്യാഴാഴ്ച വൈകുന്നേരം 5.25 നാണ് സംഭവം. ചൊവ്വള്ളൂരില്‍നിന്നു കിഴക്കേക്കോട്ടയിലേക്കു സര്‍വീസ് നടത്തുകയായിരുന്ന തിരുവനന്തപുരം സിറ്റി ഡിപ്പോയിലെ ബസിലെ കണ്ടക്ടറായിരുന്നു മുഹമ്മദ് ഷബീര്‍. ബസില്‍ തിരക്കായിരുന്നതിനാല്‍ മുന്‍വശത്തുനിന്ന യാത്രക്കാര്‍ക്ക് ടിക്കറ്റു കൊടുത്തശേഷം ഡോര്‍വഴി ഇറങ്ങി. പിറകിലത്തെ ഡോര്‍ തുറന്നു കയറുകയായിരുന്നു ഇദ്ദേഹം. ശേഷം ചവിട്ടുപടിയില്‍ നില്‍ക്കുന്നതിനിടെ ഡോര്‍ തുറന്ന് മുഹമ്മദ് ഷബീര്‍ പുറത്തേക്കു വീഴുകയായിരുന്നു. ഇറങ്ങിക്കയറിയപ്പോള്‍ പിറകിലത്തെ ഡോര്‍ നന്നായി അടയ്ക്കാത്തതാണ് സംഭവത്തിനു കാരണമെന്നാണു സൂചന. ബസ് വളവിലെത്തിയപ്പോഴാണ് കണ്ടക്ടര്‍ ഡോറിനു സമീപത്തേക്ക് ചാഞ്ഞുവരികയും തുറന്നിരുന്ന ഡോറില്‍നിന്നു പുറത്തേക്കു പതിക്കുകയും ചെയ്തത്. മുഖത്തിനും കൈകള്‍ക്കും വീഴ്ചയില്‍ പരിക്കേറ്റിട്ടുണ്ട്. ആശുപത്രിയില്‍ നിരീക്ഷണത്തിലുള്ള മുഹമ്മദ് ഷബീറിന് ഇന്ന് ആശുപത്രി വിടാനായേക്കും.

സാമൂഹ്യക്ഷേമ പെന്‍ഷന്‍ മസ്റ്ററിംഗ് വീടുകളിലും

വെള്ളറട: സാമൂഹ്യ സുരക്ഷ പെന്‍ഷന്‍ മാസ്റ്ററിംഗ് വീടുകളിലെത്തി നിര്‍വഹിക്കുന്നത് കിടപ്പുരോഗികള്‍ക്ക് ആശ്വാസമാകുന്നു. വെള്ളറട അക്ഷയ സംരംഭകനായ ബിനുകുമാറാണു കിടപ്പുരോഗികൾക്ക് സഹായമാകുന്നത്. വെള്ളറട പഞ്ചായത്തിലെ വാര്‍ഡ് മെമ്പര്‍മാരുടെ നേതൃത്വത്തിലാണു വീടുകളിലെത്തി മസ്റ്ററിംഗ് നിര്‍വഹിക്കുന്നത്. പൊതുഅവധി ദിവസങ്ങളിലും മസ്റ്ററിംഗ് നടത്തുന്നുണ്ട്. കേരളത്തില്‍ 3000 ത്തോളം വരുന്ന അക്ഷയ സെന്‍ററുകള്‍ വീടുകളില്‍ പോയി മസ്റ്ററിംഗ് നടത്തി വരുന്നുണ്ട്. 24 വരെ മസ്റ്ററിംഗ് നടത്താന്‍ അക്ഷയകേന്ദ്രങ്ങളെ സര്‍ക്കാര്‍ ചുമതല പ്പെടുത്തിയിരിക്കുന്നത്.

വിദ്യാർഥികൾ കോടതി സന്ദർശിച്ചു

വിതുര: കോടതി പ്രവർത്തനങ്ങൾ മനസിലാക്കാനായി വിതുര എംജിഎം പൊന്മുടിവാലി സ്കൂളിലെ വിദ്യാർഥികൾ നെടുമങ്ങാട് കോടതി സന്ദർശിച്ചു. വിദ്യാർഥികളുടെ നിയമപരിജ്ഞാന യാത്ര "സംവാദ'യുടെ ഭാഗമായായിരുന്നു സന്ദർശനം. സബ് ജഡ്ജ് സി.ആർ. രാജശ്രീ വിദ്യാർഥികളോടു സംവദിച്ചു. തുടർന്നു കോടതിയിലെ വിവിധ സെഷനുകൾ കുട്ടികൾ നേരിട്ടുകണ്ടു. ക്വിസ് മത്സര വിജയികൾക്ക് ലീഗൽ സർവീസ് അധികൃതർ സമ്മാനങ്ങൾ വിതരണം ചെയ്തു. "സംവാദ' താലൂക്ക് കോ-ഓർഡിനേറ്റർ കെ. ഉവൈസ് ഖാൻ, അഭിഭാഷകരായ കെ.പി. അനില, ലസ്ളി ദാസ്, കെ.എസ്. അശോക്, ജയകുമാർ തീർഥം, രമ്യ ആർ. നായർ, നൂർജി, സജിത, പാരാ ലീഗൽ വോളന്‍റിയർമാരായ പ്രിയങ്ക, ജ്യോതി തുടങ്ങിയവർ വിവിധ സെഷനുകൾക്കു നേതൃത്വം നല്കി.

അനില്‍ തമ്പിക്കായുള്ള അന്വേഷണം അവസാനിപ്പിച്ചിട്ടില്ലെന്നു പോലീസ്

പേരൂര്‍ക്കട: വസ്തുതട്ടിപ്പ് കേസിലെ സൂത്രധാരനും വ്യവസായിയുമായ അനില്‍തമ്പിയെ കണ്ടെത്തുന്നതിനുള്ള അന്വേഷണം അവസാനിപ്പിച്ചിട്ടില്ലെന്നു മ്യൂസിയം പോലീസ്. ഇന്ത്യയിലെ ഒട്ടുമിക്ക സംസ്ഥാനങ്ങളില്‍ ഇയാളെ കണ്ടെത്തുന്നതിനായി അരിച്ചുപെറുക്കിയ പ്രത്യേക സംഘം നാട്ടില്‍ തിരിച്ചെത്തിയിരുന്നു. വിമാനത്താവളംവഴി അനില്‍തമ്പി രക്ഷപ്പെടാതിരിക്കാന്‍ വേണ്ടുന്ന മാര്‍ഗങ്ങള്‍ പോലീസ് സ്വീകരിച്ചിരുന്നു. അതേസമയം അനില്‍തമ്പി റോഡുമാര്‍ഗം എത്തി നേപ്പാള്‍, ഭൂട്ടാന്‍ രാജ്യങ്ങള്‍ വഴി അന്യരാജ്യത്തേക്ക് കടന്നിരിക്കാമെന്നാണു പോലീസ് കരുതുന്നത്. പൂര്‍ണമായും പഴുതടച്ചുള്ള അന്വേഷണത്തിനു സാധ്യമല്ലാതായ സാഹചര്യത്തിലാണ് അനില്‍തമ്പി ഇപ്പോഴും കാണാമറയത്തായിരിക്കുന്നത്. ഇയാള്‍ ഡല്‍ഹിയിലെ ഫ്‌ളാറ്റില്‍ ഒളിവില്‍ക്കഴിയുന്ന വേളയില്‍ പോലീസ് പിടിക്കുമെന്ന ഘട്ടത്തില്‍നിന്നു കഷ്ടിച്ചാണ് രക്ഷപ്പെട്ടത്. പിന്നീട് അനില്‍തമ്പി എവിടെ എന്നതിനെക്കുറിച്ച് യാതൊരു വിവരവുമില്ല.

വിദാധിരാജ കർമശ്രേഷ്ഠ പുരസ്കാരം സമ്മാനിച്ചു

തിരുവനന്തപുരം: പ്രഥമ ശ്രീ വിദാധിരാജ കർമശ്രേഷ്ഠ പുരസ്കാരം എൻഎസ്എസ് വൈസ് പ്രസിഡന്‍റ് എം. സംഗീത് കുമാറിനു സമ്മാനിച്ചു. ശ്രീ വിദ്യാധിരാജാ വിശ്വകേന്ദ്രത്തിന്‍റെ 40-ാം വാർഷിക സമ്മേളനത്തോടനുബന്ധിച്ചു ട്രിവാൻഡ്രം ചേംബർ ഓഫ് കോമേഴ്സ് ഹാളിൽ നടന്ന ചടങ്ങിൽ ശാന്തിഗിരി ആശ്രമം ജനറൽ സെക്രട്ടറി ഗുരുരത്നം ജ്ഞാനതപസ്വി പുരസ്കാരം സമ്മാനിച്ചു. ചട്ടമ്പിസ്വാമികൾക്ക് കാലഘട്ടത്തിന് അനുസരിച്ച് പൊതു സമൂഹത്തിൽ വേണ്ടത്ര സ്ഥാനം ലഭിച്ചിട്ടില്ലെന്നു സമ്മേളനം ഉദ്ഘാടനം ചെയ്തു സ്വാമി ഗുരുരത്നം ജ്ഞാനതപസ്വി പറഞ്ഞു.ശ്രീ വിദ്യാധിരാജ വിശ്വകേന്ദ്രം പ്രസിഡന്‍റ് ഡി. ചന്ദ്രസേനനൻ നായർ അധ്യക്ഷത വഹിച്ചു. മുൻ സ്പീക്കർ എം. വിജയകുമാർ, മുൻമന്ത്രി വി.എസ്. ശിവകുമാർ, പദ്മന ഗിരീഷ്, എസ്.ആർ. കൃഷ്ണകുമാർ, തളിയൽ രാജശേഖരൻ പിള്ള, എസ്.എസ്. മനോജ്, ജി.എസ്. മഞ്ജു എന്നിവർ പങ്കെടുത്തു.

വനംവകുപ്പ് കാമറകൾ സ്ഥാപിച്ചു

പാലോട്: പെരിങ്ങമ്മല വെങ്കിട്ടയിൽ പുലി പോത്തിനെ കൊന്ന സംഭവവുമായി ബന്ധപ്പെട്ടു വനം വകുപ്പ് കാമറകൾ സ്ഥാപിച്ചു. വെങ്കട്ട മുട്ടിലാണു രണ്ടു കാമറകൾ സ്ഥാപിച്ചത്. പുലിയുടെ ദൃശ്യം കാമറയിൽ പതിഞ്ഞാൽ കൂടുവച്ചു പിടികൂടുന്നതടക്കമുള്ള നടപടികൾ സ്വീകരിക്കുമെന്നു വനം വകുപ്പ് അറിയിച്ചു. എന്നാൽ പുലിയുടെ ഭീതി നിലനിൽക്കുന്ന ആദിച്ച കോണിൽ കാമറ സ്ഥാപിക്കാത്തതിനെതിരെ ആദിവാസികൾ പ്രതിഷേധിച്ചു. ഇതിനിടെ പെരിങ്ങമല കലയപുരം ഡീസന്‍റ്മുക്കിനു സമീപം പുലിയെ കണ്ടതായി നാട്ടുകാർ പറഞ്ഞു. ടാപ്പിംഗ് തൊഴിലാളികളാണ് കണ്ടത്. വഴിയിൽ രക്തക്കറകൾ ഉണ്ടായിരുന്നതായും ഏതോ ജീവിയെ പിടിച്ചതാണെന്നും നാട്ടുകാർ പറയുന്നു . അധികൃതർ രക്തക്കറയുടെ സാമ്പിൾ ശേഖരിച്ചിട്ടുണ്ട്. കഴിഞ്ഞ ദിവസം ഡി കെ മുരളി എംഎൽഎ സ്ഥലം സന്ദർശിച്ചിരുന്നു.

ഗവ. ടിടിഐയില്‍ "ഓണത്തിന് ഒരു വട്ടി പൂ' വിളവെടുപ്പ് 26ന്

നെയ്യാറ്റിൻകര : ഊരൂട്ടുകാലയില്‍ സ്ഥിതി ചെയ്യുന്ന നെയ്യാറ്റിന്‍കര ഗവ. ഇന്‍സ്റ്റിറ്റ്യൂട്ട് ഓഫ് ടീച്ചര്‍ എഡ്യൂക്കേഷന്‍ (ടിടിഐ) കാന്പസില്‍ `ഓണത്തിന് ഒരു വട്ടി പൂ` പദ്ധതി പ്രകാരം കൃഷി ചെയ്ത ചെടികൾ പൂവിട്ടു. നെയ്യാറ്റിന്‍കര നഗരസഭയുടെയും കൃഷി ഭവന്‍റെയും സഹകരണത്തോടെ ഗവ. ടിടിഐയുടെ നേതൃത്വത്തില്‍ ആരംഭിച്ച `ഓണത്തിന് ഒരു വട്ടി പൂ` പദ്ധതിയുടെ വിളവെടുപ്പ് 26ന് നടക്കും. ഗവ. ടിടിഐ കാന്പസില്‍ പ്രത്യേകമായി ഒരുക്കിയ പൂ കൃഷിയിടത്തിലാണ് ജമന്തി നട്ടുപിടിപ്പിച്ചത്. കാന്പസിലെ അധ്യാപക വിദ്യാര്‍ഥികള്‍ക്കായിരുന്നു പരിപാലനച്ചുമതല. ടിടിഐയിലെ അധ്യാപകരും കൃഷി ഭവന്‍ അധികൃതരും ആവശ്യമായ മാര്‍ഗനിര്‍ദേശം നല്‍കി. വിളവെടുപ്പ് മഹോത്സവത്തിന്‍റെ ഉദ്ഘാടനം 26 ന് രാവിലെ 9.45 ന് കെ. ആന്‍സലന്‍ എംഎല്‍എ നിര്‍വഹിക്കും. നഗരസഭ ചെയര്‍പേഴ്സണ്‍ പി.കെ. രാജമോഹനന്‍ അധ്യക്ഷനാകും.

നെയ്യാര്‍മേളയ്ക്കു തിരിതെളിയാന്‍ ഇനി ഒരാഴ്ച മാത്രം ബാക്കി

നെയ്യാറ്റിൻകര: ത്രീ ഡി പ്ലാനറ്റോറിയം ഷോ മുതല്‍ റോബോട്ടിക് ഫെസ്റ്റ് വരെ. ബിസിനസ് എക്സലന്‍സ് അവാര്‍ഡ് നൈറ്റ് മുതല്‍ വ്യാവസായിക ഉത്പന്ന പ്രദര്‍ശനം വരെ. ഭക്ഷ്യമേള മുതല്‍ പുസ്തകോത്സവവും കാര്‍ണിവലും വരെ. പ്രമുഖ കലാകാരന്മാര്‍ അണി നിരക്കുന്ന കലാവിരുന്ന് മുതല്‍ പരന്പരാഗത കലാരൂപങ്ങളുടെ അവതരണങ്ങള്‍ വരെ..... നെയ്യാര്‍ മേളയുടെ പത്താമത് എഡിഷന്‍ മുന്‍കാലങ്ങളെക്കാള്‍ മികവാര്‍ന്ന രീതിയില്‍ സന്ദര്‍ശകരെ വരവേല്‍ക്കാനുള്ള ഒരുക്കങ്ങള്‍ കാര്യക്ഷമമായി മുന്നോട്ടു പോകുന്നുവെന്ന് സംഘാടകര്‍. വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയ കമ്മിറ്റി സംഘടിപ്പിക്കുന്ന നെയ്യാർ മേളയുടെ തലസ്ഥാനജില്ലയുടെ തെക്കന്‍ പ്രദേശത്തെ ഏറ്റവും വിപുലമായ ഓണാഘോഷവും വ്യാപാരമേളയും സാംസ്കാരികോത്സവവുമായി കീര്‍ത്തിയാര്‍ജ്ജിച്ചുകഴിഞ്ഞു. നെയ്യാറ്റിന്‍കര മുനിസിപ്പല്‍ സ്റ്റേഡിയത്തിലെ പഴയ വേദിയില്‍നിന്ന് ആറാലുംമൂട് മാര്‍ക്കറ്റ് ഗ്രൗണ്ടിലേയ്ക്ക് മേളയുടെ അരങ്ങ് എത്തിയിട്ട് മൂന്നു വര്‍ഷമായി. നൂറ്റാണ്ടുകളുടെ പഴക്കമുള്ള ആറാലുംമൂട് മാര്‍ക്കറ്റ് ഗ്രൗണ്ടിനെ മേളയ്ക്കു വേണ്ടി ആകര്‍ഷകമായി ഒരുക്കിയെടുത്തിട്ടുണ്ട്. പ്രധാന വേദിയുടെയും പ്രദര്‍ശന സ്റ്റാളുകളുടെയുമൊക്കെ നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പുരോഗമിക്കുന്നു. 29നു വൈകുന്നേരം ആരംഭിക്കുന്ന മേളയില്‍ വിവിധ സര്‍ക്കാര്‍ വകുപ്പുകളും പങ്കെടുക്കും. ഓരോ വര്‍ഷവും മേളയിലെത്തുന്ന സന്ദര്‍ശകരുടെ എണ്ണം വര്‍ധിച്ചു വരുന്നതായി സംഘാടകസമിതി ഭാരവാഹികള്‍ അറിയിച്ചു. മേളയുടെ ഭാഗമായി ഇക്കുറി സമ്മാനപ്പെരുമഴ എന്ന പേരില്‍ ലക്കി ഡ്രോ കൂപ്പണും ക്രമീകരിച്ചിട്ടുണ്ടെന്ന് സംഘാടകര്‍ കൂട്ടിച്ചേര്‍ത്തു.

യൂത്ത് കോൺഗ്രസ് രാപ്പകല്‍ സമരം ആരംഭിച്ചു

പെരുങ്കടവിള: കോണ്‍ഗ്രസ് പെരുങ്കടവിള മണ്ഡലം കമ്മിറ്റിയുടെ നേതൃത്വത്തില്‍ രാപ്പകല്‍ സമരത്തിനു തുടക്കമായി. മണ്ഡലം പ്രസിഡന്‍റ് അഡ്വ: അനന്തന്‍റെ നേൃത്വത്തിൽ പെരുങ്കടവിള ജംഗ്ഷനില്‍ ആരംഭിച്ച രാപ്പകല്‍ സമരം കെപിസിസി ജനറൽ സെക്രട്ടറി അഡ്വ. സി.ആര്‍. പ്രണകുമാര്‍ ഉദ്ഘാടനം ചെയ്തു. കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് മാരായമുട്ടം എം. എസ്. അനില്‍ മുഖ്യപ്രഭാഷണം നടത്തി. മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിള, ബ്ലോക്ക് വൈസ് പ്രസിഡന്‍റ് സത്യദാസ്, ബ്ലോക്ക്‌ സെക്രട്ടറിമാരായ അഡ്വ. ഷിബു ശ്രീധര്‍, മണ്ണൂര്‍ ശ്രീകുമാര്‍, അയിരൂര്‍ ബാബു, പഞ്ചായത്ത്‌ മെമ്പര്‍മാരായ അമ്പലത്തറയില്‍ ഗോപകുമാര്‍, കാക്കണം മധു, ധന്യ, സേവാദള്‍ പാറശാല ബ്ലോക്ക് പ്രസിഡന്‍റ് തത്തിയൂർ സുരേന്ദ്രന്‍, കൊറ്റാമം മോഹനന്‍, ശ്രീരാഗം ശ്രീകുമാര്‍, ആരാമം മധുസൂദനന്‍ നായര്‍, ജോണി മാലകുളങ്ങര, ലാലു മാലകുളങ്ങര, ബിജു ലാല്‍, അരുവിപ്പുറം സദാനന്ദന്‍, അനില്‍കുമാര്‍ തത്തയൂര്‍, യൂത്ത്‌കോണ്‍ഗ്രസ് നേതാക്കളായ കൊല്ലയില്‍ ശ്യാംലാല്‍, കൃഷ്ണശേഖര്‍, സതീഷ് കോട്ടുക്കോണം, അഖില്‍ തൃപ്പലവൂര്‍, അഭിജിത്ത് ചുള്ളിയൂര്‍, അഖില്‍ നിരപ്പില്‍, ഹരിപ്രസാദ്, വിനോദ് കോട്ടയക്കല്‍, അലക്‌സ്, അഖില്‍ തെള്ളുക്കുഴി, എന്നിവര്‍ നേതൃത്വം നല്‍കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]