കടുത്തുരുത്തി: കാട്ടാമ്പാക്ക് വടക്കേനിരപ്പ് ഗവണ്‍മെന്‍റ് യുപി സ്‌കൂളിന്‍റെ വളര്‍ച്ചയില്‍ നാഴികക്കല്ലായി മാറുന്ന വര്‍ണക്കൂടാരമെന്ന മാതൃക പ്രീ-സ്‌കൂളിന്‍റെ ഉദ്ഘാടനം മന്ത്രി വി.എന്‍. വാസവന്‍ നിര്‍വഹിച്ചു. മോന്‍സ് ജോസഫ് എംഎല്‍എ അധ്യക്ഷത വഹിച്ചു. സമഗ്രശിക്ഷാ കേരളം സ്റ്റാര്‍ട്‌സ് പദ്ധതിയില്‍ ഉള്‍പെടുത്തി അന്താരാഷ്ട്ര നിലവാരത്തില്‍ പ്രീ-പ്രൈമറി വിദ്യാര്‍ഥികളുടെ സമഗ്ര വികസനം ലക്ഷ്യമാക്കിയാണ് വര്‍ണകൂടാരം സ്ഥാപിച്ചത്.
പത്ത് ലക്ഷം രൂപ ചെലവഴിച്ചാണ് പദ്ധതി പൂര്‍ത്തിയാക്കിയത്. എസ്എസ്‌കെ ജില്ലാ പ്രൊജക്റ്റ് കോര്‍ഡിനേറ്റര്‍ കെ.ജെ. പ്രസാദ് പദ്ധതി വിശദീകണം നടത്തി. കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് പി.വി. സുനില്‍, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാല, ഞീഴൂര്‍ പഞ്ചായത്ത് പ്രസിഡന്‍റ് ശ്രീകലാ ദിലീപ്, വൈസ് പ്രസിഡന്‍റ് കെ.പി. ദോവദാസ്, കുറവിലങ്ങാട് എഇഒ ഡോ.കെ.ആര്‍. ബിന്ദുജി, ലില്ലി മാത്യു, ഡി.അശോക് കുമാര്‍, ഇ.കെ. ശ്രീകുമാര്‍ എന്നിവര്‍ പ്രസംഗിച്ചു.
പുറത്ത് സജ്ജീകരിച്ചിരിക്കുന്ന ഹരിതോദ്യനത്തില്‍ കൃത്രിമമായി നിര്‍മിച്ച വെള്ളച്ചാട്ടം, അരുവി, കുളം, പാലം, ഏറുമാടം, ജൈവ പന്തല്‍, ശലഭോദ്യാനം, ആകര്‍ഷകമായ വിവിധ ഫലങ്ങളുടെ അകൃതിയിലുള്ള ഇരിപ്പിടങ്ങള്‍, പക്ഷി മൃഗാദികളുടെ ശില്പങ്ങള്‍, ഓപ്പണ്‍ സ്റ്റേജ്, വിവിധ റൈഡുകള്‍ ആകര്‍ഷകമായ കവാടം എന്നിവയുമുണ്ട്. കുട്ടികള്‍ക്കായി ഒരുക്കിയിരിക്കുന്ന സ്മാര്‍ട്ട് ക്ലാസ് മുറികളില്‍ ഇന്‍റര്‍നെറ്റ് സൗകര്യത്തോടെ സ്മാര്‍ട്ട് ടി.വി., കുഞ്ഞരങ്ങ്, ഭാഷവികസന ഇടം, കര-കൗശല ഇടം, ഗണിത ഇടം ഇങ്ങനെ വിത്യസ്തങ്ങളായ 11 ഇടങ്ങളും ഒരുക്കിയിട്ടുണ്ട്.