കുറുമ്പനാടം: കേന്ദ്ര തപാല്‍ വകുപ്പ് ഏര്‍പ്പെടുത്തിയ സ്വച്ഛത ഹേ സേവാ അവാര്‍ഡിന് കുറുമ്പനാടം സെന്‍റ് ആന്‍റണീസ് എല്‍പി സ്‌കൂള്‍ തെരഞ്ഞെടുക്കപ്പെട്ടു. സ്‌കൂള്‍ വളപ്പില്‍ അരയേക്കറോളം സ്ഥലത്ത് നടത്തുന്ന മാതൃക ജൈവ പച്ചക്കറി കൃഷിത്തോട്ടവും പുഷ്പപാര്‍ക്കിലെ മാതൃക പുഷ്പകൃഷിയും വിലയിരുത്തിയാണ് സ്‌കൂളിനെ ഈ അവാര്‍ഡിന് തെരഞ്ഞെടുത്തത്.
സ്‌കൂള്‍ പരിസരം വൃത്തിയായും പ്ലാസ്റ്റിക് വിമുക്തമാക്കിയും സംരക്ഷിക്കാന്‍ സ്‌കൂള്‍ അധികൃതരും വിദ്യാര്‍ഥികളും കാണിക്കുന്ന ഉത്സാഹവും സ്‌കൂളിനെ ഈ അവാര്‍ഡിന് തെരഞ്ഞെടുക്കാന്‍ പ്രേരകമായി.
കേന്ദ്ര തപാല്‍ വകുപ്പ് ചങ്ങനാശേരി സബ്ഡിവിഷന്‍ അസിസ്റ്റന്‍റ് സൂപ്രണ്ട് വി.കെ. സജിയില്‍നിന്നും സ്‌കൂള്‍ അസിസ്റ്റന്‍റ് മാനേജര്‍ ഫാ. നിജോ വടക്കേറ്റത്തില്‍, ഹെഡ്മാസ്റ്റര്‍ ബിനു ജോയ്, പിടിഎ പ്രസിഡന്‍റ് ജോളി ജോസഫ്, സ്‌കൂള്‍ ലീഡര്‍മാരായ മാസ്റ്റര്‍ ജോഹാന്‍ മാത്യു ജെറീഷ്, കുമാരി അലീന മരിയ ബിനോച്ചന്‍ എന്നിവര്‍ ചേര്‍ന്ന് പുരസ്‌കാരം ഏറ്റുവാങ്ങി. തപാല്‍ വകുപ്പിലെ ചങ്ങനാശേരി ഡിവിഷന്‍ മാര്‍ക്കറ്റിംഗ് മാനേജര്‍ വിജിമോള്‍ പ്രസംഗിച്ചു.
പരമ്പരാഗത നാടന്‍ കാര്‍ഷികവിളകളായ കപ്പ, കാച്ചില്‍, ചേന, ചേമ്പ് തുടങ്ങിയവയും തക്കാളി, പയര്‍, പടവലം, വെണ്ട, കോവല്‍ തുടങ്ങിയ പച്ചക്കറികളും സ്‌കൂള്‍ വളപ്പില്‍ കൃഷി ചെയ്തു വരുന്നു. ശീതകാല പച്ചക്കറികളായ കാബേജ്, കാരറ്റ്, കോളിഫ്‌ളവര്‍, ബീറ്റ്‌റൂട്ട്, ബ്രോക്കോളി എന്നിവയുടെ നടീല്‍ ഉദ്ഘാടനം കോട്ടയം വിദ്യാഭ്യാസ ഉപഡയറക്ടര്‍ സുബിന്‍ പോള്‍ നിര്‍വഹിച്ചു.