ജെബി മേത്തർ തിരുവനന്തപുരം ആമയിഴഞ്ചാൻ കനാലിൽ ശുചീകരണത്തൊഴിലാളി ജോയി മരിക്കാനിടയായ സംഭവം നഗരസഭയുടെയും റെയിൽവെയുടെയും കെടുകാര്യസ്ഥതയുടെ ഫലമാണെന്ന് ജെബി മേത്തർ എംപി രാജ്യസഭയിലെ ശൂന്യവേളയിൽ ആരോപിച്ചു. ജോയിയുടെ അമ്മയ്ക്ക് ആവശ്യമായ നഷ്ടപരിഹാരം കേന്ദ്രസർക്കാരും റെയിൽവെയും അനുവദിക്കണമെന്നും എംപി ആവശ്യപ്പെട്ടു.
എ.എ. റഹീം ഭരണഘടന അനുച്ഛേദം 164 ഭേദഗതി ചെയ്യാൻ രാജ്യസഭയിൽ എ.എ. റഹീം എംപി സ്വകാര്യബിൽ അവതരിപ്പിച്ചു. അനുച്ഛേദം 164 (1) പ്രകാരം മുഖ്യമന്ത്രിയെയും മുഖ്യമന്ത്രിയുടെ നിർദേശപ്രകാരം മന്ത്രിമാരെയും ഗവർണർ നിയമിക്കുമെന്നും ഗവർണറുടെ പ്രീതിയുള്ളിടത്തോളം കാലം അവർക്ക് ചുമതല തുടരാമെന്നും ഭരണഘടന അനുശാസിക്കുന്നത്.
എന്നാൽ ഗവർണറുടെ പ്രീതി എന്ന പ്രയോഗം കൊളോണിയൽ ഉത്പന്നമാണെന്നും ഈ പ്രയോഗം ഒരു റിപ്പബ്ലിക്കിനു ചേർന്നതല്ലെന്നും ബില്ലിൽ പറയുന്നു. ഈ പ്രയോഗം നീക്കം ചെയ്തു പകരം നിയമസഭയുടെ വിശ്വാസം നിലനിൽക്കുന്നിടത്തോളം കാലം മുഖ്യമന്ത്രിക്കും മന്ത്രിമാർക്കും ചുമതലയിൽ തുടരാം എന്നു ഭേദഗതി ചെയ്യണമെന്നും സ്വകാര്യബില്ലിലൂടെ എംപി ആവശ്യപ്പെട്ടു.