ദൗത്യസംഘത്തിനു നഷ്ടമായത് വിലപ്പെട്ട സമയം ഇവരുടെ അനുമാനങ്ങൾക്കു പിന്നാലെ ഓരോ സ്ഥലങ്ങൾ മാറിമാറി കുഴിച്ചപ്പോൾ നഷ്ടമായത് ദൗത്യത്തിന്‍റെ വിലപ്പെട്ട അഞ്ചു ദിവസങ്ങളും കോടിക്കണക്കിനു രൂപയും മനുഷ്യാധ്വാനവുമാണ്. അവസാനം ഇവർ പറഞ്ഞ ഒരിടത്തും ലോറി കിട്ടാതായപ്പോൾ മലയോടു ചേർന്ന ഭാഗം തുരക്കണമെന്നുവരെ ഇവർ ആവശ്യപ്പെട്ടിരുന്നു.
ആ ഭാഗം ഇനിയും തുരന്നാൽ മലയുടെ ബാക്കിഭാഗംകൂടി ഇടിഞ്ഞ് വീണ്ടുമൊരു വൻ ദുരന്തമാകും സംഭവിക്കുകയെന്നറിയാവുന്ന ദൗത്യസംഘം ഇതോടെ ഇവരെ ഒഴിവാക്കുകയായിരുന്നു. പുഴയോടു ചേർന്ന കരഭാഗം വീണ്ടും ഇടിക്കണമെന്ന ആവശ്യവും ഇതിനു പിന്നാലെ ഇവർ ഉയർത്തി.
ഇതിനിടെ, പലതവണ ദൗത്യസംഘത്തിനും സേനയ്ക്കുമെതിരേ പരസ്യപ്രതികരണങ്ങൾ പോലുമുണ്ടായി. സൈബറിടങ്ങളിലും കർണാടകയ്ക്കെതിരായ അധിക്ഷേപങ്ങളും പരിഹാസവും നിറഞ്ഞു. ദൗത്യസംഘത്തിനു നേതൃത്വം നല്കിയ സതീഷ് കൃഷ്ണ സെയിൽ എംഎൽഎയുടെ ഔദ്യോഗിക ഫേസ്ബുക്ക് പേജിൽ പോലും മലയാളത്തിലുള്ള അധിക്ഷേപങ്ങൾ നിരന്നിരുന്നു.
എന്നാൽ, കരസേനയുടെയും നാവികസേനയുടെയും എൻഡിആർഎഫിന്‍റെയും ശാസ്ത്രീയ മാർഗങ്ങൾ മാത്രം ഉപയോഗിച്ച് വീണ്ടും പുഴയിൽ തെരച്ചിൽ തുടങ്ങിയതിന്‍റെ രണ്ടാം ദിവസംതന്നെ ട്രക്ക് കണ്ടെത്താനായതോടെ വിമർശിച്ചവരെല്ലാം നിശബ്ദരായി.
ലോറി കരയിൽത്തന്നെയാണുള്ളതെന്നു ചാനലുകളിലൂടെ പലതവണ വിളിച്ചുപറഞ്ഞ വിദഗ്ധരെ പിന്നീടെങ്ങും കണ്ടില്ല.
കുടുംബാംഗങ്ങളും ആദ്യഘട്ടത്തിൽ പലപ്പോഴും ഇവരുടെ അനുമാനങ്ങൾ വിശ്വസിച്ചുപോയിരുന്നു. എന്നാൽ പിന്നീട് സത്യം തിരിച്ചറിഞ്ഞതോടെ ദൗത്യത്തിൽ പൂർണ വിശ്വാസം പ്രകടിപ്പിച്ച് കുടുംബാംഗങ്ങൾ രംഗത്തെത്തുകയും ചെയ്തു.