1999 ജൂണ്‍ രണ്ടിനാണ് ഓപ്പറേഷന്‍ വിജയ്ക്കിടെ ക്യാപ്റ്റന്‍ വിക്രം വീരമൃത്യു വരിച്ചത്. വിക്രമിന്‍റെ യൂണിറ്റായ 141 ഫീല്‍ഡ് റെജിമെന്‍റിനെ കാര്‍ഗിലിലെ കക്‌സര്‍ സെക്ടറിലാണ് വിന്യസിച്ചിരുന്നത്. കക്സറില്‍ 17,500 അടി ഉയരത്തിലുള്ള ഒരു ഫോര്‍വേഡ് പോസ്റ്റില്‍ ഡ്യൂട്ടിയിലായിരുന്നു അദ്ദേഹം.
കാര്‍ഗില്‍ സെക്ടറിലെ ജാട്ട് റെജിമെന്‍റിന്‍റെ നാലാം ബറ്റാലിയന്‍റെ നേരിട്ടുള്ള പിന്തുണയില്‍ ഫോര്‍വേഡിംഗ് ഒബ്‌സര്‍വേഷന്‍ ഓഫീസറുടെ ചുമതല നിര്‍വഹിക്കുകയായിരുന്നു വിക്രം. ജാട്ട് ബറ്റാലിയന്‍, ക്യാപ്റ്റന്‍ വിക്രമിനൊപ്പം ഫയര്‍ ബാരേജിലൂടെ പാക്കിസ്ഥാന്‍ ബങ്കറുകള്‍ ആക്രമിച്ചു.
മണിക്കൂറുകളോളം നീണ്ടുനിന്ന വെടിവയ്പില്‍ വിക്രം ശത്രുസ്ഥാനങ്ങളിലേക്കു പീരങ്കിവെടി ഉതുർക്കുമ്പോള്‍ ഒരു മോര്‍ട്ടാര്‍ ഷെല്‍ അദ്ദേഹത്തിന്‍റെ അടുത്തേക്കു വന്നുവീണു. ഇതില്‍ ഗുരുതരമായി പരിക്കേറ്റ അദ്ദേഹം മരണത്തിനു കീഴടങ്ങുകയായിരുന്നു.
1973 ഒക്‌ടോബര്‍ 24നു കോഴിക്കോട് മാനാരിയിലാണു വിക്രമിന്‍റെ ജനനം. രാജ്യത്തിന്‍റെ വിവിധ ഭാഗങ്ങളിലുള്ള കേന്ദ്രീയ വിദ്യാലയങ്ങളില്‍ പഠിച്ചശേഷം ഒറ്റപ്പാലത്തുള്ള എന്‍എസ്എസ് കോളജില്‍നിന്ന് 1994-ല്‍ ബിഎസ്‌സി കംപ്യൂട്ടര്‍ സയന്‍സില്‍ ബിരുദം നേടി. സ്‌കൂള്‍ കാലം മുതല്‍ പിതാവിന്‍റെ പാതയില്‍ സൈന്യത്തിലേക്കായിരുന്നു താത്പര്യം.
ഡെറാഡൂണിലെ ഇന്ത്യന്‍ മിലിട്ടറി അക്കാദമിയില്‍ ചേര്‍ന്ന അദ്ദേഹം 1996 ജൂണ്‍ എട്ടിന് രണ്ടാം ലെഫ്റ്റനന്‍റ് റാങ്കില്‍ പാസായി. മധ്യപ്രദേശ് ആസ്ഥാനമായുള്ള 141 ഫീല്‍ഡ് റെജിമെന്‍റിലാണ് കമ്മീഷന്‍ ചെയ്തത്. വിക്രമിന്‍റെ പിതാവും ഈ റെജിമെന്‍റില്‍ സേവനമനുഷ്ഠിച്ചിട്ടുണ്ട്.
മരണാനന്തര ബഹുമതിയായി ധീരതയ്ക്കും ത്യാഗത്തിനും ക്യാപ്റ്റന്‍ വിക്രമിനു സേനാമെഡല്‍ ലഭിച്ചിട്ടുണ്ട്. ടെറിട്ടോറിയല്‍ ആര്‍മി മദ്രാസ് റെജിമെന്‍റിന്‍റെ ഭാഗമായ കോഴിക്കോട് വെസ്റ്റ്ഹില്ലിലെ പരേഡ് ഗ്രൗണ്ടിനു വിക്രമിന്‍റെ പേരാണു നല്‍കിയിട്ടുള്ളത്.