യുദ്ധം കഴിഞ്ഞ് രണ്ടു വർഷത്തിനുശേഷം യുദ്ധസമയത്ത് അവിടെ പാകിയ കുഴിബോംബുകൾ നിർവീര്യമാക്കുന്ന ജോലിയും ചെയ്യേണ്ടതുണ്ടായിരുന്നു. കൃഷിയിടമായിരുന്ന ഇവിടം പൂർണമായി സുരക്ഷിതമാക്കി പ്രദേശവാസികൾക്കു കൈമാറിയാണ് സംഘം ദൗത്യം പൂർത്തിയാക്കിയത്. കുഴിബോംബ് നിർവീര്യമാക്കുന്നതിനിടെ പൊട്ടിത്തെറിച്ച് സംഘാംഗങ്ങളിലൊരാൾ മരണം വരിച്ച ഭീകരരംഗവും ജി.കെ. നായർ അനുസ്മരിച്ചു. ഒരാൾക്കു ഗുരുതരമായ പരിക്കേറ്റു.
1983ൽ ജവാനായി ഇന്ത്യൻ സൈന്യത്തിൽ ചേർന്ന ജി.കെ. നായർ 32 വർഷത്തെ രാജ്യസേവനത്തിനു ശേഷം 2015ൽ സുബേദാർ മേജർ ഓണററി ക്യാപ്റ്റൻ റാങ്കിൽനിന്നാണു റിട്ടയർ ചെയ്തത്. സർവീസ് കാലയളവിൽ വിവിധ സംസ്ഥാനങ്ങളിൽ സേവനമനുഷ്ഠിച്ചു.
പൊന്നാനി സ്വദേശിയായ ജി.കെ. നായർ ഇപ്പോൾ പാലക്കാട് റെയിൽവേ കോളനിയിലാണു താമസം. കേരള സ്റ്റേറ്റ് എക്സ് സർവീസസ് ലീഗ് പാലക്കാട് ബ്ലോക്ക് സെക്രട്ടറികൂടിയാണ്. ഭാര്യ പുഷ്പലതയും മകൻ ഗോകുൽനാഥ് (യുഎസ്), മകൾ ഗോപിക (ബംഗളൂരു) എന്നിവരുമടങ്ങുന്നതാണ് കുടുംബം.