കേന്ദ്രബജറ്റിൽ മൊത്തം 11.11 ലക്ഷം കോടി രൂപയാണു മൂലധനച്ചെലവ്. അടിസ്ഥാനസൗകര്യവികസന ചെലവ് ഇടക്കാല ബജറ്റിലേതു പോലെ ജിഡിപിയുടെ 3.4 ശതമാനമാണ്. ഗ്രാമവികസനത്തിന് 2.66 ലക്ഷം കോടി രൂപ വകയിരുത്തി. വിവിധ റോഡ് കണക്ടിവിറ്റി പദ്ധതികൾക്ക് 26,000 കോടി രൂപ ലഭ്യമാക്കും.
റെയിൽവേക്ക് 2.62 ലക്ഷം കോടി രൂപ നീക്കിവയ്ക്കും. പാവങ്ങളുടെയും ഇടത്തരക്കാരുടെയും ഭവനനിർമാണത്തിനുള്ള പ്രധാനമന്ത്രി ആവാസ് യോജനയ്ക്കായി 10 ലക്ഷം കോടി രൂപയാണ് വകയിരുത്തിയത്. അടുത്ത അഞ്ചു വർഷത്തേക്കുള്ള കേന്ദ്ര സഹായമായി 2.2 ലക്ഷം കോടി ഉൾപ്പെടെയാണിത്.
മുദ്ര വായ്പ 10 ലക്ഷത്തിൽനിന്ന് 20 ലക്ഷമായി ഉയർത്തി. പന്ത്രണ്ട് പുതിയ വ്യവസായ പാർക്കുകളും പ്രഖ്യാപിച്ചെങ്കിലും കേരളത്തിനില്ല. പ്രകൃതിയുമായി ഇണങ്ങിയുള്ള കൃഷിയിലേക്ക് (നാച്വറൽ ഫാമിംഗ്) ഒരു കോടി കർഷകരെ കൊണ്ടുവരും. ചെമ്മീൻ കൃഷി, സംസ്കരണം, കയറ്റുമതി എന്നിവയ്ക്കു പ്രോത്സാഹനം നൽകുന്നതു കേരളത്തിനും നേട്ടമാകും.
വില കുറയും ☛ മൊബൈല്‍ ഫോണ്‍, ചാര്‍ജറുകളും അനുബന്ധ വസ്തുക്കളും
☛ സ്വര്‍ണം, വെള്ളി, പ്ലാറ്റിനം ആഭരണങ്ങളും ഉത്പന്നങ്ങളും
☛ കാൻസർ മരുന്നുകൾ
☛ മത്സ്യങ്ങൾ
☛ എക്സ്റേ സേവനങ്ങൾ
☛ സോളാർ സെല്ലുകളും പാനലുകളും
☛ ലെതർ നിർമിത വസ്ത്രങ്ങൾ, പാദരക്ഷകൾ
☛ സ്റ്റീൽ, ചെന്പ് ഉത്പന്നങ്ങൾ
വില കൂടും ☛ ഏതാനും ടെലികോം സംവിധാനങ്ങൾ
☛ അമോണിയം നൈട്രേറ്റ്
☛ പിവിസി ഫ്ളെക്സ് ബാനറുകൾ
എല്ലാവർ‍ക്കും ഗുണം നികുതിഭാരം കുറയ്ക്കുന്നതിലാണു സര്‍ക്കാര്‍ ശ്രദ്ധ കേന്ദ്രീകരിച്ചത്. സമൂഹത്തിലെ എല്ലാ വിഭാഗങ്ങള്‍ക്കും ഗുണംചെയ്യുന്ന ബജറ്റിലൂടെ വികസിത ഇന്ത്യക്കായുള്ള അസ്തിവാരം സൃഷ്ടിക്കപ്പെട്ടിരിക്കുകയാണ്. ഗ്രാമീണരും പാവപ്പെട്ടവരും കര്‍ഷകരും ഉള്‍പ്പെടെ സമൂഹത്തിലെ എല്ലാ വിഭാഗങ്ങളെയും ശക്തീകരിക്കാൻ ഉതകുന്ന ബജറ്റ് വിദ്യാഭ്യാസ-നൈപുണ്യവികസന മേഖലകളെ പുതിയ തലത്തിലെത്തിക്കും.
-പ്രധാനമന്ത്രി നരേന്ദ്ര മോദി
കസേര സംരക്ഷിക്കണം സ്വന്തം കസേര സംരക്ഷിക്കാനും ചങ്ങാത്ത മുതലാളിമാരെ സുഖിപ്പിക്കാനുമുള്ളതാണ് ബജറ്റ്. പൊള്ളയായ വാഗ്ദാനങ്ങളുള്ള ബജറ്റിൽ കോണ്ഗ്രസ് പ്രകടനപത്രികയിലെയും മുൻ ബജറ്റുകളിലെയും ആശയങ്ങൾ പകർത്തി ഒട്ടിക്കുകയാണ് ധനമന്ത്രി നിർമല സീതാരാമൻ ചെയ്തത്.
-പ്രതിപക്ഷ നേതാവ് രാഹുൽ ഗാന്ധി