ആയുഷ് മന്ത്രാലയം പരിശോധിച്ച് ഉറപ്പുവരുത്തുന്നതിനു മുന്പേയാണ് കോവിഡ് പ്രതിരോധ മരുന്ന് എന്ന പേരിൽ കോവിഡ് കാലത്ത് പതഞ്ജലി ഉത്പന്നങ്ങൾ പ്രചരിപ്പിച്ചതെന്ന് കേന്ദ്രം കോടതിയിൽ പറഞ്ഞു. കേസുമായി ബന്ധപ്പെട്ട് കേന്ദ്രസർക്കാരിന്റെ നിലപാടറിയിക്കാൻ കോടതി ആവശ്യപ്പെട്ടിരുന്നു. എന്നാൽ കേന്ദ്രത്തിന്റെ മറുപടിയിൽ കോടതി അതൃപ്തി പ്രകടിപ്പിച്ചു.
തെറ്റിദ്ധരിപ്പിക്കുന്ന രീതിയിലുള്ള പരസ്യപ്രചാരണം നടത്തിയതിൽ ഇന്ത്യൻ മെഡിക്കൽ അസോസിയേഷനാണ് പതഞ്ജലിക്കെതിരേ കോടതിയെ സമീപിച്ചത്.
വിശദീകരണം ആവശ്യപ്പെട്ടു കോടതി അയച്ച നോട്ടീസിനു മറുപടി നൽകാതിരുന്നതോടെ ബാബാ രാംദേവിനും ആചാര്യ ബാലകൃഷ്ണയ്ക്കുമെതിരേ കോടതിയലക്ഷ്യത്തിന് നടപടി സ്വീകരിക്കുകയായിരുന്നു. കോടതിയിൽ രണ്ടുതവണ മാപ്പപേക്ഷ നടത്തിയെങ്കിലും സ്വീകരിക്കാതിരുന്ന കോടതി പതഞ്ജലിക്കെതിരേ രൂക്ഷ വിമർശനവും നടത്തിയിരുന്നു.