ബെനഡിക്‌ട് മാര്‍ ഗ്രീഗോറിയോസ് അവാര്‍ഡ് ക്രിസ് ഗോപാലകൃഷ്ണന്
Thursday, October 10, 2024 1:35 AM IST
തിരുവനന്തപുരം: തിരുവനന്തപുരം ആര്‍ച്ച്ബിഷപ്പും മാര്‍ ഈവാനിയോസ് കോളജിന്‍റെ പ്രഥമ പ്രിന്‍സിപ്പലുമായിരുന്ന ആര്‍ച്ച്ബിഷപ് ബെനഡിക്‌ട് മാര്‍ ഗ്രിഗോറിയോസിന്‍റെ പേരില്‍ മാര്‍ ഈവാനിയോസ് കോളജിലെ പൂര്‍വവിദ്യാര്‍ഥീ സംഘടനയായ അമിക്കോസ് ഏര്‍പ്പെടുത്തിയ 2024ലെ അവാര്‍ഡ് ഇന്‍ഫോസിസ് സഹസ്ഥാപകനും വൈസ് ചെയര്‍മാനും സിഇഒയും ആയിരുന്ന ക്രിസ് ഗോപാലകൃഷ്ണന് സമ്മാനിക്കും.
മുന്‍ ചീഫ് സെക്രട്ടറി ഡോ. കെ. ജയകുമാര്‍ ചെയര്‍മാനും, മുന്‍ ഇന്ത്യന്‍ അംബാസഡര്‍ ടി.പി. ശ്രീനിവാസന്‍, മുന്‍ ചീഫ് സെക്രട്ടറി ജോണ്‍ മത്തായി എന്നിവര്‍ അംഗങ്ങളുമായ ജൂറിയാണ് അദ്ദേഹത്തെ തെരഞ്ഞെടുത്തത്. ഒരു ലക്ഷം രൂപയും പ്രശസ്തി പത്രവും അടങ്ങുന്നതാണ് അവാര്‍ഡ്.
മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവായാണ് അവാര്‍ഡ് പ്രഖ്യാപിച്ചത്.
രാജ്യത്തെ ആയിരക്കണക്കിന് യുവാക്കള്‍ തൊഴില്‍ അന്വേഷിച്ചു വിദേശത്തേക്ക് പോകുന്ന ഇന്നത്തെ സാഹചര്യത്തില്‍ ആയിരക്കണക്കിന് യുവാക്കള്‍ക്ക് നാട്ടില്‍ത്തന്നെ തൊഴിലവസരങ്ങള്‍ സൃഷ്ടിക്കുന്നതിന് ക്രിസ് ഗോപാലകൃഷ്ണന്‍റെ നേതൃത്വത്തില്‍ നടത്തിയിട്ടുള്ള പരിശ്രമങ്ങളെ കാതോലിക്കാ ബാവാ പ്രത്യേകം പ്രശംസിച്ചു.
ക്രിസ് ഗോപാലകൃഷ്ണന്‍റെ ഈ മേഖലയിലെ സംഭാവനകള്‍ പരിഗണിച്ചാണ് അവാര്‍ഡിന് തെരഞ്ഞെടുത്തത്. തിരുവനന്തപുരത്തുവച്ച് അവാര്‍ഡ് പിന്നീട് സമ്മാനിക്കും.