കാണാതായവരില്‍ പത്തനംതിട്ട സ്വദേശിയായ ഒരു സൈനികന്‍ കൂടി
Wednesday, October 2, 2024 4:10 AM IST
പത്തനംതിട്ട: ലേ ലഡാക്കിൽ 56 വര്‍ഷം മുമ്പ് വിമാന ദുരന്തത്തിൽ കാണാതായ സൈനികരിൽ പത്തനംതിട്ട സ്വദേശിയായ ഒരു സൈനികൻ കൂടി. കാട്ടൂര്‍ വയലത്തല ഈട്ടിനിൽക്കുന്ന കാലായിൽ ഇ.എം. തോമസിനെയാണ് ഇതേ ദുരന്തത്തില്‍ കാണാതായത്. അദ്ദേഹത്തിന് അന്ന് പ്രായം 21.
ഇലന്തൂര്‍ ഓടാലില്‍ തോമസ് ചെറിയാന്‍റെ മൃതദേഹം വിമാനം തകര്‍ന്നുവീണ ലേ ലഡാക്കില്‍നിന്ന് കണ്ടെത്തിയെന്ന വാര്‍ത്ത ഇ.എം. തോമസിന്‍റെ കുടുംബാംഗങ്ങള്‍ക്കും പ്രതീക്ഷയേകുന്നു. തിങ്കളാഴ്ചയാണ് തോമസ് ചെറിയാന്‍റെ മൃതദേഹം കണ്ടെത്തിയെന്ന സന്ദേശം സൈനിക കേന്ദ്രത്തില്‍നിന്ന് കുടുംബാംഗങ്ങള്‍ക്ക് ലഭിച്ചത്. തോമസ് ചെറിയാന്‍റെ അകന്ന ബന്ധു കൂടിയാണ് ഇ.എം. തോമസ്.
ഈട്ടിനിൽക്കുന്നകാലായിൽ ഇ.ടി. മാത്യുവിന്‍റെയും സാറാമ്മയുടെയും മൂത്ത മകനാണ്. സഹോദരന്‍ ബാബു മാത്യുവിന്‍റെ മക്കളാണ് ഇപ്പോള്‍ വയലത്തലയിലെ വീട്ടില്‍ താമസിക്കുന്നത്. സഹോദരി മോളി വര്‍ഗീസ് അമേരിക്കയിലാണ്. തോമസിന്‍റെ മരണത്തെത്തുടര്‍ന്ന് സഹോദരന്‍ ബാബുവിന് സര്‍ക്കാര്‍ വനംവകുപ്പില്‍ ജോലി നല്‍കിയിരുന്നു.
മാതാപിതാക്കൾക്ക് സൈന്യത്തില്‍നിന്ന് പെന്‍ഷനും ലഭിച്ചിരുന്നു. ബാബുവും മാതാപിതാക്കളും മരിച്ചു. 20 വര്‍ഷം മുമ്പ് കാണാതായവരെക്കുറിച്ച് അന്വേഷണം തുടരുന്നതായി സൈനിക കേന്ദ്രത്തില്‍നിന്ന് വീട്ടില്‍ സന്ദേശം ലഭിച്ചിരുന്നെന്ന് ബാബു മാത്യുവിന്‍റെ മകന്‍ വിപിന്‍ പറഞ്ഞു.
ഇതേ അപകടത്തിൽപെട്ട കോട്ടയം സ്വദേശിയായ കെ.കെ. രാജപ്പൻ എന്നയാളെക്കുറിച്ചും ബന്ധുക്കൾക്ക് ഇതേവരെ വിവരം ലഭിച്ചിട്ടില്ല.