ഡൽഹിയിൽ ആം ആദ്മി പാർട്ടി നല്ല ഭരണം കാഴ്ചവച്ചു. പഞ്ചാബിലും ഇതാവർത്തിക്കുന്നു. രണ്ട് സംസ്ഥാനങ്ങളിൽ ഇപ്പോൾ പാർട്ടി ഭരണത്തിലുണ്ട്. ഇത് ബിജെപിക്ക് ഭാവിയിൽ ഭീഷണിയാകുമെന്നതിനാലാണ് ഇവർ പാർട്ടിയിലെ നേതാക്കളെ അറസ്റ്റ് ചെയ്യുന്നത്. അതിന്റെ ഭാഗമായാണ് തന്നെയും മനീഷ് സിസോദിയയെയും അറസ്റ്റ് ചെയ്തതെന്നും കേജരിവാൾ ആരോപിച്ചു. എഎപി എംപി രാഘവ് ഛദ്ദ, ഡൽഹി മന്ത്രിമാരായ അതിഷി, സൗരഭ് ഭരദ്വാജ് തുടങ്ങിയ നേതാക്കളെയും അറസ്റ്റ് ചെയ്യാനുള്ള നീക്കമാണ് ബിജെപി നടത്തുന്നതെന്നും കേജരിവാൾ പറഞ്ഞു.അതേസമയം, സ്വാതി മാലിവാളിന്റെ കേസുമായി ബന്ധപ്പെട്ട് കേജരിവാളിന്റെ വീട്ടിൽ വീണ്ടും പോലീസ് പരിശോധന നടത്തി.
കഴിഞ്ഞ തിങ്കളാഴ്ചയാണ് കേസിനാസ്പദമായ സംഭവം.കേജരിവാളിനെ കാണാനെത്തിയ സ്വാതി മാലിവാളിനെ കേജരിവാളിന്റെ പിഎ വൈഭവ് കുമാർ കൈയേറ്റം ചെയ്തെന്നാരോപിച്ച് സ്വാതി പോലീസിൽ പരാതി നൽകിയിരുന്നു. ആദ്യം പരാതി നല്കാൻ വിസമ്മതിച്ചെങ്കിലും വ്യാഴാഴ്ചയാണ് വിവിധ വകുപ്പുകൾ ചുമത്തി വൈഭവിനെതിരേ പോലീസ് കേസ് രജിസ്റ്റർ ചെയ്തത്. പിന്നാലെ ശനിയാഴ്ച വൈഭവിനെ പോലീസ് അറസ്റ്റ് ചെയ്യുകയും തുടർന്ന് കേജരിവാളിന്റെ വീട്ടിൽ പരിശോധന നടത്തുകയും ചെയ്തിരുന്നു.